¹ Dongah nyin, saudero-sauderoku yo akunkasih'ik kan aku tegonangkan, yo njedi sukocito kan kebanggan aku, badiri'ak ngan toguh d'lom Doto. ² Aku sungguh memohon kepado Euodia kan kepado Sintikhe gak'am ntuk idup damai d'lom Doto. ³ Yo, aku mintok kepado ikau, kawan-kawan b'et aku, tulong'am tinok-tinok tuk dongah sidok dah bekrejo koras basamo aku demi pelayanan Injil, basamo klemens gak,am kan kawan-kawan sekrejo aku yo lain, yo demo-demo'a tetulis d'lom buku kaidupan. ⁴ Basukocito'ak mogel d'lom Doto. Sekali gik aku padahkan, basukocito'ak! ⁵ Ronak'am kalombutan ati kau diketau'ik semuo urang. Doto udah somak. ⁶ Nang'ak kuater tontang ope pun gak'am. Mulom piok i, d'lom segelo hal nyatokan kemaok kau kepado Allah d'lom doa kan pemohonan sreto ucapan syukur. ⁷ Damai sejahtera Allah yo ngelampauik segelo pengeretian akan meliharo ati kan pikeran kau d'lom Yesus Kristus. ⁸ Akir'a, saudero-saudero, samuo yo b'nar, semuo yo mulio, samuo yo adil, samuo yo suci, samuo yo j'ngak samuo yo tapuji, samuo yo sempreno, samuo yo pantas dipuji, piker'ak samuo'a nyin. ⁹ Ope yo udah kau pelejerik, tarimok, dingo, kan tongan drik aku, kerejo kan'am samuo'a nyin, mako Allah asal damai sejatera akan nyeretoik ikau. ¹⁰ Aku sungguh basukocito d'lom Doto dongah sampai tuk, akir'a ikau mborikkan agik paratian kau ka aku. Memang, sabolom'a ikau mborik paratian ka aku, tapi ikau com d'pat kesompatan. ¹¹ Aku ngatokan hal tuk kan'a dongah aku tongah kekurangan, sebob aku dah belejer ncukupkan dirik d'lom keadaan ope pun. ¹² Aku tau ope reti'a kekurangan, kan aku tau gak am ope reti,a kelimpahan. D'lom segelo kan setiap keadaan, aku dah belejer rahasia idup bakacukupan, opekah ngan konyang atau lapar, opekah idup b'nyak duit atau com ado duit. ¹³ Aku d'pat ngerejokan segelo hal ngelalu Io yo mborik kekuatan ka aku. ¹⁴ Mulom piok i, kau dah babuet b'et ndak bebegi beben kan aku. ¹⁵ Ikau surang tau, umat Filipi, dongah waktu awal patamo pelayanan Injil, abis nyin aku pogi ninggelkan daerah Makedonia, com ado umat yo ndak bebegi beben kan aku d'lom hal mborik kan nerimok, kecuali ikau. ¹⁶ Bahkan, tengkalo dikota Tesalonika, ikau ngirum bantuan ntuk kepreluan ku lobih d'rik sekali. ¹⁷ Mulom piok, kan'a bentuan nyin yo aku gogok, ngelainkan aku ngogok buah yo ntuk ngembosar keuntungan kau. ¹⁸ Aku dah nrimok pembeyeran ponuh, bahkan lobih. Aku ndepat samuo yo aku prelu dongah pemborik'an yo ikau kirum ka aku ngelalu'ik Epafroditus. Pemborik'an kau nyin njedi pesembahan yo harum, kurban yo bekenan, kan nyenangkan Allah. ¹⁹ Allah aku kan mamonuh'ik segelo kepreluan kau manurut kakayoan-A yo mulia d'lom Yesus Kristus. ²⁰ Kemuliaan b'gi Allah kan Apak kito ntuk selamo-lamo,a. Amin. ²¹ Begi'am salam kami kak setiap urang kudus d'lom Yesus Kristus. Salam ntuk kau d'rik saudero-saudero seiman yo ado basamo kan aku dituk. ²² Samuo urang kudus ngirum salam ntuk kau, khusus'a sidok yo bekrejo ngelayan'ik di istana Kaisar. ²³ Anugrah d'rik Doto Yesus Kristus nyereto'ik roh kau. Amin.