¹ dan pas orang tu hampir tibo di Yerusalem, dokat Betfage dan Betania, di bukit Zaitun disuruh Yesus lah kaduo murid-NYO itu ² dan dibilangkan-NYO samo murid-Nyo kek gini, "cak pogi dulu kamu ka desa nang di dopan kamu tu, kalok sudah sampe kamu, karang kamu tengoklah ado tatambat di sano seekor kalodei mudo, jadi kelode tu bolum pornah di pakek orang. Nah, kalian bawaklah kalodei tu kasinin. ³ Jadi, kalok di togur orang kamu karang, 'abah, mangapo pulak kamu ambek kalode tu?' bilangkan sajo kadio, 'Karang dibalekkannyo lagi, ondak di pake sabontar samo Tuhan.'" ⁴ Jadi, pogi lah orang tu dan jumpo orangtu lah seekor kalode mudo nang tarikat di pintu pas diluar, di jalan, torus dilopaskan orang tu. ⁵ Di togur lah orang tu samo orang-orang yang lagi togak disanan, "abah, mangapo pulak kalian lopaskan kalode tu?" ⁶ mak, dijolaskan orangtu pulaklah samo nang batanyo tu, porsis samo dengan yang di jolaskan Yesus ka orang tu, terakhir, di pabiar orang nang batanyo tu lah pogi murid-murid Yesus. ⁷ Torus tu, dikasikan orang tu lah kalode tu samo Yesus, ditarokan orang tu pakaian panjang di kalode tu, dan duduklah Yesus diatasnyo ⁸ di bontangkan orang tu jugo rame-rame pakaian panjang di tongah jalan, ranting-ranting pun di serakkan orangtu jugo yang di potong orang tu dari ladang. ⁹ Batariak-tariaklah orang-orang nang mangekori dan yang di dopan-NYO sambil mambilang, "Hosana! Di upah-upahilah DIO nang datang dalam namo Tuhan. ¹⁰ Diupah-upahilah datangnyo kerajaan Daud, laluhur kito! Hosana, ditompat tartinggi!" ¹¹ Habis tu, masuk lah Yesus ka Yerusalem dan ka bait Allah. Dan pas ditengok-tengok-NYO samuo di sakitar-NYO, lantaran sudah mulai sonjo, jadi pogi lah DIO samo murid-murid-NYO ka Betania. (Yesus Manyumpahi Pokok Ara) ¹² Dan hari besoknyo mulai lah Yesus kalaparan, pas maninggalkan Betania. ¹³ Pas dilihat-NYO ada pohon ara nang lobat daunnyo, korno sor kale Yesus ondak mamakan buahnyo, pogi lah dio manengoknyo, antah ado nyo buahnyo. Udah tu, pas sampe ka pohon tu, ruponyo tak ado pulak lah satupun buahnyo ambalan daunnyo sajo nang lobat, bah iyalah pulak bukan musimnyo. ¹⁴ Itulah pasalnyo, lanjar di kutuk Yesuslah pohon ara tu, "Janganlah ado ondaknyo lagi nang mamakan buah kau ni sampe satorusnyo, dan didongari murid-murid-NYA lah itu. ¹⁵ Pas tibolah orang tu di Yerusalem. Dan langsung diusir-NYO lah orang nang badagang tu samuo di bait Allah tu. Dihompaskan-NYO lah meja-meja samo kursi-kursi orang nan manjual burung-burung merpati dan panukar uang, ¹⁶ Tak dikasih-NYO lah lagi orang-orang tu mankinting barang-barang manyaborangi Bait Allah. ¹⁷ Habis tu diajar Yesus lah orang tu dan bacakap lah macam ni, "kan ado tatulis, kalok Rumah-KU tu dinamokan Rumah Badoa samuo Bangso, mangapo pulaklah kalian ubah-ubah Bait Allah jadi tompat badagang. ¹⁸ Pas didongar Imam-imam kapalo dan ahli-ahli taurat tu lanjar mancari colah lah orang tu ondak mambunuh-NYO. Karono sankinkan ramenyo orang yang salut samo DIO karono caramah-NYO, jadi sogan lah orang-orang nang ondak mambunuh tadi. ¹⁹ Pas malam tibo, Yesus dan murid-murid-NYO pun pogi dari kota tu ²⁰ Di pagi nyo itu, pas lewat orang tu, tatengok orang tu lah ado pohon ara nang koring sampe ka akar-akar nyo. ²¹ Jadi taringotlah Petrus samo cakap Yesus waktu tu, "Amak jang, cak Rabi tengok dulu pohon ara nang KAU kutuk tu, dah mati sakarang jang!" ²² Torus, bacakplah Yesus ka orang tu, "Punyoilah kayakinan ondaknyo di dalam Allah. ²³ Inilah cakap-KU nang samotan-motannyo, siapo sajo nang bacakap ka gunung nin, tarangkat dan tacampak lah kalaut,'yakinlah awak pasti tacampak gunung tu ka laut, tapi harus yakin yo. ²⁴ Nah, KU bilangkan lah ni ka kamu yo, jadi kalok kalian maminta dan kalian doakan, antah apapun itu, harus yakinlah pulak awak kalok samuonyo itu sudah kau trimo, yakinlah, pasti kajadian lah itu. ²⁵ Bilo ondak badoa kau, ko ampuni lah sakironyo orang nang babuat salah samo ko tu, bak AYAH ko nang di Surgo tu pun mangampuni kasalah ko tu jugo. ²⁶ bah, jadi kalo tak ondak ko mamaafkan orang tu, Camano lah AYAH ko nang di surga ondak mangampuni kau jugo." ²⁷ Pas imam-imam kapalo, ahli-ahli taurat dan tuo-tuo nang ado di Yahudi datang ka Yerusalem ondak manjumpoi DIO, padahal Yesus ondak ka Bait Allah. ²⁸ Batanyo lah orang tu samo DIO, "aponyo dayo nan KAU pakek untuk mambikin pakaro-pakaro tu, antah adonyo nang mambagikan dayo ni ka KAU? ²⁹ Bacakap pulak lah Yesus ka orang tu, KU tanyo lah dulu samo kau, ko jawab karang yo, bak KU kasih tau samo kau, kuaso dayo apo nang kupake sakarang ni. manurut kau lah, dari manolah kuaso dayo si Yohanes mambaptis, dari manusio ato dari surgo? cak lah ko jawab dulu!" ³¹ Babisik-bisik lah orang tu, dibilang nyo, "bah, sompat kito bilang dari Surgo, pasti DIO pun manjawab, 'kenapo pulak kalean tak yakin samo dio?' ³² kalok sompat kito jawab, 'dari manusio'?" jadi katakutan pamimpin tu samo orang-orang nang hadir disitun, korno pamimpin tu sadar kalo si Yohanes tu memang botul-botul Nabi. ³³ Itulah mangkonyo orang tu manjawab Yesus, "Tak tau kami jang." dijawab Yesus pulak lah ka orang tu, "Aku pun tak tau, Takkan ondak KU kasih tau antah dari manonyo kuaso dayo nang KU pake tu untuk bapakaro."