¹ Kankah aku urank bebas? Kankah aku te rasul? Kankah aku dah nongan Yesus, Doto kito? Kankah ikau hasel pekrejoanku d'lom Doto? ² Mun b'gi urank laen aku com rasul, paling acom aku te rasul b'gi kau. Dongah, ikau te materai kerasulanku d'lom Doto. ³ Tuk'ak pembelaanku teadop sidok yo akan merikso aku. ⁴ Opekah kami com ado hak ntuk makan kant minum? ⁵ Opekah kami com ado hak ntuk mbeik serto seurank bini yo seiman, samo tokuh rasul-rasul yo lain, saudero-saudero Doto, kant gam Kefas? ⁶ Atau, peikah engkah Barnabas kant aku yo com ado hak ntuk com bekrejo? ⁷ Sopekah yo kolok ngabdi sebegei tentara ngan biayo'a surank? Sopeikah yo nanam'ik kobun anggur kant com makan buah'a? Atau, sopeikah ngembalakan ternak kant com minum susu'a? ⁸ Opekah aku ngatokan hal-hal tuk menurut ensio? Kankah Ukum Taurat pun ngatokan hal-hal yo samo? ⁹ Dongah, ado tetulis d'lom ukum Taurat Musa, "Nang'ak ikau mberangus lembu yo gik ngirik gondum!" Peikah lembu yo gik Allah peratikan? ¹⁰ Atau, peikah Io ngatokan'a demi kito? Auk, demi kito'ak hal nyin ditulis dongah yo mbajak cak mbajak d'lom pengarapan kant yo ngirik cak ngirik d'lom pengarapan ntuk nd'patkan bagian'a. ¹¹ Mun kami nabor bonih rohani di antaro ikau, peikah belobihan mun kami pun nuai hal-hal materi d'rik ikau? ¹² Mun urank lain ado hak tuk atas ikau, kankah kami lobih behak gik? Bierpun piok, kami com nggunokan hak nyin. Sebelik'a, kami nanggung segala sesuatu supayo kami com mborikkan suatu halangan b'gi Injil Kristus. ¹³ Opekah ikau com tau bahwa sidok yo ngrejokan hal-hal yo kudus nyin, makan makanan d'rik Bait Allah gam? Kant, sidok yo ngelayan'ik di altar nd'pat b'gian d'rik kurban pesombahan nyin? ¹⁴ Piok gam, Doto mrintahkan sidok yo mberitokan Injil ntuk idup d'rik Injil gam. ¹⁵ Tapi, aku com kolok makai sutik pun d'rik hak-hak tuk. Kant, aku com nuliskan hal-hal tuk supayo dilakukan tokuh nyin kepadoku. Dongah, lobih b'et aku mati d'rikpado seseurank ngelosikan kebanggaanku. ¹⁶ Dongah, mun aku mberitokan Injil, aku com ado alasan ntuk bemegah dongah kewajiban nyin ado atasku. Celako'ak aku, mun aku com mberitokan Injil. ¹⁷ Mun aku mberitokan Injil dongah ke'endakku surank, aku akan d'pat upah. Tapi mun tuk kan'a ke'endakku, tuk te tugas yo dipecayokkan kepadoku. ¹⁸ Mun piok, peikah upahku? Upahku te'ak tengkalo aku mberitakan Injil, aku mberitokan Injil tanpa upah kant com nyalahgunokan hakku d'lom Injil. ¹⁹ Tapi, walaupun aku bebas atas semuo urank, aku nj'dikan dirikku surank hamba b'gi semuo urank supayo aku d'pat monangkan lobih b'nyak gik. ²⁰ B'gi urang Yahudi, aku nj'di tokuh urank Yahudi supayo aku d'pat monangkan urank Yahudi. B'gi urank yo idup di beruh Ukum Taurat, aku nj'di tokuh urank yo idup di beruh Ukum Taurat (meskipun aku surank com di beruh Ukum Taurat) supayo aku d'pat monangkan sidok yo ado di beruh Ukum Taurat. ²¹ B'gi sidok yo tanpo Ukum Taurat, aku nj'di tokuh tanpa Ukum Taurat (kan'a tanpa Ukum Allah, tetapi di beruh Ukum Kristus) supayo aku d'pat monangkan sidok yo tanpa Ukum Taurat. ²² B'gi urank yo lomah, aku nj'di lomah supayo aku d'pat monangkan sidok yo lomah. Aku dah nj'di segala sesuatu b'gi semuo urank supayo ngan segala caro aku d'pat nyelamatkan beberopei urank. ²³ Aku ngelakukan semuo tuk demi Injil supayo aku d'pat nd'patkan b'gian di d'lom'a. ²⁴ Com taukah ikau bahwa sidok yo bekeragok d'lom suatu petandingan semuo'a keragok, tapi engkah sutik yo nerimok hadiah? J'di, keragok'ak sedemikian supayo ikau nd'patkan'a! ²⁵ Setiap urank betanding belatih nguaso'ik dirik d'lom segala hal. Sidok ngelakukan'a ntuk nerimok mahkota yo fana, tetapi kito ntuk nd'patkan yo abadi. ²⁶ Dongah nyin, aku com bekeragok tokuh nyin tanpa tujuan. Aku com ninju tokuh urank yo ninju angin. ²⁷ Tapi, aku ngelatih tubuhku ngan koras kant nguaso'ik'a supayo sesudah aku mberitokan Injil kepado urank lain, aku surank com ditolak.