¹ Mang dah dilaporkan bahwa ado pezinaan di antaro ikau, pezinahan yo bahkan com ado di antaro bangsa-bangsa lain, yaknyin ado urank yo ngambik bini apak'a. ² Kant , ikau sombung! Comkah seharus'a ikau justru beduka supayo urank yo ngelakukan pebuataan tuk disingkerkan d'rik antaro ikau? ³ Mang, secaro jasmani aku j'uh, tapi aku hadir d'lom roh. Kant, aku dah njetukkan hukuman atas urank yo ngelakukan hal tuk, seolah-olah aku hadir. ⁴ D'lom demo Doto Yesus, tengkalo ikau bekumpol, kant aku besamo kau d'lom roh ngan kuaso Doto kito, Yesus, ⁵ aku dah mutuskan ntuk nyorahkan urank tuk kepado Iblis ntuk kebinasoan degin'a supayo roh'a d'pat diselamatkan pado ari Doto. ⁶ Kesombungan kau nyin com b'et. Com taukah ikau bahwa sikit ragi pun akan ngerugikan seluruh adonan? ⁷ Bersihkan'ak semuo ragi yo lambet supayo ikau nj'di adonan b'ru, koti memang ikau com beragi. Sebab, Kristus Domba Paskah kito, dah disemboleh. ⁸ Dongah nyin, ayok'ak kito ngerayokan pesta nyin, kan'a ngan ragi yo lambet, kan'a d'rik ragi keburuk'an kant kejahatan, melainkan ngan roti com beragi d'rik kemurnian kant kebenaran. ⁹ Aku nuliskan kepado kau d'lom suratku: nang begaul ngan urank-urank cabul. ¹⁰ Maksudku kan'ak ngan urank-urank cabul didunio tuk, urank-urank serakah, b'lo penipu, atau ngan b'lo penyombah behala. Mun tokuh nyin, ikau cak keluar d'rik dunio tuk. ¹¹ Tapi, tum aku nuliskan kepado kau, nang begaul ngan urank-urank yo disobut saudero mun io te urank cabul, serakah, penyombah behala, pemfitnah, pemabuk atau penipu. Bahkan, nang makan ngan urank tokuh nyin. ¹² Sebab, peikah urusanku ngakim'ik urank-urank luar? Kankah ikau ngakim'ik sidok yo ado di d'lom jemaat? ¹³ Tapi, Allah yo akan ngakim'ik sidok yo di luar jemaat. Dongah nyin, user'ak urank yo ngelakukan kejahatan d'rik antaro ikau.