¹ Udah diputuskan bahwo kami akan belayar ke Italia, sidok nyorahkan Paulus kan beberopei tahanan lain ka seurank perwiro pasukan Agustan, yo bedemo Yulius. ² Kami nait kapal d'rik Adramitium yo akan segero belayar ke bebegei pelabuhan di sepanjang pantai Asia. Kami belayer di tamah'ik Aristarkhus, urank Makedonia d'rik Tesalonika. ³ Pado ari berikut'a kami tibo di Sidon. Yulius pelakukan Paulus ngan ponuh peratian kan perbolehkan Paulus ngunjung'ik kawan-kawan'a ntuk ngurus keperluan Paulus. ⁴ D'rik nun, kami berengkat kan belayar nyusur'ik Siprus dongah agin betiup belawan arah. ⁵ Dah kami belayar ngelaluik pantai di sepanjang Kilikia kan Pamfilia, kami sampe di Mira di Likia. ⁶ Di nun, perwiro nyin te nomukan kapal d'rik Aleksanderia yo tongah belayar ka Italia, mako io mindahkan kami ke kapal nyin. ⁷ Kami belayar ngan pelan selambet beberopei ari, kan ngan susah payah kami sampe di Knidus. Dongah buok com memungkinkan kami pogi lobih jauh, kami belayar nyusurik pantai Kreta ke arah tanjung Salmone. ⁸ Kami belayar ngelaluik tanjung nyin ngan susah payah kan sampe ke sebuah tompat bedemo Pelabuhan Indah, yo beado di somak kota Lasea. ⁹ Dongah kami tau dah b'nyak waktu yo losi, kan saat nyin, pej'lenan laut nyin bebahayo dongah maso puaso urank Yahudi dah lewat, Paulus nasehatik sidok, ¹⁰ kan bekato ka sidok, " Saudero-saudero, aku nongan bahwo pelayaran tuk akan diseretoik ngan kerusakan kan kerugian bosar, kan'a engkah muatan kan kapal'a, tapi nyawo kito gam." ¹¹ Tapi, perwira nyin lobih pecayok ka nahkoda kan pemilik kapal d'rikpado pekatoan Paulus. ¹² Dongah com b'et diom di pelabuhan nyin selamok musim colap, sebegien besar urank setuju ntuk pogi belayar d'rik nun kan jangan-jangan sidok d'pat ncapai Feniks, sebuah pelabuhan di Kreta, yo nghadop ke arah barat daya kan barat laut, kan diom di nun selamok musim colap. ¹³ Tengkalo angin sepoi-sepoi betiup d'rik selatan, sidok bepikir bahwo akan tecapai tujuan sidok. Dongah nyin, sidok narik jangkar kan belayar di sepanjang pantai Kreta. ¹⁴ Tapi'a, com lambet kemudian, buok tokuh topan, yo di sobut Euroklidon, betiup d'rik pulau nyin. ¹⁵ Tengkalo kapal kami dilanda tam angin nyin kan com sanggup gim nghadapik haluan'a, kami nyorah kan ngeronak kapal kami terombang-ambing. ¹⁶ Sementaro kami begorak nyusurik pulau kocit yo bedemo Kauda, ngan susah payah kami berasel ngendalikan sekoci kapal kami. ¹⁷ Dah awak kapal ngerek sekoci ke atas kapal, sidok ngunakan tali-tali penulunk ntuk nguat'ik kapal nyin. Dongah sidok golak tedampar di betingg Sirtis, sidok nurunkan alat-alat kapal sehinggo ngeronak kapal sidok terombang-ambing. ¹⁸ Pado ari berikut'a, dongah kami di ombang-ambingkan ngan terjangan badai yo sangat hebat, urank-urank mulai muang muatan kapal. ¹⁹ Kan, pado ari yo ketigo, sidok muang alat-alat kapal ngan jeri sidok surank. ²⁰ Dongah matoari ndakpun bintank com muncul selambet beropei ari kan badai yo com kecit yo nerjank kami, lonyapam semuo harapan kami ntuk selamat. ²¹ Dongah b'nyak urank dah sekian lamok com makanan, Paulus bediri di tongah-tongah sidok kan bekato, "Saudero-saudero, seharus'a kulok ningo nasehat aku ngan com belayer d'rik Kreta sehingga ngalamik kerusakan sereto kerugian tokuh