¹ Pagi-pagi botul, imam-imam kapalo bapokat dongan para tua-tua, dan jugo para ahli Taurat, jugo samuo Sanhedrin. Torus orang tu mangikat Yesus, mambawak nyo pogi lalu manyorahkan-NYO samo Pilatus. ² Habis tu, Pilatus pun batanyo, "Apokah Raja orang Yahudi kau?" dan, torus di manjawab-NYO, "Kau nang mambilangkan nya." ³ Sasudah tu, para imam kapalo ambal nang manuduh Yesus torus-torusan. ⁴ Pilatus batanyo lagi samo-NYO, "Kanapo ko tak manyahutnyo? Tengoklah sabarapo banyak tuduhan orang tu untuk malawan KAU." ⁵ Yesus tak ondak lagi manyahut sahinggo heranlah Pilatus. ⁶ Pas Hari Raya Paskah, Pilatus biasonyo malopaskan saorang tahanan nang orang tu minta ⁷ Adolah saorang banamo Barabas dikurung samo orang jahat nang malakukan pambunuhan samo pambarontakan tu. ⁸ Babondong-bondonglah orang tu datang maminta samo Pilatus supayo mambuat kabiasaan nang soring dio lakukan samo orang tu. ⁹ Torus Pilatus manyahut orang tu dongan bacakap, "Apokah kamu ondak aku malopaskan Raja orang Yahudi ni?" ¹⁰ karono, tau dio para imam kapalo tu nang manyorahkan Yesus karono angek. ¹¹ Tapi, imam-imam kapalo tu malah mampangaruhi orang nang banyak tu ondak maminta si Pilatus malopaskan Barabas. ¹² Torus bacakaplah Pilatus samo orang tu. "Apo nang ondak aku buat samo orang nang kamu bilang Raja orang Yahudi ni?" ¹³ Dan manjorit-jorit orang tu, "Salibkan DIO!". ¹⁴ Torus bacakaplah Pilatus samo orang tu, "Mengapo? Kajahatan apo nang sudah dibuat-NYO?" Lalu orang tu manjorit sakuat-kuatnyo, "Salibkan DIO!" ¹⁵ Karono ondak manyonangkan hati orang rame tu, dilopaskan Pilatus lah si Barabas dan sasudah marojam Yesus, di sorahkan-NYO lah buat disalibkan. ¹⁶ Lalu, dibawak prajurit itulah Yesus ka ruang pangadilan. ¹⁷ Torus orang tu memakekkan-NYO jubah ungu, dan abis dibuat orang tu sabijik mahkota baduri orang tu pun mamakekkan-NYO samo Yesus. ¹⁸ Lopas tu, orang tu puin ondak manyampekkan salam samo-NYO, "salam Raja orang Yahudi!" ¹⁹ Lalu, orang-orang tu pun malopuk kapalo-NYO dongan sabijik bambu, dan maludahi-NYO torus balutut manyombah-NYO. ²⁰ Sasudah orang tu mangejek-ejek Yesus, dilopaskan orang tu lah jubah ungu tu dari Yesus, dan dipakekkan lah pakean -NYO sandiri. Habis tu, dibawak orang tu lah Yesus kaluar untuk manyalibkan-NYO. (Panyaliban Yesus) ²¹ Dipaksa orang-orang tu lah Simon orang Kinere nang pas lewat, karono dio baru balek dari kampung ayah nyo dari Aleksander dan Rufus untuk mamikul salib-NYO ²² Orang-orang tu pun manggiring Yesus ka tompat banama Golgota, nang artinyo "Tompat tangkorak". ²³ orang tu pun mangkasih-NYO aggur bacampur mur tapi DIO tak ondak mangambilnyo. ²⁴ Lalu, orang tu manyalibkan DIO dan mangkasih-kasihkan pakean-NYO samo orang-orang tu, sambil mangundi untuk manontukan bagian mano nang di dapat orang tu. ²⁵ Orang-orang tu pun manyalibkan-NYO pas jam katigo. ²⁶ Ta