¹ Dongah nyin, ayok kito ningelkan pengajeran dasar tontang Kristus kant melangkah kepado kedewasaan, com agik ngulang-ulang ajeran dasar tontang petobatan d'ri pebuetan yo mati kant iman kepado Allah; ² Ajeran tontang pembasuhan kant penumpangan tangan; ajeran tontang kebengkitan urang mati kant ukuman kekal. ³ Kant, nyin'ak yo akan kito lakukan, mun Allah ngijinkan'a. ⁴ Sebab, com mungkin petobetkan belik urang-urang yo sebolom'a uda nd'pat pencerahan, udah ngerasokan karunia surgawi, udah ngamik b'gian besamo Roh kudus, ⁵ ngaso'ik ke'b'et'an firman Allah, kan ngrasokan kuaso d'ri dunio yo akan d'tang. ⁶ Mun sidok ninggelkan j'len Kristus, mako mustahil ntuk mperbaharu'ik belik petobetan sidok dongah sidok gik nyalibkan Anak Allah ntuk keduok kali'a kant mpermalukan-A secaro tebukok. ⁷ Sebob, tanah yo nyerap b'nyak aik ujen yo j'tuk ke atas'a, serto ngaselkan panenan yo bemanfaat b'gi sidok yo ngarap'a, akan nrimok berkat d'ri Allah. ⁸ Tapi, mun tanah nyin engkah numbuhkan durik kant semak-semak, mako tanah nyin com baguno kant somak ngan kutuk, kant pado akhir di cucol api. ⁹ Tapi'a, saudero-suderoku yo aku kasih'ik, sekalipun kami bakato-kato piok, kami yakin'ik hal-hal yo lobih b'et tontang ikau, yonyin hal-hal yo behubungan ngan keslamatan. ¹⁰ Sebob, Allah kan'a com adel. Io com ngelupokan semuo pekrejoan kant kasih kau yo ikau tunjukkan demi demo-A ngan ngelayan'ik urang-urang kudus tokuh yo mansih ikau lakukan. ¹¹ Kami tagonang mansing-mansing ikau nunjukkan ketekunan yo samo ntuk punya'ik jaminan pengharapan yo sempurno sampai akhir, ¹² supayo ikau nang j'di malas, tetapi nundok'ik teladan urang- urang yo udah waris'ik jenji-jenji Allah nglalu'ik iman kant ketekunan. ¹³ Tengkalo Allah bejenji kepado Abraham, Io bejenji atas dirik-A surang dongah com ado yo lobih bosar d'ripado dirik-A. ¹⁴ Allah bakato, "Aku pasti akan mberkat'ik kau," kant "Aku pasti akan melipatgandakan keturunan kau." ¹⁵ Kant, udah nunggukan ngan saber, Abraham nrimok jenji nyin. ¹⁶ Ensio basumpah demi seurang yo lobih bosar d'ripado dirik'a surang, kant sumpah diborikan sebegei penegas ntuk ngakhir'ik semuo pebantahan. ¹⁷ J'di waktu Allah ndak nunjukkan ngan lobih yakinkan kepado ahli waris jenji-A bahwa tujuan-A com akan beubah, io njamin ngan mulah sumpah ¹⁸ sehinggo ngan duok hal yo com d'pat beubah nyin, yo ngonok'ik Allah mustahil mbulok, kito yo d'tang ngogok pelindung akan nd'patkan dorongan yo bosar ntuk bepijab toguh pado pengharopan yo di borikkan kepado.kito. ¹⁹ Pengaropan yo kito milik'ik tuk te jangkar b'gi jiwo kito, kuat kant pasti, yo nombus mansuk sampai ke belik tirai, ²⁰ ke tompat yo udah dimansuk'ik Yesus sebegei pembukok j'len b'gi kito ntuk nj'di Imam Bosar ntuk selamo-lamo'a sesuai kan peraturan Melkisedek.