¹ Tum, ngonok'ik hal-hal yo ikau tuliskan kepadoku: te b'et b'gi lelaki ntuk com nyentuh tinok. ² Tapi, dongah ado'a pezinaan, setiap lelaki seb'et'a mpunya'ik bini'a surank kan setiap tinok mpunya'ik laki'a surank. ³ Laki cak monuh'ik kewajiban'a teadop bini'a. Piok gam bini'a teadop laki'a. ⁴ Bini com bekuaso atas tubuh'a surank, ngelainkan laki'a. Piok gam laki'a com bekuaso atas tubuh'a surank, ngelainkan bini'a. ⁵ Nang'ak ikau saling njeuh'ik, kecuali ngan pesetujuan besamo ntuk sementaro waktu agar ikau leluasa mborikkan waktu kau ntuk bedoa. Lalu, idup'ak besamo-samo gik supayo Iblis com ncobo'ik ikau dongah kecommampuan kau d'lom pengendalian dirik. ⁶ Tapi, aku ngatokan tuk sebegei kelonggaran, kan'a sebegei perintah. ⁷ Aku bearop semuo urank tokuh dirikku. Akan tetapi, setiap urank mpunya'ik karunio'a surank d'rik Allah, yo seurank d'lom hal tuk, kan yo lain d'lom hal nyin. ⁸ Kepado yo com kawin kant b'lo jando, aku ngatokan bahwa lobih b'et b'gi sidok mun tetap d'lom keadaan tokuh aku. ⁹ Akan tetapi, mun sidok com mampu ngendalikan dirik, seb'et'a sidok kawin. Sebab, lobih b'et kawin d'rikpado tebakar tam hawa nafsu. ¹⁰ Kepado yo kawin, aku borikkan perintah-perintah tuk [kan'a d'rik aku, melainkan d'rik Doto), yaknyin bini com d'pat ninggelkan laki'a, ¹¹ tetapi mun io dah telanjor ninggelkan laki'a, io cak tetap com kawin, atau bebelik didamaikan ngan laki'a), kant laki com d'pat nceraikan bini'a. ¹² Kepado yo selobih'a, aku ngatokan (aku, kan'a Doto) bahwa mun ado saudero mpunya'ik bini yo com pecayok, kant tinok nyin ndak idup besamo'a nang'ak io nceraikan bini'a nyin. ¹³ Piok gam mun seurank tinok mpunya'ik laki yo com pecayok, kant laki-laki nyin ndak idup besamo'a, nang'ak io ninggelkan laki'a nyin. ¹⁴ Dongah laki yo com pecayok nyin dikuduskan tam bini'a, kant bini yo com pecayok dikuduskan tam laki'a. Mun com tokuh nyin, anak-anak kau te anak-anak najis, tetapi tum sidok kudus. ¹⁵ Tapi, mun yo com pecayok nyin nak bepisah, ronak pom io bepisah, D'lom hal tokuh tuk, saudero atau sauderi com gik tekobet. Akan tetapi, Allah dah nyakau kito ntuk idup d'lom damai sejahtera. ¹⁶ Dongah hai bini, koti ikau tau kalau ikau akan nyelamatkan laki kau? Atau, koti ikau tau, hai laki, kalau ikau akan nyelamatkan bini kau? ¹⁷ Tapi, tokuh yo dah Doto tetapkan ntuk setiap urank, koti Allah dah nyakau sidok mansing-mansing, tetap'ak idup d'lom keadaan piok. Piok gam aku perintahkan kepado semuo jemaat. ¹⁸ Opekah ado urank yo disakau tengkalo io dah disunat? Nang'ak io ngelosikan tando-tando sunat'a. Adokah urank yo tengkalo disakau io bolom disunat? Nang'ak io disunat. ¹⁹ Sebab, besunat ndakpun com besunat, com'ak penting. Tapi, yo penting te ketaatan teadop perintah-perintah Allah. ²⁰ Setiap urank cak tinggel d'lom keadaan tokuh tengkalo io disakau. ²¹ Opekah ikau seurank budak tengkalo disakau? Nang'ak ikau nguaterkan hal nyin. Tapi, mun