¹ Hari Rayo paskah dan hari Rayo Roti tak baragi akan balangsung duo hari lagi, Imam-imam kapalo dan Ahli-ahli Taurat ondak mancari caro manangkap Yesus dengan manipu dan mambunuh-NYO. ² Lalu orang tu bacakap, jangan salamo hari Raya, supayo jangan tarjadi karusuhan samo orang kampung. ³ Pas Yesus ada di Betania di rumah Simon Sikusta, Waktu tu dio duduk sambil makan, tibo-tibo datangla saorang cewek mambawo guci kocik nang tarbuat dari batu Pralam, barisikan minyak Narwastu nang murni dan mahal, dipocahkan nyo lah guci tu torus di tuangkannyo ka kapala Yesus. ⁴ Ado jugo orang nang bacakap dongan goran, "Mangapolah langhantarakan minyak wangi macam ni ha"? ⁵ Minyak ni kan bisa di jual 300 dinar lobih dan biso jugo di kasih kan samo orang miskin, dan orang itu pun marah samo cewek tu, ⁶ Lalu Yesus manyaut, padiarkan sajo lah dio, "mangapo pulak kau manyusahkan dio? karono dio telah melakukan parbuatan nang baik samo KU. ⁷ Sobab, salalu ada orang nang miskin di sakitar kau, kan bisa kalian buat nan baek jugo ka orang tu. jadi, kalo AKU tak salamonyo ado basamo-samo kalian. ⁸ Cewek tuh sudah mambuat apo nang bisa di buat nyo ka AKU, io mangurapi badan-KU sabolum mati AKU. ⁹ AKU mambilangkan nang samotan-motannyo, dimano Injil ni di caritokan ka saluruh muko bumi ni, apo nang sudah di buek nyo, manjadi pangingat akan dio" ¹⁰ Pogi lah si Yudas Iskariot manjumpoi imam-imam kapalo ondak manyorahkan Yesus. ¹¹ Lalu, orang tu pun mandongar, sonang lah orang tu, dan bajanji mangasi uang samo si Yudas, torus si Yudas mancari colah nang baik untuk manyorahkan-NYO. ¹² Pas mulo-mulonyo hari rayo roti tak baragi pun sudah salose, orang tu pun mangurbankan anak dombanyo, Murid-murid Yesus batanyo ka DIO, "kamanokah KAU ondak, supayo kami pogi manyiapkan sama MU makan Paskah?" ¹³ Torus DIO manyuruhkan duo murid-NYO, dibilang-NYO, "Pogilah kalean ka kota, dan kalean tengok karang saorang bujang nang sodang mambawa Kendi barisi air ondak manjumpoi kau, ikutilah dio." ¹⁴ Antah kamana pun dia karang masuk, bilang kan samo nang punyo rumah, 'Kata Guru: Dimanolah agak nyo ruang nang karang KU pake samo murid-murid-KU supayo makan Perayaan Paskah kami karang?' ¹⁵ Lalu dio pun manompatkan satu ruang besar di lantai atas, nang ado parabot siap sadio, lalu basiap lah mereka untuk parjamuan tu. ¹⁶ Lalu murid-murid tu pogi dan tibo di kota dan manjumpoi Yesus. sudah manyiapkan Paskah. ¹⁷ Pas waktu malam Yesus samo kaduo bolas murid-NYO. ¹⁸ Waktu orang tu duduk dan makan, Yesus bacakap, "Ado diantara kamu nang ondak barkhianat ka AKU" ¹⁹ Orang tu pun sodih dan bacakap kapada-NYA satu parsatu, "Mak' tak aku itu jang?" ²⁰ Yesus bacakap ka orang tu, "Dio lah salah satu ari duo bolas murid orang nang mancolupkan roti dengan AKU kadalam mangkok". ²¹ Karono anak manusia akan pogi kayak nang sudah tatulis tontang dio, "Bajayolah orang korno Anak Manusia di khianati, bagusanlah orang macam tu tak pornah di beranakkan," ²² Bakumpul lah orang tu ondak makan, Yesus mamegang roti nang sudah di barkati, DIO mamocahkan dan mangkasi ka smuo murid-murid-NYO, bacakaplah DIO, "Ambik kalean, inilah daging badan KU" ²³ DIO mangambek cangkir tu dan basyukur, Yesus pun mangasihkan ka samuo murid-murid-NYO, torus maminum dari