¹ Pado zaman doluk, ado nabi-nabi palsu di antaro umat Allah, tokuh tum gak ado guru-guru palsu di antaro kau yo ngan sembunyik-sembunyik ngajerkan ajeran-ajeran yo merusak, bahkan nyengkal Doto yo dah nebus sidok sehinggo nde'tangkan kehancuran yo copat atas dirik sidok surank. ² Kant, kan ado b'nyak urank yo kan ngikut'ik caro idup sidok yo com bemoral, kant dongah sidok'am, j'len kebonaran kan dihujat. ³ Ngan serakah sidok kan ngambik ntung d'rik ikau ngan kato-kato yo ponuh tipuan; ukuman b'gi sidok yo dah disiopkan sejak doluk kala com kan ditundo-tundo, kant kehancuran sidok com akan tetundo. ⁴ Dongah, mun Allah pun com nahan dirik tengkalo b'lo malekat bedosa, ngelainkan ngelempar sidok ke d'lom nerako kant nyorahkan sidok ke d'lom rantai kegolapan ntuk ditahan sampai pengakiman, ⁵ kant mun Allah pun com nyayangkan dunio purba kecuali Nuh, seseurank pembrito kebennaran besamo tujuh urank lain'a, tapi'a nde'tangkan aik bah keatas dunio yo com ngenal Allah; ⁶ kant mun Allah ngokum kota Sodom kant Gemora ngan caro ngancorkan keduok kota nyin sampai nje'di abu, kant nje'dikan sidok sebe'gei contoh tentang pei yo akan teje'di pado urank-urank jahat yo idup pado maso berikut'a; ⁷ kant mun Allah nyelamatkan Lot, urank bujor nyin, yo ndrito dongah caro idup yo jahat d'rik urank-urank yo com ngenal ukum, ⁸ [ntuk sementaro waktu, Lot idup ditongah-tongah sidok setiop ari, kant jiwo'a yo bujor ndrito dongah nongan kant ningo pebuetan-perbuetan jahat yo io tongan kant dingo;) ⁹ mangko Allah pasti tau koti ngelopaskan urank-urank bujor d'rik pencobaan kant nahan urank-urank jahat ntuk diukum pado ari pengakiman, ¹⁰ Kusus'a sidok yo muaskan tubuh'a d'lom keinginan cemar'a, kant yo ngeremehkan perintah. Ngan sangat lancang kant sombung, guru-guru palsu nyin com golak ngina yo mulio, ¹¹ b'lo malekat, yo meskipun j'uh lobih kuat kant lobih bekuaso d'ripado sidok, com ngucapkan tuduhan yo ngandung hujatan teadop sidok di adopan Allah. ¹² Guru-guru palsu tuk tokuh binatang yo com beakal, yo dilahirkan ntuk ditangkap kant dibunuh; sidok ngujat pei yo com sidok ngereti, kan dibinasokan d'lom kehancuran sidok surank; ¹³ Sidok kan ditimpok kejahatan sebegei upah atas pebuatan yo jahat. Sidok nganggop bemabuk-mabukkan pado siang ari sebegei kesenangan. Sidok te noda kan cola, besukoria d'lom muslihat sidok tengkalo makan besamo-samo ngan kau. ¹⁴ Sidok mpunya'ik mato yo ponuh nafsu pezinaan kant yo com beronti mulah dosa, sidok nggoda urank-urank yo lomah jiwo'a, kant ati sidok dah telatih de'lom keserakahan. Sidok te anak-anak yo tekutuk! ¹⁵ Sidok ninggelkan j'len yo lurus kant nundok j'len yo sosat, yo'nyin j'len Bileam bin Beor, yo suko nerimok upah ntuk pebuatan'a yo jahat. ¹⁶ Tapi, io nde'pat togoran yo koras atas pelanggeran'a d'rik sikuk keledai yo bisuk, tapi yo bicaro ngan soro ensio sampai mberontikan pebuatan gilo nabi nyin. ¹⁷ Urang-urang tuk tokuh mato aik yo koring kant tokuh kabut yo disapu tam badai. Kegolapan yo paling pekat dah disediokan ntuk sidok. ¹⁸ Ngan pekatoan yo sombung, tapi kosong, sidok njoret urank-urank yo dah telopas d'rik sidok yo idup d'lom kesosatan ngan keinginan-keinginan degin'a kant ngan pecabulan. ¹⁹ Guru-guru palsu nyin njenjikan kebebasan, padohal sidok surank te budak d'rik kebinasoan. Sebab, sopei pun yo dah naklukan seseurank, kepado'a'ak urank nyin dipebudak. ²⁰ Dongah, mun sidok dah dilopaskan d'rik pence'maran dunio yo jahat ngelalu'ik penge'nalan kan Doto kant Juru Selamat kito, Yesus Kristus, tapi'a abis nyin b'lik gim kepado dunio yo jahat nyin kant dikuaso'ik tam'a, mangko sidok akan nje'di lobih buruk d'ripado sebolom'a. ²¹ Kan lobih b'et mun sidok com kolok nge'nal j'len kebenaran nyin, d'ripado seabis nge'nal'a sidok bebelik d'rik ukum suci yo dah diborikkan kepado sidok. ²² Sidok te gemberan d'rik pribahaso yo bujor tuk: "Asuk b'lik kepado muntah'a surank" kant "B'bi yo dah dibresihkan, b'lik gik kekubang'a di lumpor".