¹ Semuo urank yo nanggung boban sebegai budak arus'ak nganggop tuan'a sebegai urank yo pantas nged'pat segalo hormat supayo demo Allah kant pengajeran kito com dicela. ² Sedangkan para budak yo tuan'a urank pecayok, nang'ak ngurangi aso hormat kepado sidok dongah sidok ado'ak saudero-saudero seiman. Malah, paro budak arus ngelayanik tuan'a ngan lobih b'et gik dongah yo nerimok berkat pelayanan adolah urank-urank pecayok kant yo sidok kasihik. Ajerkan kant nasehatkan hal-hal nyin kepado sidok. ³ Mun, ado urank yo ngajer'ik ajeran laen yo com sesuai kant kato yo b'nar derik Doto kito Kristus Yesus kan com sesuai kan ajeran kasalehan, ⁴ io tu pemulak kant acom ngereti ope-ope. Io engkah tatarik ngan pebantahan yo com sehat, yo engkah pedebat'kan kato-kato yo justru nimbulkan iri ati, pepecah'an, fitnah kant kecurigoan yo jhat. ⁵ Serto terus-terus ngemulah selisih di antaro urank-urank yo pikiran'a dah rusak kant ngenolak kebenaran, yo mengiro bahwa kesalehan adolah caro 'ntuk ngedpat untung. ⁶ Tapi'a, kesalehan yo disertoik aso cukup akan mborik'an guno yo b'sar. ⁷ Dongah, kito com mbeik ope-ope saat masuk ke dunio kant kito pun com biso mbeik ope-ope saat kaluar derik dunio tuk. ⁸ Mun dah ado makan kant pakaian, kito akan aso cukup. ⁹ Urank yo ndak kayo jetuh ke dlom pecobaan kant jebakan, serto bemacam nafsu yo bodoh kant ngembahayokan yo akan nenggelamkan urank-urank ke dlom keancuran kant kebinasaan. ¹⁰ Dongah, cinto akan duit tu akar drik segalo macam kej'hatan. Urank-urank yo buru duit dah nyimpank drik iman kant nyikso dirik surank ngan b'nyak dukacito. ¹¹ Tapi'a, ikau sebegai ensio derik Allah, jeuhkan'ak dirik kau deri semuo'a nyin. Kojar'ak kebonaran, kasalehan, iman, kasih, kasabaran kant kalombutan. ¹² Bejuang'ak elom pejuangan iman yo b'et kant bapijab'ak pado idup kekal yo dah manggil ikau saat ikau mborik pengakuan yo b'et di adop b'nyak saksi. ¹³ Di adopan Allah yo ngemborikan idup atas segalo jolu kant di adopan Yesus Kristus yo mborik pengakuan yo b'et saat beadopan ngan Pontius Pilatus, aku m'rintahkan ikau, ¹⁴ kiro'a ikau ngejelenkan prentah tuk ngan com bacacat kat com bacola sampai Doto kito Kristus Yesus d'tang. ¹⁵ Pado saat yo ditontukan-A, Io nak nge'nongankan dirik-A sebegai satu-satu'a Penguaso, Rajo atas segalo rajo, kant Tuan atas segalo tuan. ¹⁶ Io'a satu-satu'a yo kekal, yo tinggel dlom terank yo com ta'ampirik, yo com seurankpun kolok ngenongan atau dpat ngenongan-A. Begi Duen, segalo hormat kant kuaso yo kekal! Amin. ¹⁷ Sementaro nyint, prentahkan urank-urank kayo di jemant tuk supayo com sombunk ndakpunt naruh arap pado kekayoant yo com pasti, tapi taruh'ak arap kepado Allah, yo ngant ngelimpah nyediokant segelo jolu begi kito 'ntuk dinikmatik. ¹⁸ Prentahkan sidok 'ntuk ngemulah b'et, nyedi urank yo murah ati, kant siap beb'gi. ¹⁹ Ngant piok, sidok akan ngumpolkan harto begi dirik sidok surank sebegei dasar yo b'et 'ntuk maso yo akan d'tang hinggo sidok d'pat bepijab pado idop yo sasungguh'a. ²⁰ Timotius, jego'ak ope yo dah dipecayokan kepado ikau. Jeuhi'ak cakap yo duniawi kant omong kosong serto petentangan yo secaro salah disobut "pengetahuant", ²¹ yo ngant ngakuik'a, iman beberope urank nyedi nyimpank. Anugerah nyertoi ikau.