¹ Pado suatu ari Sabat, Yesus d'tang ke'umah salah seurank pemimpin urank-urank Farisi ntuk makan roti besamo'a kant sidok semuo ngawas'ik Yesus. ² Saat nyin, ado seurank yo ndrito busung aik di adopan Yesus. ³ Yesus bekato kepado urank-urank Farisi kant ahli-ahli Taurat, "Opekah d'pat nyombuhkan urank pado Ari Sabat?" ⁴ Akan tetapi, sidok com njawab Yesus. lalu, Yesus pun mijab urank sakit nyin kant nyombuhkan'a, lalu nyuruh urank nyin pogi. ⁵ Yesus bekato kepado sidok, "Sopeikah d'rik antaro kulok yo mun anak'a atau sapi jantan'a j'tuk ke d'lom sumur pado ari Sabat, com segera narik'a ke luar?" ⁶ Mako, sidok pun com d'pat mbantah pekatoan Yesus. ⁷ Lalu, Yesus nceritokan sebuah perumpamaan kepado tamu-tamu undangan tengkalo Io nongan koti sidok milih tempat-tempat duduk yo tehormat di sekitar meja makan, kato Yesus ka sidok, ⁸ "Mun ikau di undang tam seseurank ke sebuah pesta kawin, nang'ak ikau duduk di tempat kehormatan dongah tuan umah nyin mungkin dah ngundang urank yo lobih tekemuka d'rik kau. ⁹ Lalu, tuan umah nyin nd'tang'ik kau kant bekato, 'Borikan'ak tempat kau kepado urank tuk!' Kant, ikau pun cak pindah ke tempat yo paling rendah ngan ngeraso malu. ¹⁰ Namun, opebilo ikau diundang, duduk'ak di tempat yo paling blekang supayo tengkalo yo ngundang ikau d'tang, io akan bekato kepado kau, 'Sahabat pindah'ak ke tempat yo lobih tehormat.' ngan piok, ikau akan nd'pat penghormatan di adopan urank-urank yo duduk makan besamo ngan kau. ¹¹ Dongah, semuo urank yo ninggikkan diri'a akan direndahkan, tapi io yo merendahkan diri'a akan di tinggikkan." ¹² Lalu, Yesud bekato kepado urank yo ngundang-A nyin, "Mun ikau ngadokan jamuan makan siang atau makan malam, nang ngundang kawan-kawan, saudero-saudero, kaum keluarga, atau tetanggok kau yo kayo dongah sidok akan mbeles kau ngan ngundang kau ntuk makan besamo sidok. ¹³ Akan tetapi,mun ikau ngadokan pesta, undang'ak urank-urank miskin, urank-urank cacat, urank-urank lumpuh, kan urank-urank butok. ¹⁴ Kant, ikau akan diberkat'ik dongah urank-urank tuk com d'pat mb'les kau gik; ikau akan d'pat b'lesan'a pado waktu kebengkitan urank-urank b'nar." ¹⁵ Tengkalo salah seurank yo makan besamo Yesus ningo pekatoan-pekatoan tuk, urank nyin bekato kepado-A, "Diberkati'ak urank yo akan makan roti di d'lom Kerajaan Allah." ¹⁶ Akan tetapi, kato Yesus kepado urank nyin, "Ado seurank yo ngadokan jamuan makan malam yo bosar kant io ngundang b'nyak urank, ¹⁷ Kant tengkalo waktu makan malam dah d'tang, urank nyin nyuruh hamba'a untuk bekato kepado b'lo tamu yo dah di undang nyin, 'D'tang'ak, dongah semuo'a dah siap.' ¹⁸ Tapi, semuo tamu undangan nyin mulai mulah alasan-alasan. Urank petamo bekato, 'Aku b'ruk moli sebuah lakau kant aku cak pogi nongan'a. Terimok'ak pemintok'an maafku.' ¹⁹ Yo lain bekato, 'Aku b'ruk mboli limok pasang sapi kant aku cak pogi ntuk meriksa sapi-sapi nyin. Terimok'ak pemintok'an maaf ku.' ²⁰ Sementaro yo lain gik bekato, 'Aku b'ruk gak kawin. Dongah nyin, tuk aku com d'pat d'tang.' ²¹ Lalu, pelayan nyin pun pulang kant ngelaporkan semuo'a kepado tuan'a. Mako, majikan'a nyin j'di godik, lelu bekato kepado pelayan'a, 'Copat'ak! Pogi ke j'len-j'len kant setiap gang di kota tuk. Beik'ak kepado aku urank-urank miskin, urank-urank lumpuh, urank-urank pincang, kant urank-urank butok.' ²² Lelu, pelayan nyin bekato kepado'a, 'Tuan, aku dah ngelakukan ope yo ikau perintahkan, tapi gik ado tempat kosong.' ²³ Tuan nyin bekato kepado pelayan'a, 'Pogi'ak ke j'len-j'len raya kant setiap gang. Ajak'ak urank-urank di nun ntuk d'tang kituk supayo umah aku j'di ponuh. ²⁴ Aku bekato kepado kau, com seurank pun d'rik sidok yo aku undang sebolom'a nyin akan nikmat'ik makanan sajianku."' ²⁵ B'nyak urank bej'len besamo-samo ngan Yesus. Lalu Yesus ngelingak kepado sidok kan bekato, ²⁶ "Mun seseurank d'tang kepado Aku tapi com mboncik apak kan umak'a, bini kan anak-anak'a, adik beredik laki-laki kant adik beredik tinok'a, bahkan idup'a surank, io com d'pat j'di murid-Ku. ²⁷ Sopepun yo com mikol salib'a kant nuntut'ik Aku, io com d'pat j'di murid-Ku. ²⁸ Sopekah diantaro ikau yo ndak ndirikan sebuah menara, tapi com duduk telobih doluk kant ngitung biayo ntuk ngetau'ik opekah io ado cukup duit ntuk nyelesaikan'a? ²⁹ Mun com tokuh nyin, tengkalo io ngeletakkan fondasi kant com sanggup nyelesaikan'a, semuo urank yo nongan'a akan ngenaokkan io. ³⁰ Urang-urang nyin akan bekato, 'Urank tuk mulai mbangun, tapi io com sanggup nyelesaikan'a.' ³¹ Atau, rajo mone yo akan pogi beperang ngelawan rajo lain tapi com duduk telobih doluk kant mpertimbangkan ope io besamo 10.000 tentara'a d'pat ngelawan musuh'a yo ado 20.000 tentara? ³² Mun io com d'pat ngalahkan rajo lain nyin, io akan ngirim seurank utusan kant nanyokkan syarat-syarat pedamaian tengkalo pasukan lawan'a nyin gik jeuh. ³³ Piok gam ngan ikau mansing-mansing, com ado seurank pun di antaro kau yo d'pat j'di murid-Ku mun io com nyerahkan seluruh wak io." ³⁴ "Gerom nyin b'et, tapi mun gerom nyin dah losi raso mansin'a, koti mulah'a mansin gik? ³⁵ Gerom nyin bahkan com gik d'pat di gunokan ntuk lakau atau pupuk sampai urank mbuang'a. Sopei yo ado kelindang ntuk ningo, ronak'ak io nongo!"