tuk. ²² Tapi saat tuk, aku norong kulok ntuk tetap tabah dongah di antaro kau com mado yo akan kelosian nyawo'a, kecuali engkah kelosian kapal. ²³ Dongah, malom tadik, ado malekat Allah, yo milik'ik aku kan yo aku somah, bediri di adop aku, ²⁴ sambel bekato, ' Nang golak, Paulus. Ikau arus bediri di adopan Kaisar. Kan, tongan, Allah dah bemurah ati ka kau kan semuo urank yo belayar besamo kau.' ²⁵ Dongah nyin, Saudero-saudero, tabahkan'am ati kau dongah aku pecayok di d'lom Allah bahwo semuo akan tejedi tokuh yo dah di boriktaukan ka aku. ²⁶ Tapi, kito arus tedampar di sebuah pulau.'' ²⁷ Tapi'a, pado malom keempat belas, sementaro kami gik teombang-ambing di sepanjang Laut Adria, kiro-kiro tongah malom, b'lo awak kapal ngendugo bawho sidok tongah nyomakik deret. ²⁸ Sidok ngulurkan batu duga kan nomukan bahwo kedeloman aik'a duok puluh depa. Tengkalo, sidok maju sikit gik, sidok ngelempar batu duga kan ngetahu'ik kedeloman aik'a limok belas depa. ²⁹ Dongah kami golak akan kandas di b'tu karang, sidok nurunkan empat jangkar d'rik buritan kan bedoa supayo ari segero siank. ³⁰ Tapi'a, sementaro beberopei awak kapal beusaha ntuk ngelarikan dirik d'rik kapal kan dah nurunkan sekoci ke laut ngan kicak-kicak nurunkan jangkar-jangkar d'rik haluan, ³¹ Paulus bekato ke perwiro nyin kan b'lo prajurit'a, " Mun urank-rank nyin com bediom d'lom kapal, ikau com d'pat di selamatkan." ³² Dah nyin, b'lo prajurit nungkung tali sekoci kan ngeronak'a anyut. ³³ Tengkalo hampir pagi, Paulus mintok sidok semuo ntuk ngamik beberopei makanan, ngan bekato, " Ari tuk ari keempat belas ikau torus-menerus beado di d'lom ketegangan kan nahan lapar dongah com makan pei pun. ³⁴ Dongah nyin, aku mintok ka kau ntuk ngamik beberopei makanan demi keselamatan kau. Dongah, com mado sehelai ramut pun yo akan losi d'rik antaro kau." ³⁵ Dah nyampaikan hal nyin, Paulus ngamik roti kan ngucap syukur kepado Allah di adop sidok semuo, ngemocah-mocahkan roti nyin, kan mulai makan. ³⁶ Mako, sidok semuo di toguhkan ati'a kan sidok semuo makan. ³⁷ Jumlah kami semuo yo ada di d'lom kapal ado 276 urank. ³⁸ Dah makan sampe konyank, sidok ringankan kapal ngan muank gondumk ke laut. Kapal Hancur kan semuo penumpank selamat ³⁹ Tengkalo ari mulai siank,sidok com tau pei ado'a deret, tapi sidok meretikan sebuah toluk yo bepantai, tompat sidok mutuskan ntuk melabuhkan kapal diok mun memungkinkan. ⁴⁰ Mako, dah ngelemparkan jangkar-jangkar, sidok ninggelkan'a di delom laut, kan di waktu yo samo, ngelopaskan tali-tali kemudi kan naitkan layar di b'gian depan kapal supayo angin mbeik sidok sampe ke pantai. ⁴¹ Tapi'a, kapal membentur karang di tempat betomu'a duok laut sehinggo kapal kandas. Haluan kapal tesangkut kan com d'pat begerak, sementaro buritan kapal hancur dongah antaman gelumbank. ⁴² B'lo prajurit ado rencano ntuk munuh b'lo tahanan supayo com mado surank pun yo berenang kan ngelarikan dirik'a. ⁴³ Tapi, perwiro nyin, bearop d'pat nyelamatkan Paulus, mencogah rencano sidok. Io merentahkan supayo urank-urank yo d'pat berenang ntuk melumpat lobih duluk d'rik kapal kan nuju ke deratan. ⁴⁴ Kan, sisok'a ado yo di atas papan, ado gam yo ngunokan jolu-jolu lain'a d'rik kapal. Ngan piok, semuo urank sampe ke daraant ngan selamat.