ikau com d'pat nj'di urank yo merdeka, lobih b'et digunokan'ak kesompatan nyin. ²² Dongah io yo tengkalo disakau d'lom Doto te budak, io te urank yo merdeka wak Doto. Piok gam, tengkalo urank yo merdeka disakau, io te budak Kristus. ²³ Ikau dah ditobus ngan rogo lunas, dongah nyin nang'ak ikau nj'di budak ensio. ²⁴ Saudero-saudero, endak'ak setiap urank tetap tinggel besamo Allah, d'lom keadaan tengkalo io disakau. ²⁵ Tum, tentang urank-urank yo com kolok kawin, aku com ado perintah d'rik Doto. Akan tetapi, aku mborikkan pend'patku sebegei urank, yo tam belas kasihan Doto, d'pat dipecayok. ²⁶ Aku nganggop hal tuk b'et d'lom keadaan sulit saat tuk, yaknyin lobih b'et b'gi seurank ntuk tetap tinggel tokuh pei ado'a. ²⁷ Opekah ikau tekobet ngan seurank bini? Nan'ak ngusahakan pecoraian. Peikah ikau lom tekobet ngan bini? Nang'ak ikau ngogok bini. ²⁸ Tapi, mun ikau kawin, ikau com bedosa. Kant, mun seurank tinok kawin, io com bedosa. Akan tetapi, sidok yo kawin akan ngalam'ik kesulitan-kesulitan idup duniowi, kant aku nak ikau tehindar d'rik hal-hal tuk. ²⁹ Saudero-saudero, maksudku te waktu'a dah singkat. J'di mulai tum, ronak pom sidok yo ado bini, idup'ak seolah-olah sidok com mpunya'ik? ³⁰ Sidok yo nangis seolah-olah com nangis, sidok yo besukocito seolah-olah com besukocito, sidok yo mboli seolah-olah com mpunya'ik, ³¹ kant sidok yo nggunokan hal-hal dunia tuk, seolah-olah com nguno'a. Sebab, keadaan dunio tuk gik lonyap. ³² Aku ndak ikau bebas d'rik kehawatiran. Urank yo com kawin mikerkan hal-hal ngonok'ik Doto, koti io d'pat nyenangkan Doto. ³³ Akan tetapi, urank yo kawin mikerkan hal-hal duniawi, koti io d'pat nyenangkan bini'a, ³⁴ kant peratian'a teb'gi-b'gi. Tinok yo com kawin kant b'lo gadis mikerkan hal-hal ngonok'ik Doto supayo io nj'di kudus, b'et tubuh ndak pun roh'a. Tapi, tinok yo kawin mikerkan hal-hal dunio tuk, koti io d'pat nyenangkan laki'a. ³⁵ Aku ngatokan hal tuk ntuk keuntungan kau surank, com ntuk naruh joret atas kau, melainkan ntuk hal yo b'et supayo pelayanan kau kepado Doto com tegengguk. ³⁶ Mun ado urank yo nganggop bahwa io dah ngelakukan hal yo com pantas teadop tinok'a dongah tinok'a dah betambah umor kant io ngaso ndak kawin , ronak pom io ngelakukan pei yo dindakkan'a, io com bedosa ; ronak pom sidok kawin. ³⁷ Tapi, io yo dah mantap d'lom ati'a, com gik diberuh paksaan, mpunya'ik kuaso atas ke'endakn'a surank, kant dah mutuskan d'lom ati'a ntuk com ngawin'ik tinok'a nyin, mako io pun betindak ngan b'et. ³⁸ J'di, mun io ngawin'ik tinok nyin io bebuat bujor, tapi mun io com ngawin'ik tinok nyin, pebuatan'a nyin pun b'et. ³⁹ Bini tekobet selamo laki'a gik idup. Tapi, mun laki'a mati, io bebas ntuk kawin ngan sopei pun yo diendakkan'a, asalkan urank nyin di d'lom Doto. ⁴⁰ Akan tetapi, menurut pendapatku, io akan lobih bahagio mun io tetap d'lom keadaan'a, kant nurutku, aku pun mpunya'ik Roh Allah.