¹ Hal tuk tejedi, sementaro Apolos ado di Korintus, Paulus ngelewatik daerah ped'loman kan sampe di Efesus. Di yok, io napatik beberopei murid. ² Paulus bekato kepado sidok, " Opekah kulok nerimok Roh Kudus tengkalo kulok dah nyedi pecayok?" Sidok nyawob, "Com, bahkan kami com kalok ningo bahwo ado Roh Kudus." ³ Lalu, Paulus bekato, " Di d'lom pei, lalu kulok di baptis?" jawob sidok, " Di d'lom baptisan Yohanes." ⁴ Paulus bekato, " Yohanes maptis ngan baptisan petobetan, sambel moriktau urank-urank ntuk pecayok kepado Seseurank yo akan d'tank setelah io, yonyin Yesus." ⁵ Dah sidok ningo hal tuk, sidok dibaptis di d'lom demo Doto Yesus. ⁶ Dahnyin, tengkalo Paulus dah numpangkan jeri'a di atas sidok, Roh Kudus turun ke atas sidok, lalu sidok mulai berbicaro d'lom bebegei bahaso kan benubuat. ⁷ Sidok semuo bejumloh kiro-kiro duok belas urank lalaki. ⁸ Mako, Paulus mansuk ke sinagoge kan berbicaro ngan breni selamo tigo bulen, sambel betukar pikir kan nyakinkan sidok tentank Kerajoan Allah. ⁹ Tapi'a, tengkalo beberopei urank ngeraskan ati kan nolak pecayok, sambel ngatokan hal-hal yo jahat tentank J'len nyin diadop urank b'nyak, Paulus ninggelkan sidok kan ngajak belo murid pogi, sambel betukar pikir setiop ari di sekolah Tiranus. ¹⁰ Hal tuk berlansung selambet duok tahun sehinggo semuo urank yo tinggel di Asia ningo firman Doto, b'et urank-urank Yahudi ndakpun urank-urank Yunani. ¹¹ Allah ngelakukan b'nyak mukjizat yo luar biaso ngelaluik jeri Paulus, ¹² sehinggo sapu tangan atau celemek yo dah kalok nyentuh kulit Paulus dibeik kepado urank-urank sakit, mako penyakit sidok losi kan roh-roh jahat keluar d'rik sidok. ¹³ Tapi, beberopei pengusir setan Yahudi yo bej'len bekeliling berusaho nyobut demo Doto Yesus atas urank-urank yo kerasuka roh-roh jahat sambel bekato, " Aku nyumpah'ik kau d'lom demo Yesus yo Paulus beritokan!" ¹⁴ Tujuh anak lalaki Skewa, salah satu imam bosar Yahudi, yo ngelakukan'a. ¹⁵ tapi'a, roh jahat nyin nyawob kan bekato kepado sidok, " Aku kenal Yesus kan aku tau tentank Paulus, tapi sopei ikau?" ¹⁶ Lalu, urank yo kerasukan roh jahat nyin ngelumpat ke arah sidok, kan bekuaso atas sidok, sereto ngalahkan sidok semuo sehinggo sidok ngelarikan dirik d'rik umah nyin d'lom keadaan kelanjang kan telukok. ¹⁷ Hal tuk di ketahuik oleh semuo warga Efesus, b'et urank-urank Yahudi maupun urank-urank Yunani. Kan, sidok semuo nyedi golak kan demo Doto Yesus makin di muliakan ¹⁸ B'nyak d'rik antaro sidok yo dah nyedi pecayok tetap d'tank, sambel ngaku'ik kan mberitokan pempulah-pempulahan sidok. ¹⁹ Lalu, b'nyak d'rik sidok yo kalok ngelakukan keman, gumpulkan bukuk-bukuk sidok kan nyucol'a di adop semuo urank. Kan sidok ngitunk nilai bukuk-bukuk nyin kan nomukan nilai'a ncapai 50.000 kopink perak. ²⁰ J'di, firman Doto torus betamah kan bekuaso. ²¹ Dah hal-hal nyin selesai, d'lom Roh, Paulus bemaksud pogi ke Yerusalem dah io ngelelalu'ik Makedonia kan Akhaya, ngan bekato, " Udah aku berado di nun, aku arus nongan Roma gam." ²² Kan, dah