¹ Dahin, Jisus nahari ngajar uak ha bahe' danau. Pehengkung na pehilat Jisus kelunaan ngahum alang araa' na tayaa' sehingga Hia' mu'un ha halam haruk dajin melok ha husun danau. Jiarun anaan, kelunaan ngahum anaan te' ha tanaa', ha bahe' danau. ² Dahin, Hia' ngajar daha' tentang kahum hal dahin perumpamaan-perumpamaan. Halam ajaran-Na, Hia' duaan ha daha'. ³ "Kering! Te' kelunaan penabur alang leka' sang muraah. ⁴ Maka naa' na, teguu' hia' tengaah muraah, te' kuri beni' legaak ha balaan alaan, dahin manuk-manuk atang, au hiti' kumaan ina'. ⁵ Sebagian legaak ha husun tanaa' alang ngebato' alang jaan kahum tanaa' na. Beni' anaan temoh tubu' dahin saring kenaan tanaa' na jaan dalam. ⁶ Teguu' mataan do makin bo, tuvu anaan tutung au hiti' kenaan jaan hipun pakaat, tuvu anaan jadi megaang. ⁷ Debale legaak ha beluaa'-beluaa' talun alang nge'ulang. Au hiti' talun nge'ulang tubu' dahin medit tuvu anaan atang na mate, dahin tuvu anaan jaan mai buaa'. ⁸ Namun, debale legaak ha tanaa' alang sayuu', tubu', dahin tayaa', serta menghasilkan telog pulu' kali lipat, enaam pulu' kali lipat, dahin matu' kali lipat." ⁹ Au hiti', Jisus duaan, "Hi alang hipun apang alang hamaan ngering, hembe ma hia' ngering!" ¹⁰ Teguu' do Jisus dap, kelunaan alang ha tebeh Hia', pejii dahin pulu' dua rasul, metang ha Hia' tentang perumpamaan-perumpamaan anaan. ¹¹ Au hiti', Hia' nyuee daha', "Rahasia Umaa' Tipang au an d' aii man ika'. Tapi, ha kelunaan-kelunaan bale, putung ha d' sampaikan halam perumpamaan-perumpamaan, ¹² jung, 'Meskipun hamaan lemnang, daha' lemnang dahin jaan jaam; dahin meskipun hamaan ngering dahin jaan memahami. jung daha' jaan betobat dahin d' aii apon." ¹³ Au hiti' Jisus duaan ha daha' "Jaan ka ika' jaam perumpamaan ani'? Nuno tun p'lo hamaan jaam lim perumpamaan anaan? ¹⁴ Alang murah anaan murah firman. ¹⁵ Daha' anaan kelunaan-kelunaan alang legaak ha bahe' alaan, nayaan firman anaan d' urah. Teguu' daha' ngering, dahin saring na Iblis atang temoh alaa' firman alang d' urah ha daha'. ¹⁶ Nunaan pa, daha' alang murah ha tanaa' ngebato' anaan kelunaan-kelunaan alang ngering firman dahin temoh nerima ina' dahin sukacita. ¹⁷ Tapi, daha' jaan ngepakaat ha halam diri na dap dahin hanya betahan aki. Au hiti', teguu' atang peraah atau penganiayaan. ¹⁸ Au hiti', bale na naan alang legaak ha halam talun ngeulang. Daha' naan kelunaan-kelunaan alang ngering firman, ¹⁹ tapi tegaah ha dania, dahin hawa nafsu t' kekayaan, dahin keinginan-keinginan t' hal-hal bale mutaam t' haang firman anaan dahin medit ina' sehingga hia' jaan te' buaa'. ²⁰ Tapi daha' alang d' urah ha tanaa' alang sayuu' naan daha' alang ngering firman, nerima ina', dahin ngehasil buaa', telog puluu kali lipat, nam pulu kali lipat, dahin matuu kali lipat." ²¹ Au hiti', Jisus duaan ha daha', "Jaan ka perita? ²² Sebab, jaan te' alang alang d' huk alang jaan d' gii. Nuti pa, jaan te' huk nun pun kenaan hal anaan sang d' nyatakan. ²³ Ha' te' kelunaan alang hipun apang sang ngering, hembe na hia' ngering!" ²⁴ Au hiti', Jisus duaan ha daha', "Lemnang na nun alang im kering. Ukuran alang im tek sang d' ukur ha ika', dahin masih te' uak alang sang d' tambah ha ika'. ²⁵ Kenaan hi alang hipun, hia' sang d' aii uak, tapi hi alang jaan hipun, nun lim pa alang te' ha hia' sang d' alaa' man hia'." ²⁶ Au hiti', Jisus duaan, "Umaa' Tipang anaan nekelung kelunaan alang murah beni' ha tanaa'. ²⁷ Alang murah anaan tudu au jiti' maur ngetdo dahin malam, dahin beni' anaan musaang tunas dahin tubu'. Alang murah anaan jaan jaam nuno tun hamaan naa'. ²⁸ Tanaa' anaan ngehasil buaa' dap. Tahari tunas, au hiti' bulir na, au hiti' uank-uank gandum ha halam bulir anaan. ²⁹ Teguu' uank-uank gandum anaan saak, kelunaan anaan temoh munaang ina' kenaan juk panen sang nahari." ³⁰ Au hiti', Jisus duaan, "Dahin nun ta' hamaan membandingkan Umaa' Tipang? Atau, dahin perumpamaan nun ka ita' hamaan membandingkan ina'? ³¹ Umaa' Tipang anaan nekelung uank sesawi alang d' urah ha tanaa', walaupun uank anaan naan uank alang paling tu'uk man lim uank alang ha bumi, ³² tapi teguu' d' urah, uank anaan sang tubu' tayaa' man lim tuvu ha kebon, dahin musaang cabang alang tayaa' sehingga manuk-manuk ha langit hamaan naa' halah ha idaak naungan na." ³³ Dahin metek kahum perumpamaan nekekung anaanm Jisus pedengaah firman man daha', sesuai dahin alang hamaan daha' ngering. ³⁴ Hia' jaan kalaak duaan ha daha' tanpa perumpamaan, tapi Hia' jelaskan lim ina' pah dap man d' murid-murid-Na. ³⁵ Dahin, teguu' do anaan, teguu' au levi Jisus duaan dahin d' murid-murid-Na, "Te nah ita' leka' ha dipah hunge." ³⁶ Au melaak kelunaan ngahum anaan, daha' gerii Jisus peji dahin daha' mutaam halam haruk nayaan Jisus te'. Dahin, haruk-haruk bale na peji dahin-Na. ³⁷ Au hiti', naa' na dii ayaa' alang bahi' dahin lupaak ayaa' megaak haruk sehingga haruk pun penu kenaan ata'. ³⁸ Tapi, Jisua te' ha buritan kapal, tudu' ha husun helan. Maka, daha' megoh-Hia', au hiti' duaan dahin-Na, "Guru, nun jaan kah Ika' peduli ha' ita' mate?" ³⁹ Au hiti', Jisus maur temoh heleh dii, au hiti' duaan dahin laut, "Ngeraam! Tenaang na!" Maka, dii anaan ngeraam dahin jadi tenaang pate. ⁴⁰ Au hiti', Hia' duaan ha daha', "Na nun pa ika' takut? Nun jaan pa ika' hopun iman?" ⁴¹ Daha' jadi takut pate au hiti' duaan dahin ji dahin alang bale, "Hi Hia' ni? Bahkan ba'hi ayaa' dahin laut tuaa' taat dahin-Na!"