cangkir tu. ²⁴ Bacakaplah Yesus samo samuo orang tu, ²⁵ "AKU mambilangkan nang samotan-motannyo, takkan KU minum lagi hasil buah pokok anggur ni, hinggo hari nang katigo, AKU pun ondak maminum anggur nang baru dalam Karajaan Allah." ²⁶ Sasudah di nyanyikan orang tuh lagu rohani, pogilah orang tu ka Bukit Zaitun. (Murid-Murid Yesus Ondak Maninggalkan DIO) ²⁷ Bacakaplah Yesus samo orang tu, "Hambuslah karang kamu samuo ondak maninggalkan AKU, ado tacatat, 'Kan KU sosor gembalo tu dan barambusan samuo domba-domba tu.' ²⁸ Jadi, salose dihidupkan AKU balek, AKU ondak pogi ka Galilea, mandului kalean." ²⁹ Bacakap jugo Petrus samo DIO, "Kalo pun samuo orang ondak maninggalkan-MU, kalok aku tidak bah!." ³⁰ Yesus pun bacakap, AKU ondak mambilangkan samo kamu nang sabonar nyo, "Pas malam ni jugo, sabolum ayam jantan bakokok duo kale, kau sangkal AKU karang tigo kale." ³¹ Masih gingging pula si Petrus manjawab, "Antah mati pun aku karang, totaplah aku basamo KAU, dan tak akan mambantah ENGKAU!" Dan samuo orang jugo mambilangkan hal nang samo. ³² Lopas tu, tibolah orang tu di tompat nang banamo Getsmani, Bacakap lah DIO samo murid-murid-NYO disuruh-NYO lah duduk, "AKU ondak badoalah dulu" ³³ Di bawanyo lah si Petrus, Yakobus dan Yohanes basamo-samo dongan DIO, muloi lah tadosak dan manggalontar orang tu. ³⁴ Bacakaplah DIO sama orang tu, "Hari ini AKU sodih dan ondak mati raso KU. Makonyo totaplah kamu tinggal disi dan bajago-jagolah." ³⁵ Sasudah manjauh, balutut lah DIO, lalu badoa, kalok bisanyo waktu ni balalu, balalu lah dari pada-NYA. ³⁶ Lalu DIO bacakap, "Ayah, inilah kainginan KU. Tapi janganlah ondak nyo samau hati-KU ajo, Apo nang ondak hati-MU lah nang KAU buat samo-KU." ³⁷ Habis tuh, datang lah DIO balek dan manjumpoi murid-murid-NYO sodang tatidur, dan bacakaplah DIO ka si Petrus, "Simon, mangapo pulak ko tatidur? nang tak bisa nyo bajago-jago kaelan sa jom sajo? ³⁸ Bajago-jago dan badoa kalean, bak tak jatu kalean kadalam dosa pancobaan. Memang Roh tu Panurut, tapi daging kalean tu lomah." ³⁹ Pogi lagi lah DIO manoruskan doa-NYO dengan kato-kato nang tadi tu jugo. ⁴⁰ Datang lagi lah DIO, tapi di jumpoi-NYO orang tu masih tatidur jugo sankinkan tak tolap lagi tabalangak mata orang tu, tak tau lagi orang tu ondak manjawab apo ka DIO. ⁴¹ Sasudah tu, Datang lagi Yesus ka tigo kali nyo dan dibailangkan-NYO,"nang ondak masih tidur nyo kalean samuo? cak kalian tengok dulu, inilah waktunyo, Anak Manusio di sorahkan ka tangan orang badoso. ⁴² Badirilah kalean, bak pogi kito, korno nang ondak manjarumuskan KU tu sudah tibo dio." ⁴³ Katiko Yesus masih bacakap, datanglah Yudas, satu dari kaduo bolas murid basamo orang nang banyak tuh, sambil mambawa parang panjang dan lotuk-lotuk, disuruh samo imam-imam kapalo, ahli-ahli taurat jugo tuo-tuo (Bangsa Yahudi). ⁴⁴ Dio nang manyorahkan sudah mangkasi tando ka orang tu, cakap-nyo, "Orang nang kucium tu lah orang nyo. Tangkap dan bawalah DIO pogi sambil awasi. ⁴⁵ Pas Yudas sampek, torus mandokat lah Yudas ka Yesus sambil bacakap, "Rabi!" Io langsung mancium Yesus. ⁴⁶ Torus, orang tu mamegang Yesus lalu manangkap-NYO ⁴⁷ Dan togak lah saorang sambil mancabut parang panjang nyo dan manyorbu palayan imam besar, torus mamotong kuping nyo. ⁴⁸ Lalu bacakap