¹ Tum tentang pengumpolan duit ntuk urank-urank kudus, lakukan'ak sesuai ngan petunjuk-petunjuk yo aku borikkan kepado jemaat di Galilea. ² Pado ari petamo setiap minggu, mansing-mansing ikau nyisihkan sesuatu kant nyimpan'a sesuai ngan yo ikau peroleh supayo nang tengkalo aku d'tang b'ruk diadokan pengumpolan. ³ Tengkalo aku d'tang, aku akan ngutus sidok, sopei pun yo ikau setuju'ik, diserto'ik ngan surat-surat ntuk mbeik pemborikan kau ke Yerusalem. ⁴ Kant, mun sepatu'a aku pun pogi, sidok akan pogi besamo aku. ⁵ Tapi, aku akan d'tang kepado kau seudah aku ngelalu'ik Makedonia dongah aku bemaksud ntuk ngelalu'ik Makedonia. ⁶ Kant, mungkin aku akan tinggel besamo kau atau ngabiskan waktu selamo musim colap supayo ikau d'pat mbentuk aku d'lom pejalananku, ke mone pun aku pogi. ⁷ Sebab, aku bolek nongan kau tum engkah sepintas lalu. Aku beharap tinggel beberope saat ngan kau, mun Doto ngijinkan'a. ⁸ Tapi, aku akan tinggel di Efesus sampai ari Pentakosta, ⁹ dongah lawang yo lebar ntuk ngrejokan pekrejoan yo penting dah tebukok b'gi aku sekalipun ado b'nyak yo belawanan. ¹⁰ Tum, mun Timotius d'tang, peratikan'ak supayo io com ngeraso golak tengkalo besamo kau dongah io ngelakukan pekrejoan Doto, samo tokuh aku gam. ¹¹ J'di, nang ado urank yo mandang'a rendah. Bentuk'ak io d'lom pe'j'lenan'a ngan damai agar io d'pat b'likk kepado aku. Aku nantikan'a besamo ngan sau'd'ro-sau'd'ro di tuk. ¹² Tum,tentang sau'd'ro kito Apolos, aku sangat ndorung'a ntuk nyongok ikau besamo sau'd'ro-sau'd'ro yo lain, tetapi io samo sekali bolek d'tang tum. Io akan d'tang mun ado kesompatan. ¹³ Berati-ati'ak, bediri teguh d'lom iman. Betindok'ak tokuh lelaki kant j'di'ak kuat. ¹⁴ Pus pom semuo yo ikau krejokan, dilakukan d'lom kasih. ¹⁵ Aku ndesak kau, sau'd'ro-sau'd'ro, (Ikau tau bahwa seluruh isik umah Stefanus te buah-buah petamo Akhaya, kant sidok dah ngabdikan dirik sidok ntuk pelayanan urank-urank kudus), ¹⁶ supayo ikau pun tunduk teadop urank-urank tokuh tuk kant teadop setiap urank yo bekrejo besamo kant bejorih lelah. ¹⁷ Aku besukocita atas kedatangan Stefanus, Fortunatus, kant Akhaikus dongah sidok dah ngelengkap'ik pei yo kurang d'rik ikau. ¹⁸ Dongah, sidok nyegarkan rohku kant roh kau. Tam dongah nyin, hargo'ik'ak urank-urank tokuh nyin. ¹⁹ Jemaat-jemaat di Asia dah nyampaikan salam ntuk ikau. Akwila kant Priskila nyampaikan salam hangat d'lom Doto kepado kau besamo ngan jemaat di umah sidok. ²⁰ Semuo sau'd'ro di tuk ngirim salam ntuk kau. Ucapkan salam sutik ngan yo lain ngan ciuman kudus. ²¹ Aku, Paulus, nulis salam tuk ngan jeriku surank. ²² Mun ado urank yo com ngasih'ik Doto tekutuk'ak Io. Oh Doto, d'tang'am! ²³ Anugerah Doto Yesus nyerto'ik ikau ²⁴ Kasihku nyerto'ik ikau semuo d'lom Yesus Kristus. Amin.