¹ Hei saudero-saudero, mun ado urank yo ketauan ngulah pelanggaran, ikau yo rohani arus mulank kan urank yo tokuh nyin khan roh lomahlemut. bejego-jegogam supayokau surank nang jedi tegoda. ² Salink tuluklah delom nangguk beban supayo ikau naatik ukum Kristus. ³ Mun ado urank yo nganggap dirik'a pentink, padahal com tokuh nyin, io nipu dirik'a surank. ⁴ Ayoklah setiop urank nguji pempulah'a surank. Udah nyin, io depat banggo nongan keadoan surank kan bukan bukan maninkkan'a khan urank lain. ⁵ Dongah, setiop urank arus nanggunk beban'a surank. ⁶ Sopei yo depat pengajeran d'rik firman Allah aruslah io membegikan semuo hal yo beit nyin khan urank yo ngaje'a. ⁷ Nang tetipu. Allah com biso dipermainkan dongah urank akan mulai pei yo io tabur. ⁸ Urank yo nabur d'rik nafsu kedaginkan akan nuai kebusukan d'rik kedaginkan'a. Tapi, urank yo nabur d'rik Roh akan nuai idup yo kekal d'rik Roh. ⁹ Nang kito nyedi lomah bebuet beit. Mun musim'a detank, kito akan nuai asalkan kito com nyerah. ¹⁰ Dongah nyin, mun kito napat kesempatan, ayoklah kito berbuet beit kepado semuo urank, khusus'a kepado keluargo delom iman. ¹¹ Tonanam betapa besar'a huruf-huruf yo ku tulis ntukkau khan jeriku surank. ¹² Mako yo ndak ningokan kebeitan d'rik hal-hal yo lahiriah akan maksakau ntuk disunat. Sidok ngelakukan hal nyin supayo com dianiayo demi salib Kristus. ¹³ Sidok yo com di sunat pun com naati Ukum Taurat, tapi sidok endak kau di sunat supayo sidok depat memegahkan dirik atas sunatkau. ¹⁴ Semoga aku com kalok memegahkan dirik kecuali delom salib Doto kito, Yesus Kristus. Ngelalui salib Sien, dunio dah di salibkan ntuk aku, kan aku ntuk dunio. ¹⁵ Disunat atau com di sunat peikah reti'a. yo pentink yakam nyedi ciptaan beru. ¹⁶ Begi semuo urank yo njelenkan aturan tuk, ronakpom damai sejahtra kan rahmat turun atas sidokkan atas Israel wak Allah. ¹⁷ Akir'a, nang ado urank yo mempersulit aku dongah aku meik tando-tando Yesus delom tubuhku. ¹⁸ Saudero-saudero, kiro'a anugrah Doto Yesus Kristus ado besamo khan rohkau. Amin.