¹ Apas koa aku nee'k ampat malaekat badiri ka ampat panjuru bumi lalu nahan kaampat mata angin, biar ame ada angin nang disiup ka darat, gek ka laot, gek ka puhutn-puhutn kayu. ² Ba aku nee seko'k malaekat lain nang muok dari tampat mataari tarabit. Ia ngicakng materai Jubata nang idup; lalu ngampak ba suara nang nyarekng ka na' ampat malaekat nang di nugasatn koa untu' ngarusakkatn bumi ba laot, ³ jare: "Amelah ngarusakkatn bumi gek laot gek pun batakng-batakng kayu sanape'k kami meteraiatn amba-amba Jubata kami ka kaningnge!" ⁴ Ba aku nangar jumbalah kabatnne nang dimeteraitn koa: saratus ampat puluh ampat ribu nang udah dimeteraikan, dari samua suku katurunan Israel. ⁵ Dari suku Yehuda dua balas suku nang dimeteraiatn, dari suku Ruben dua balas ribu, dari suku Gad dua balas ribu, ⁶ dari suku Asyer dua balas ribu, dari suku Naptali dua balas ribu, dari suku Manasye dua balas ribu, ⁷ dari suku Simeon dua balas ribu, dari suku Lewi dua balas ribu, dari suku Isakar dua balas ribu, ⁸ dari suku Jebulon dua balas ribu, dari suku Yusup dua balas ribu, dari suku Benyamin dua balas ribu. ⁹ Apas dari koa aku nee'k: sasidie, sete'k pakomoan urakng manyak nang ina'k taetong manyakke, dari sagala bangsa- suku-kaum ba bahasa, badiri ka adapatn tahta Anak Domba, make jubah putih ba nyingii'k daukng-daukng palem ka kokotte. ¹⁰ Ba suara nang nyarekng kabatnne bakata: "Kasalamatan untu' Jubata kami nang duduk ka atas tahta ba untu' Anak Domba!" ¹¹ Tarus samua malaekat badiri ngulilingi tahta ba na' tua-tua ba barampat mahluk koa; kabatnne basujut kaadapatn tahta koa lalu nyambah Jubata. ¹² sambi bakata: Amin! puji-pujian ba kamuliaan, ba hikmat ba sukur, ba hormat ba kakuasaan ba kakuatan untu' Jubata diri'k sampe salama-lamae! Amin" ¹³ Seko' dari antara tua-tua koa bakata ka aku: "Saegek dangan nang make jubah putih koa ba dari mae gek ia atakng?" ¹⁴ Tarus jaku nee'k ia; "Tuanku, tuan nang naun." Lalu ia bakata ka aku" "Kabatnne koa urakng-urakng nang kaluar dari kasusahatn nang sidi miah; ba kabatnne udah nyasah jubahhe ba minjawat ia putih ba darah Anak Domba. ¹⁵ Barang koa kabatnne badiri kaadapatn tahta Jubata ba ngalayani'k Ia siakng maam ka Bait suci-E. Ia nang duduk madiriatn kemah-He ka atas kabatnne. ¹⁶ Kabatnne ina' akan ngarasaatn kapaaratn ba aus agik, ba mataari gek angat ina akan ngantam kabatnne koa agik. ¹⁷ Barang Anak Domba nang ka tangah-tangah tahta koa, mao'k nuntun ba ngejengan kabatnne ka mata aik kaidupan. Jubata akan ngapus samua aik mata dari mata kabatnne.'