¹ Dah nyin, beberopei urank turun d'rik Yudea kan ngajer saudero-saudero seiman," Mun ikau com di sunat sesuai ngan adet istiadet Musa, ikau com d'pat diselamatkan." ² Lalu, tengkalo tejedi peselisihan kan pedebatan yo besar antaro Paulus kan Barnabas ngan urank-urank nyin, sidok mutuskan bahwa Petrus kan Barnabas, serta yo lain'a derik sidok, arus nait ke Yerusalem ntuk betomu ke belo rasol kan belo penatuo tekait ngan pesoalan tuk. ³ Mako, setelah dianter ke d'lom pejelenan oleh belo jemaat, sidok ngelewatik Fenisia kan Samaria sambel nceritokan ngan jelas tentang petobetan bangso-bangso lain, kan berito nyin mbeik sukocito b'sar b'gi semuo saudero seiman. ⁴ Tengkalo sidok sampe ke Yerusalem, sidok disambut tam belo jemaat, belo rasol, kan belo penatuo, lalu sidok nceritokan segalo jolu yo dah Allah pebuet ngelalu'ik sidok. ⁵ Tapi'a, beberopei urank d'rik golongan Farisi yo dah pecayok bediri kan bekato, " Ponting tuk nyunat sidok kan ntuk merentahkan sidok supayo matuh'ik Ukum Musa!" ⁶ Belo rasol kan panatuo batomu besamo ntuk mbicarokan pesoalan tuk. ⁷ Sesudah selesai pedebatan yo panjang di nun, Petrus bediri kan bekato kepado sidok, " Saudero-saudero, ikau tau pado zaman doluk Allah dah mulah pilihan di antaro ikau bahwo ngelaluik mulut aku, bangso-bangso lain akan ningo berito Injil kan nyedi pecayok. ⁸ Kan, Allah yo ngonal ati ensio, dah besaksi kepado sidok ngan morikkan Roh Kudus kepado sidok, samo tokuh yo dah laku-A ka kito, ⁹ kan Sien com mbeda-bedakan antaro kito ngan sidok, setelah Sien nyucikan ati sidok ngelaluik iman. ¹⁰ Jedi tum, ngopei ikau encobaik Allah ngan ngobah kuk yo boret di tongkuk belo murid, yo b'et inek moyang kito ndakpun kito, com akan sanggup nanggung'a? ¹¹ Sebelik'a, kito pecayok bahwa kito di selametkan ngelaluik anugrah Doto Yesus, samo tokuh sidok gam." ¹² Lalu, semuo kumpulan urank nyin tediom kan sidok dingokan Barnabas kan Paulus, sementaro keduok rasol nyin nyelaskan segalo tando kan mukjizat yo dah di pulah Allah ngelalu'ik sidok di antaro bangso-bangso lain. ¹³ Sesudah sidok beronti bicaro, Yakobus nyawab, " Saudero-saudero, dingo'am aku. ¹⁴ Simon dah nyelaskan koti caro Allah sejak awal dah mperhatikan bangso-bangso lain, ntuk ngamik d'rik antaro bangso nyin suatu umat begi demo-A. ¹⁵ Pekatoan belo nabi nyetuju'ik hal tuk, tokuh yo tetulis, ¹⁶ ' Dah nyin, Aku akan kembeli. Kan akan mb'ngun gim Kemah Daud yo udah runtuh. AKu akan mb'ngun gim puing-puing'a, kan Aku akan mugar'a, ¹⁷ supayo umat ensio yo tesisok d'pat ngogok Doto, kan semuo bangso lain yo dipanggil ngelalu'ik demo Aku, yo ngelakukan semuo tuk, ' firman Allah, yo ngelakukan semuo'a tuk, Amos 9:12-12 ¹⁸ Udah diketahuik sejak pemulaan zaman. Yesaya 45:21 ¹⁹ J'di, aku bependapat bahwo kito seharus'a com nyulitkan urank-urank d'rik bangso lain yo dah bebelik pado Allah. ²⁰ Tapi, kito seharus'a nulis kepado sidok supayo sidok njauhkan dirik d'rik segalo jolu yo di cemarik tam behala-berhala, kan