¹ Hai urank-urank kayo, dingo am! Nangis kan meratap'ak ntuk penderitoan yo akan nimpak kau. ² Kekayoan kau dah busuk kant pakaian kau dimakan ngengat. ³ Emas kant perak kau dah bekarat, kant karat nyin akan nj'di bukti yo mboretkan kau serto akan makan degin kau tokuh api. Ikau dah nimbun harta pado ari-ari terahir. ⁴ Dingo'ak, upah b'lo pekrejo yo ngolah lakau kau, yo ikau tahan ngan kecurangan, beteriok ngelawan kau. Kant, teriok'an b'lo pemanen'a dah sampai kekelindang Doto semesta alam. ⁵ Ikau dah idup di bumi d'lom kemewahan kant kesenangan dirik surank, ikau dah ngemukkan ati kau pado ari penyembolehan. ⁶ Ikau dah ngukum kan mbunuh urank benar, kan io com ngelawan kau. ⁷ Tam dongah nyin, saudero-sauderoku, besabar'ak sampai pado ari kedetangan Doto. Tongan'ak koti petani nunggukkan buah teb'et yo dihaselkan tanah, nungguk'ik ngan saber sampai d'tang'a ujen awal kant ujen terakhir. ⁸ Ikau pun cak besabar, kuatkan ati kau dongah ked'tangan Doto dah somak. ⁹ Saudero-sauderoku, nang'ak ikau besungut-sungut sutik ngan yo lain supayo ikau com diukum. Tongan'ak, Sang Hakim dah bediri di depan pintu. ¹⁰ Saudero-sauderoku, sebegei teladan penderitoan kant kesaberan, tongan'ak b'lo nabi yo bebicaro d'lom nemo Doto. ¹¹ Kami nganggop bebahagia sidok yo tabah. Ikau dah ningo ketabahan Ayub kant nongan maksud Doto pado ahir'a, bahwa Doto nyin ponuh belas kasih kant murah ati. ¹² Akan tetapi, saudero-sauderoku, di atas semuo'a nyin, nang'ak ikau besumpah, b'et demi langit, bumi, atau demi pei pun. Katokan"Auk" mun auk kant "Com" mun com supayo ikau com dij'tuk'ik ukuman. ¹³ Opekah di antaro ikau ado yo gik mendrito? Pus pom io bedoa. Peikah ado yo gik besukocito? Pus pom io nyanyikan Mazmur. ¹⁴ Opekah diantaro ikau ado yo gik sakit? Pus pom io nyakau tuo-tuo jemaat kant sidok cak ndoakan'a, ngurap'ik'a pakai minyak d'lom nemo Doto. ¹⁵ Doa yo dinaitkan d'lom iman akan nyelamatkan urank yo sakit nyin kan Doto akan mbangunkan'a. Kant, mun io dah ngelakukan dosa-dosa , io akan diampun'ik. ¹⁶ Dongah nyin, ndak'ak ikau saling ngakuk dosa kau kant saling ndoakan supayo ikau sembuh. Doa urank benar yo dinaitkan ngan sungguh-sungguh, sangat bosar kuaso'a. ¹⁷ Elia te ensio beso tokuh kito. Io bedoa ngan sungguh-sungguh supayo com turun ujen, kant ujen com turun di negri nyin selambet tigo taun enam bulen. ¹⁸ Lalu, io bedoa gik, mako langit ncurahkan ujen kant bumi numbuhkan buah'a. ¹⁹ Saudero-sauderoku, seandai'a ado diantaro ikau yo nyimpang d'rik kebenaran, lalu ado urang yo nulung'a bebelik, ²⁰ ketau'ik'ak bahwa urang yo mbeik urang bedosa balik ke j'len yo benar akan nyelamatkan jiwo urang nyin d'ri kematian kant nutup'ik b'nyak dosa.