ngutus duok urank yo ngelayani'a ke Makedonia, yam Timotius kan Erastus, io surank tinggel beberopei waktu di Asia. ²³ Sekitar waktu nyin, dinun tejedi kerusuhan yo com kocik ngenaik J'len nyin, ²⁴ Dongah, ado urank bedemo Demetrius, seurank pengrajin perak, yo mulah kuil-kuil perak Dewi Artemis, morikkan penghasilan yo com sikit b'gi tukang-tukang'a. ²⁵ Belo tukang'a nyin bekumpulkan besamo ngan pekrejo-pekrejo di bidang serupa kan bekato, " Saudero-saudero, ikau tau bahwo kemakmuran kito beasel d'rik perusahaan tuk. ²⁶ Lalu, ikau tongan kan dingo bahwo, kan'a engkah di Efesus ngelainkan hampir di seluruh Asia, Paulus dah nyakinkan kan ngulah b'nyak urank bebelik ngan ngatokan bahwo allah yo dipulah ngan jeri ensio kan'a Allah pei. ²⁷ Hal tuk bebahayo kan'a engkah usaho kito akan j'tuk ke d'lom kehinakan, tapi gak'am kuil Dewi Artemis yo agung nyin com sikit pun di peritungkan, kan io, yo di sombah di seluruh Asia kan dunio, akan losi'am keagungan'a" ²⁸ Tengkalo sidok ningo hal tuk, sidok nyedi godik sekali kan beterik-teriak , "Bosar'ak Artemis, dewi urank Efesus!" ²⁹ Lalu, kota nyin di ponuh'ik ngan kekacauan kan sidok begegas besamo-samo ke godung kesenian sambel nyeret Gayus kan Aristarkus, urank Makedonia yo nyin'am kawan sepej'lenan Paulus ³⁰ Tapi, tengkalo Paulus endak pogi mansuk di antaro urank benyak nyin, belo murid com ngeronak'a. ³¹ Bahkan, beberope pembosar Asia yo bekawan ngan io ngirom sebuah posan ka io kan beulang kali muhun ntuk com nyerahkan dirik'a ke godung kesenian nyin. ³² Mako, sebegian neriakkan sesuatu kan sebegian yo lain'a, dongah kumpulan nyin ado d'lom kekacauan kan sebegian bosar d'rik sidok com tau ope alasan sidok dah d'tank bekumpul. ³³ Sebegian d'rik urank nyin nyimpulkan Aleksander dongah urank-urank Yahudi dah norong'a ke depan, kan setelah Alexander morik isyarat ngan jeri'a, io bemaksud mulah pembelaan di adop urank b'nyak. ³⁴ Tapi, tengkalo sidok ngenal bahwo Alexander urang Yahudi gam, selambet kiro-kiro 2 jam, sidok semuo beteriak kan satu suaro, " Besar'ak Artemis, dewi urank Efesus!" ³⁵ Setelah panitera kota nonangkan urank b'nyak nyin, io becakap " Hei urank-urank Efesus, sopei urank yo com tau bahwo kota Efesus nyin penjego kuil Dewi Artemis yo agung kan yo turun d'rik langit? ³⁶ J'di, dongah hal-hal tuk cum d'pat di bantah, ikau seharus'a tetap tenang kan com betindak gegabah. ³⁷ Dongah, ikau dah mbeik urank-urank tuk kituk, yo com ngerampok kuil atau ngujat dewi kito. ³⁸ Dongah nyin, mun Demetrius kan tukang-tukang yo besamo-samo ngan'a ado koluh kosah teadop seseurank, pengadilan tebukak kan ado prokonsul. Ronak pom sidok ngajukan tuntutan surank teadop yo lain. ³⁹ Tapi, mun ikau endak sesuatu hal yo lain hal nyin d'pat di selesaikan d'lom sidang rakyat menurut ukum. ⁴⁰ Dongah, kito berado d'lom bahayo ntuk di tuduh atas kerusuhan ari tuk dongah com ado alasan pei pun yo d'pat kito jelaskan tentang pekompulan yo kacau tuk." ⁴¹ Setelah io ngatokan hal-hal tuk, io ngebubarkan kumpolan urank nyin.