lah Yesus, mangapo kalean datang mambawa parang panjang dan lotuk-lotuk untuk manangkap AKU, nang ko kiro nyo AKU ni panjahat?. ⁴⁹ Saban harinyo AKU torus samo kalean di Bait Allah sambil mangajar, tapi tak ondak kalean manangkap-KU, supayo kitab suci ni di gonapi. ⁵⁰ Lopas tu, orang tu samuo pogi maninggalkan-NYA dan hambus. ⁵¹ Ado saorang bujang nang mangekori Yesus nang hanyo mamake kain lenan di badan-NYO, lalu orang-orang tu pun manangkap nyo, ⁵² Tapi di lopaskannyo kain lenan tu lalu kabur lanjar tak bapakean. ⁵³ Torus di bawa orang tu lah Yesus ka imam bosar, dan bakumpullah kapalo imam nang tuo-tuo dan ahli-ahli taurat di Bait Allah. ⁵⁴ Dan di ikuti si Petrus lah Tuhan Yesus ka halaman rumah imam bosar, duduk lah dio basamo pangawal manghangatkan badan nyo di parapian. ⁵⁵ Imam kapalo dan samuo Mahkamah agama torus mancari kasaksian palsu nang ondak malawan Yesus, agar orang tu bisa mambunuh-NYA. ⁵⁶ Orang tu pun tak dapat apo-apo, karono banyak orang mambongak pas mangkasih kasaksian nang ondak malawan-NYO, kasaksian orang tu pun tak ado nang pas. ⁵⁷ Banyak orang nang togak mambongak, ondak malawan Yesus dan baakap. ⁵⁸ "Kami dongar DIO bacakap bagini, 'Ondak KU hancurkan Bait Allah nang kalean buat ne, tapi AKU buat balek salamo tigo hari sajo, dan tak ado campur tangak dari kalean." ⁵⁹ Baginilah maksud tontang hal itu, tak ado satupun pangakuan orang tu nang samo satu dengan nang laen. ⁶⁰ Torus tu togak lah imam bosar tu di dopan orang-orang tu dan batanyo ka Yesus, "Botul nyo KAU tak mangkasih jawaban? pangakuan orang ni ondak mambuat parlawanan samo KAU." ⁶¹ Dan tadiam lah DIO torus dan tak ondak manjawab, ditanyo imam bosar tu lah lagi Yesus, "Apokah KAU ni si Mesias anak nang di banggakan tu?" ⁶² Lalu bacakaplah Yesus, "AKU lah DIO, kau lihat lah karang, siapo nang duduk di sabolah kanan nang Mahakuaso datang dari awan-awan langit." ⁶³ Di koyakkan imam bosar tu baju-NYA, kata-NYO,"Tak porlu lagi kito saksi? ⁶⁴ Udah samuo kalean mandongar kajolean-NYO, "kito apokan lah DIO ni" samuo tu, maminta hukuman nyo hukuman mati. ⁶⁵ Banyak orang ondak maludahi DIO, marondokkan mukonyo, manumbuk-NYO dan bacakap ka DIO, tunjukkan lah kahebatan KAU!, Habis tu, para panjago manarek dan manampar-NYO. ⁶⁶ Pas Petrus masih di halaman rumah imam tu, datanglah pelayan imam tu. ⁶⁷ Manengok Petrus lagi manghangatkan badan nyo, dicakapi pelayan tu lah dio, "kau jugo ikut samo Yesus orang Nazaret tu kan?" ⁶⁸ Pas tu si Petrus manyanggah-NYO dan bacakap, "tak paham dan tak tau aku jang, ntah apo-apo nang kau bilangkan ni."Habis tu, pogi lah dio ka pintu gorbang dan tibo-tobi ayam jantan bakokok. ⁶⁹ Ditengok pambantu perempuan nang di Bait Allah tu lah lagi si Petrus, "Abah, kau kan tarmasuk dari kalompok orang tu jugo kan? ⁷⁰ Petrus torus manyanggah nyo, tak lamo basolang, orang-orang nang togak tu bacakap balek ka si Petrus, "Botul ko tak konal DIO? satau ku, kau basamo-samo dari Galilea kan?" ⁷¹ Mulai lah si Petrus mangutuki dan manyumpahi, "Tak ku konal orang nang kalean cakap kan tu." ⁷² Bakokok lah ayam jantan kaduo kalinyo, taringat lah si Petrus dengan cakap Yesus, "Sabolum ayam jantan bakokok dua kali, pasti kau sanggah AKU tigo kale." Lalu, Petrus tak sanggup manahan tangis nyo.