¹ Tarus ku nee'k malaekat nang kalima nyiup sangkakalae, aku nee'k sabuah bintakng nang jantu'k dari angit ka atas bumi, ba ka ia dimareatn anak kunci ubakng jurang maut. ² Tarus ia muka'k pintu ubakng jurang maut koa, lalu naiklah asap dari ubakng koa aya asap tongko'k aya'k, ba mataari, ba angit jaji galap di asap ubakng koa. ³ Dari asap koa bamuokatnlah buntak-buntak ka dunia, ba ka buntak-buntak koa dimareatn kuasa sama aya kuasa na' kala ka dunia. ⁴ Ba ka na' buntak koa dimasatn, biar ame ngarusakatn rumput-rumput ka dunia gek tumbuh-tumbuhan gek batakng-batakng kayu, tapi kahe manusia nang ina'k make materai Jubata ka kaningnge. ⁵ Ba ka na' buntak koa dimuihan buke'k untu' munuh manusia, tapi kahe nyiksa manusia lima buatn lamae, ba tarus siksaane koa aya gigitatn kala, kade' ia nyanget manusia. ⁶ Sawaktu koa urakng-urakng ngagui'k mati, tapi ina bisa, ba kabatnne mao'k matia'k, tapi kamatian koa dari. ⁷ Model buntak koa aya tolen kuda nang dinyiapatn untu' baparang, ba ka atas kapalae ada sesuatu aya tolen mahkota amas, ba muha e sama aya muha manusia, ⁸ ba buuk'ke aya buuk nang bini ba gigie aya gigi singa, ⁹ ba dadae aya tolen baju parang, ba bunyi seap'pe aya tolen bunyi kereta-kereta nang dinarik manyak kuda, nang aya agik ampus ka tampat baparang. ¹⁰ Eko'k e tolen aya kala ada ba panyanget'te, ba ka daapm eko'k e koa ada kuasa e untu' nyakiti'k manusia, lima buatn lamae. ¹¹ Raja nang marentah ia koa malaekat jurang maut; damae daapm bahasa Ibrani Abadon ba ka daapm bahasa Yunani Apolion. ¹² Bencana nang doho'k udah lewat. Angkitn dah mao'k nyoso dua bencana agik. ¹³ Lalu malaekat nang kaanam nyiup sangkakalae, aku nangar suara kauar dari kaampat tanuk mesbah amas nang kaadapatn Jubata, ¹⁴ lalu bakata ka malaekat nang nyinggi'ik sangkakala koa: " Lapasatnlah kaampat malaekat nang taikat samak sungai efrat aya'k koa". ¹⁵ Tarus ia ngalapasatn kaampat malaekat nang udah dinyiapatn untu' jam ba ari, buatn ba tahutn untu' munuh sapartalu dari umat manusia. ¹⁶ Jumbalah tantara koa ada dua puluh ribu laksa pasukan bakuda; aku nangar jumbalahe. ¹⁷ Aya koalah aku nee'k daapm paneaanan koa kuda-kuda ba urakng-urakng nang naiki'k ia; makei'k baju parang, merah api ba biru, ba kuning marerang warnae; kapala kuda-kuda koa sama aya kapala singa, ba moot'te kaluar api, asap ba marerang ¹⁸ Di talu bencana nyia matiatn sapartalu dari manusia, yakoa di api, ba asap ba marerang, nang kauawar dari moot'te. ¹⁹ Barang kuasa kuda-kuda koa ada ka moot'te ba ka daapm eko'k e. Barang eko' e sama aya uar; ada bakapala, ba kapalae koalah ia ngarusakatn. ²⁰ Tapi manusia lain, nang ina'k mati di bencana koa, ina uga'k batobat dari perbuatan'ne: kabatnne koa ina' baranti nyambah berhala-berhala dari amas ba perak, dari timaga, batu ba kayu nang ina'k bisa nee'k ba nangar gek pun bajaatn, ²¹ ba kabatnne koa ina'k batobat dari munuh, sihir, percabulan, ba mancuri.