¹ Kerna yak, jadilah penurut-penurut Tuhan Allah, upa anak-anak te de kasihi. ² Iduplah dalam kasih, upa Kristus mengasihi kita dan merik ke dirik-E untuk kita sebagai persembahan te harum bagi Tuhan Allah. ³ Tapi anang bisik percabulan, bala te mulah penyaik, serakah, de tutur keh pun anang kerna yak nadai patut bisik de antara urang-urang kudus. ⁴ Anang bisik tutur te jaik, tutur te budu, bebutik te kasar -- te nadai patut -- sebalik e ucap ke sukur. ⁵ Kerna kitak udah ketau antik urang cabul, urang nadai suci, atau urang serakah te nyembah kebala berhala. ⁶ Anang bisik urang te ngakal kitak ngau tutur te nadai bisik reti kerna te macam yak te nyuruh Tuhan Allah ringat ngau anak-anak kurang ajar. ⁷ Jadi anang bekaban ngau sidak. ⁸ Dulau kitak termasuk dalam idup lamak, tapi pituk kitak idup dalam terang Tuhan Allah. Idup sebagai anak-anak terang ⁹ kerna buah ari terang yak upa kebaikan, keadilan, ngau kebenaran, ¹⁰ udah yak ngegak nama te tau mulah Tuhan Allah gaga. ¹¹ Anang tamai urang mulah nama te jaik kerna yak nadai bisik ngasil ke buah nama-nama, tapi sebalik e pulah nama te baik. ¹² Kerna, angak nutur hal-hal te sidak pulah pun mulah malu besai. ¹³ Tapi nama te de bukak oleh terang pasti tepedak. ¹⁴ kerna nama te de pedak depan mata yak terang. Yak sebab e de tutur kai, "was, ooo kitak te tukang tinuk! Bangkit ari antara urang mati, dan Kristus kak besinar atas kitak." ¹⁵ Jadi, labak pedak tipa kitak idup, anang upa urang budu, jadilah bijak. ¹⁶ Guna kai waktu te bisik ngau sebaik-baik e kerna ari-ari pituk jaik. ¹⁷ Kerna yak, anang jadi budu tapi kitak alah ngerti kehendak Tuhan Allah. ¹⁸ Anang minum mabuk kerna yak nadai pantas, sebalik e penuhlah ngau Roh. ¹⁹ Betutur ngau te bukai dalam mazmur, kidung pujian dan nyanyian rohani, menyanyilah, pulah lagu pujian kepada Tuhan Allah ngau segenap hati kitak. ²⁰ Tutur kai sukur dalam segala hal ngusung Allah Apai dalam nama Tuhan kita, Kristus Yesus. ²¹ Tunuk ngau sidak te bukai dalam takut ngusung Kristus. ²² Bini-bini, tunuk ngau laki upa ngau Tuhan Allah. ²³ Kerna laki adalah kepala ari bini, upa Kristus adalah kepalak ari jemaat, yaitu tubuh-E dan Ia kediriklah Juru Selamat kita. ²⁴ Upa jemaat tunuk ngusung Kristus, upa yak ugak bini tunuk ngau laki dalam segala hal. ²⁵ Bala laki, kasihi bini kitak upa Kristus mengasihi jemaat dan merik ke dirik-E bagi jemaat, ²⁶ untuk mengudus kai sidak ngau meresih kai sidak melalui Firman Tuhan. ²⁷ Antik udah upa yak, Kristus tau mempersembahkan jemaat ngusung dirik Ia kedirik dalam kemuliaan, nadai sik kutur, atau kusut, sehingga jemaat jadi kudus nadai bisik penyalah. ²⁸ Upa yak ugak, kebala laki alah mengasihi bini e upa tubuh ia. Ia te mengasihi bini e, pasti mengasihi dirik ugak. ²⁹ Kerna, nadai bisik urang te bencik ngau tubuh dirik e tapi pasti de rawat e baik-baik. Upa yak ugak te Kristus pulah ngau jemaat ³⁰ kerna kita adalah anggota-anggota tubuh Kristus. ³¹ Yak am sebab e, surang laki nudi ke apai-inai dan sengkalik ngau bini sehingga sedua jadi sutik tubuh. ³² Resia tuk besai, dan aku nutur kai tuk kerna bisik hubungan antara Kristus ngau jemaat. ³³ Ulih, sugai kai masing-masing kitak mengasihi bini kitak upa dirik kitak dan bini harus hormat ngau laki e.