¹ Kant, tengkalo Anak Domba mbukok segel yo ketuju, ado kesunyiant di surgo kiro-kiro setongah jam lambet'a. ² Kant, aku ngenongant ketuju malekat yo bediri di adopant Allah, kant ketuju trompet diborik'a ka sidok. ³ Lalu malekat laint d'tank kant bediri di altar, ngemijab sebuah pedupaant omas; kant kepado'a diborikant b'nyak dupa 'ntuk dipesembahkant besamo doa-doa urank-urank kudus di atas altar omas yo di adopant takhta nyint. ⁴ Kant, ansap dupa nyint besamo 'ngant doa-doa urank-urank kudus, nait keadopant Allah derik jeri malekat nyint. ⁵ Lalu, malekat nyint ngambik pedupaant kant ngisi'ik 'ngant api yo diambik derik altar kant ngelemparkan'a ke bumi; mako tedingo'a bunyi guntur yo disertai kilat kant gompa bumi. ⁶ Sedah nyint, tujuh malekat yo ngemijab tujuh trompet nyint besiap-siap 'ntuk ngeniup trompet sidok. ⁷ Malekat petamo ngeniup trompet'a, mako tejedi'a hujan es kant api becampuk derah; kant ditumpahkant di atas bumi, mako tebakar'a sepertigo bumi kant sepertigo pepohonant kant tebekar'a semuo rumput hijau. ⁸ Malekat keduok ngeniup trompet'a, mako sesuatu tokuh gununk yo tebakar api dilemparkan ke d'lom laut; sepertigo derik laut nyedi derah, ⁹ mako sepertigo derik makhluk yo beado di laut kant yo idop nyedi mati, kant sepertigo derik kapal diancurkant. ¹⁰ Malekat ketigo niup trompet'a, mako jetuh'a derik langit sutik bintangk bosar, ngenyalok tokuh obor, kant bintank nyint nimpok sepertigo derik sungai kant mato aik. ¹¹ Demo bintank nyint adolah Apsintus. Mako, sepertigo derik aik nyedi apsintus kant b'nyak urank mati dongah aik nyint, dongah aik nyint dah nyedi pait. ¹² Malaekat keompat niup trompet'a, mako tepukulah sepertigo matoari, sepertigo bulent, kant sepertigo bintank sehinggo sepertigo derik sidok nyedi golap, kant sepertigo siank ari nyedi golap kant piok gak'am pado malom ari. ¹³ Lalu, aku ngenongant kant ngedingo seikuk burunk rajowali torbank di tongah-tongah lengit, bekato 'ngant suaro nyarink,"Celako, celako, celako'a sidok yo diom di bumi dongah bunyi trompet ketigo malekat lain yo gik 'kant ditiup."