tulislah tulisan tontang tuduhan samo Yesus, "Raja orang Yahudi." ²⁷ Abis tu disalibkan orang tu jugolah duo orang parampok dongan-NYO, saorang di sabolah kanan-NYO dan saorang lagi disabolah kiri-NYO. ²⁸ Gonaplah sudah Kitab Suci nang mambilangkan, "Dan, dio tarikut samo orang nang durhako tu. ²⁹ Samuo orang nan lewat tu mancaci Yesus manggelengkan kapalo sambil jugo bacakap, "Woi! Kau nang ondak maruntuhkan dan mamikul balek Bait Allah dan mambuatnyo salamo tigo hari, ³⁰ Lopaskan diri KAU sandiri dari salib tu!". ³¹ Di caci imam-imam kapalo samo para ahli Taurat tu lah Yesus sambil bacakap satu samo lain, "Orang lain dilopaskan-NYO, tapi diri-NYO sandiri pun tak biso di lopaskan! ³² Bak kito liatlah Mesias, Sang Raja Israel, turun dari salib bak kito biso manengok dan yakin." orang nan salibkan disamping Yesus tu pun ikut mangejek DIO. ³³ Dari jam ka onam sampek jam ka sambilan golaplah kampung tu. ³⁴ Di jam ka sambilan tu, manjorit Yesus dongan lantang, "Eloi, Eloi, Lama sabakhtani," nang artinyo " Allah-KU, Allah-KU, kenapo kau tinggalkan AKU?" ³⁵ Abis, mandongar tu, orang nang togak di samping-NYO bacakap,"Tengoklah woi! di panggil-NYO si Elia." ³⁶ Torus, balarilah saorang sambil mambawak sabijik spons nang udah di isi anggur asam, ditompatkan nyo di sabijik bambu, torus dikasihnyolah samo Yesus bak minum, sambil bacakap, "Bak kito tengok dulu botul nyo datang si Elia ondak malopaskan Dio." ³⁷ Abis tu, manjorit lah Yesus lalu manghombuskan nafas tarakhir-NYO. ³⁸ Pas itu lah tabolah duo tirai Bait Allah dari atas sampe ka bawah. ³⁹ Di tengok kapalo pasukan nang togak di mukak Yesus tu lah, macam mano Yesus manghombuskan nafas tarakhir-NYO, sambil bacakap, "Botullah orang nih Budak Allah!". ⁴⁰ Ado jugolah para parawan nang manengok dari jauh, orang tu adolah Maria Magdalena, jugo Maria omak Yakobus Kocik, Yoses, samo salome. ⁴¹ Pas Yesus di Galalia, orang tu mangikuti jugo malayani DIO. Dan, disano jugo ado banyak parawan lainnyo nang datang basamo yesus ka Yerusalem. ⁴² Katiko hari dah golap, karono hari tu adolah Hari pasiapan sabolum hari Sabat, ⁴³ Datanglah Yusuf orang Arimatea, saorang anggota Majelis Bosar nang disogani, dio jugo manunggu-nunggu kadatangan Karajaan Allah, diboranikannyo lah pogi ka Pilatus lalu maminta badan Yesus. ⁴⁴ Tasontaklah Pilatus mandongar Yesus sudah maninggal. Di panggilnyo kapalo pasukan tu sambil batanyo, apo botul Yesus dah maninggal. ⁴⁵ Sasudah Pilatus tau dari kapalo pasukan, dikasihnyo lah mayat tu ka Yusuf. ⁴⁶ Habis tu, dibolikkan Yusuf lah kain linen dan manurunkan mayat Yesus, sasudah mambungkus-NYO di kain lenan tu, di golekkan-NYO lah dalam kuburan nang digali di bukit batu tu. Torus manggulingkan sabiji batu ka pintu masuk kuburan tu. ⁴⁷ Maria Magdalena jugo Maria omaknyo Yoses manengok tompat mayat Yesus di golekkan tadi tu.