¹ Dan, tej'di'am, di Ikonium, Paulus kan Barnabas mansuk besamo ke sinagoge urank Yahudi kan becakap ngan piok rupo, sampe b'nyak urank, b'et urank Yahudi endakpun urank Yunani, nyedi pecayok. ² Tapi urank-urank Yahudi yo com pecayok ngasut urank-urank kan'a Yahudi kan ngeracunik pikiran sidok ngelawan urank-urank pecayok. ³ Mako, sidok diom di nun d'lom waktu yo lambet sambel becakap ngan breni b'gi Doto, yo morik kesaksian tentang berito anugrah-A, sereto ngaruniakan tanda-tanda ajaib kan mujizat-mujizat yo tejedi ngelaluik jeri sidok. ⁴ Tapi'a, urank-urank di kota nyin tebegi-begi, seb'gian bepihak kepado urank-urank Yahudi, seb'gian kepado belo rasol. ⁵ Tengkalo suatu usaha dipulah, b'et urank-urank yo kan'a Yahudi, ndakkpun urank-urank Yahudi, ngan belo pemimpin sidok, ntuk nganiyo kan ngelemparik belo rasul ngan b'tu, ⁶ sesudah Paulus kan Barnabas ngetau'ik'a sidok ngalarikan dirik ke Listra kan Derbe, kota-kota di Likaonia, kan ke wilayah di sekitar'a. ⁷ Kan diok, sidok torus mberitokaan Injil. ⁸ Di Listra, ado seurank gik tongah duduk yo lomah kaki'a, lumpuh d'rik d'lom porut umak'a kan lom kalok bej'len. ⁹ Urank nyin tongah ningokan Paulus tengkalo Paulus bebicaro, sesudah Paulus encelomat'a kan ngenongan urank nyin ado iman ntuk disomuhkan, ¹⁰ Paulus bebicaro ngan soro kuat, " Bediri dom tegak ngan kak ikau ." Lalu, urank nyin ngelumpat kan mulai bej'len. ¹¹ Tengkalo urank b'nyak nongan pei yo dah di lakukan Paulus, sidok ngangkat soro'a kan kato'a d'lom bahasa Likaonia, " Dewa-dewa udah turun ke tongah-tongah kito kan nyedi serupo ngan ensio!" ¹² Urank-urak nyin nyobut Barnabas sebegi Zeus dan Paulus sebegi Hermes dongah io yo mimpin pembicaroan. ¹³ Imam dewa Zeus, yo kuil'a ado di luar kota, mbeik lembu-lembu jentan kan rangkaian bungo ke lawank gerobank kota. IIo ngan urank b'nyak nyin ndak pesembahkan korban kepado Paulus kan Barnabas. ¹⁴ Tapi'a, tengkalo rasul Barnabas kan rasul Paulus ningo'a, sidok nyarak pakaian'a kan balari mansuk ke tongah-tongah urank b'nyak nyin, sambel beseru, ¹⁵ kan bekato, " Saudero-saudero, ngopei kulok ngelakukan semuo tuk? Kami pun ensio biaso samo tokuh kulok dan mbeik Berito B'et begi kulok supayo kulok bebelik d'rik hal-hal yo sio-sio tuk kepado Allah yo hdup, yo nyipta langit, kan bumi, kan laut, kan segalo jolu yo ado di d'lom'a. ¹⁶ Di generasi-generasi yo lalu, io ngeronakan semuo bangso bejelen nurut j'len-j'len'a surank. ¹⁷ Tapi, Io bukan miyerkan dirik-A acom besaksi. Dongah, Io ngelakukan yo b'et ngan mborikab kepado kulok ujen d'rik langit kan musim-musim bebuah yo akan muaskan ati kau ngan makanan kan keayah'an." ¹⁸ sekalikpun sidok ngatokan piok nyin, sidok uyuh ngehontikan urank b'nyak nyin supayo com pesombahkan korban b'gi sidok. ¹⁹ Akan tatapi, urank Yahudi dtank d'rik Antiokhia kan Ikonium, kan sesudah mujuk urank b'nyak nyin, sidok ngelemparik Paulus ngan b'tu kan nyeret'a ke luar kota dongah ngiro Paulus dah mati. ²⁰ Tapi, tengkalo belo murid ngelilingik Paulus, io bediri kan bebelik mansuk ke kota gim. Pado ari berikut'a, io berengkat besamo ngan Barnabas ke Derbe. ²¹ Sesudah sidok mberitokan Injil di kota nyin kan dah d'pat b'nyak murid, sidok bebelik ke Listra, kan ke Ikanium, kan ke Antiokhia, ²² sambel nguatkan jiwo belo murid, ngenorong sidok supayo betokun di d'lom iman, kan madahkan bahwo kito arus mansuk Keraja'an Allah ngelaluik b'nyak penderitoan. ²³ Tengkalo Paulus kan Barnabas nunjuk penatuo-penatuo begi sidok di setiap jemaat, setelah bedoa kan bepuaso, sidok nyerahkan belo panatuo nyi kepado Doto, yo kepado-A sidok dah pecayok. ²⁴ Lalu, sidok ngelewatik Pisida kan sampe di Pamfilia. ²⁵ Lalu, tengkalo sidok dah mberitokan firman di Perga, sidok turun ke Atalia. ²⁶ D'rik nun, sidok belayer ke Antiokhia, tompat sidok dah disorahkan kepado anugrah Allah ntuk pekrejoan yo udah sidok selesikan. ²⁷ Tengkalo sidok sampei kan bekumpul besamo ngan jemaat, sidok ngelaporkan semuo jolu yo dah Allah pebuet besamo ngan sidok kan koti Io mbukok lawank iman begi bangso-bangso lain. ²⁸ Kan, sidok tinggel besamo belo murid ntuk waktu yo lambet.