d'rik dosa-dosa seksual, sereto d'rik pei yo digenjet, kan d'rik d'rah. ²¹ Dongah sejak generasi tedohuluk, Musa dah mpunyaik, di setiop kota, urank-urank yo mberitokan'a dongah dibecokan di sinagoge-sinagoge milang ari Sabat." ²² Lalu, ditongan b'et tam belo rasol, kan penatuo, kan saluruh jemaat jemaat, milih urang-urank d'rik antaro sidok ntuk di utus ke Antiokia besamo Paulus kan Barnabas. Sidok ngutus Yudas yo di sobut Barsabas, sereto Silas, belo pemimpin di antaro saudero-saudero seiman, ²³ kan sidok nulis surat ngan jeri sidok, tokuhtuk: "D'rik rasol-rasol kan penatuo-penatuo, saudero-saudero seiman kau, kepado semuo saudero seiman kan'a Yahudi di Antiokhia, kan Siria, dan Kilikia, salam! ²⁴ Dongah kami dah ningo bahwo beberope d'rik antaro kami, yo kepado sidok kami com morik perentah, dah nganguk kau ngan pekatoan sidok yo ngoyahkan jiwo kau, ²⁵ hal tuk di tongan b'et b'gi kami, sesudah nyedi sepakat, ntuk milih urank-urank kan ngutus sidok ka ikau besamo ngan saudero-saudero kami yo tekasih, Barnabas kan Paulus, ²⁶ yo dah petaruhkan idup sidok demi demo Deto kito, Kristus Yesus. ²⁷ Tam dongah nyin te, kami ngutus Yudas kan Silas, yo sidok surang akan moriktaukan segalo jolu yo samo secaro lisan. ²⁸ Sebab, alangkah b'et'a b'gi Roh Kudus kan b'gi kami ntuk naruh beban di atas kau yo com lobih borat d'rikpado yo perelu tuk, ²⁹ bahwa kulok nyauhkan dirik d'rik pei yo dah di persembahkan kepado behala, kan d'rik darah kan pei yo mati digenjet, kan d'rik dosa seksual. Mun kau j'go dirik kau surank d'rik hal-hal tuk, ikau ngelakukan yo b'et. Sampe batomu." ³⁰ Seudah sidok bepamitan, sidok turun ke Antiokhia, kan seudah ngumpolkan jemaat, sidok nyorahkan surat tesebut. ³¹ Tengkalo urang-urang pecayok mbeco'a, sidok besukocito dongah pengiburan nyin. ³² Yudas kan Silas, yo sidok surang te nabi, neguhkan kan nguetkan saudero-saudero seiman ngan b'nyak pekatoaan. ³³ Kan, setelah sidok tinggel di nun ntuk beberope saat, urank-urank pecayok nyin ngelopas sidok pulank ngan damai kepado urank-urank yo dah ngutus sidok. ³⁴ [tapi'a, dianggop Silas jengak kalau tetap tinggel di nun.] ³⁵ Tapi, Paulus kan Barnabas tinggel di Antiokhia, sambel ngajer kan mberitokan firman Doto besamo ngan b'nyak urank lain gam. ³⁶ Dah beberopei ari, Paulus bekato kepado Barnabas, " Ayok kito bebelik ngunjungik saudero-saudero seiman di setiop kota, tempat kito mberitokan firman Doto ntuk nongan koti keadoan sidok." ³⁷ Barnabas nak ngajak Yohanes yo di sobut Markus gam. ³⁸ Tapi'a, Paulus nganggap bahwo com seharus'a pei ngajak urank yo dah ninggelkan sidok di Pamfilia kan com pogi besamo sidok ntuk krejo nyin. ³⁹ Mako, tejedi'am peselisihan yo tajam sehinggo sidok bepisah satu kan yo lain. Barnabas mbeik Markus kan belayar ke daerah Siprus, ⁴⁰ Sedangkan Paulus milih Silas kan pogi, setelah di serahkan tam saudero-saudero seiman ke d'lom anugrah Doto, ⁴¹ Kan, io ngelewatik Siria kan Kilikia sambel noguhkan belo jemaat.