¹ Lalu ia nojokatn ka aku sungai ai'k kahidupan, nang jaranih aya kristal, ba ngalir ka luar dari tahta Jubata ba tahta Anak Domba koa. ² Ka tangah-tangah maraga koa, yakoa ka sabarang-manyabarang sungai koa, ada puhutn-puhutn kahidupan nang babuah dua balas kai, tiap-tiap buatn sakai; ba daukng kayu-kayu e koa dimake untu' nyamuhatn bangsa-bangsa. ³ Tarus ina'k akan ada agik kutukan. Tahta Jubata ba tahta Anak Domba akan ada ka daapmme ba amba-amba-E akan ba ibadah ka-Ia, ⁴ ba kabatnne ana akan nee'k muha-E, ba dama-E akan tatulis ka kaningnge. ⁵ Maam ina'k akan ada agik ka naun, ba kabatnne ina'k mararuatn cahaya lampu ba cahaya mataari, barang Tuhan Jubata nang narakngi'k kabatnne, ba kabatnne akan mamarentah jaji raja sampe salama-lamae. ⁶ Lalu Ia bakata ka aku: "Pakataantn-pakataatn nyia batol ba banar, Tuhan, Jubata nang mare'k roh ka na' nabi-nabi, udah ngutus malaekat-Te untu' nojokatn ka amba-amba-E ahe nang harus sabijakke tajadi." ⁷ "Sasidie Aku akan atakng bijak. Bahagialah urakng nang nuruti'k pakataatn-pakataatn nubuat kitap nyian!" ⁸ Aku Yohanes, akulah nang udah nangar ba nee'k samua koa. Apas ku nangar ba nee'k koa, aku tasungkur ka adapatn paha malaekat, nang udah nojokatn samua e koa ka aku, untu nyambah ia. ⁹ Tapi ia bakata ka aku: "Ame babuat ayanyian! Aku nyian amba, sama aya kao ba saudara-saudara nyu, na' nabi ba samua nang nuruti'k sagala pakataatn kitap nyian. Sambahlah Jubata!" ¹⁰ Tarus ia bakata ka aku: "Amelah dimeteraiatn pakataatn-pakataatn nubuat dari kitap nyian, barang waktu e udah samak. ¹¹ Saepun nang babuat jahat, biarlah ia tarus babuat jahat, saepun nang kotor, biarlah ia tarus kotor; ba saepun nang banar, biarlah ia tarus babuat nang banar, saepun nang kudus, biarlah ia tarus ngudusatn diri'k e!" ¹² "Sasidie Aku akan atakng bijak, Aku ngicakng upah-Ku untu' maasatn ka satiap urakng sasuai kalakuanne. ¹³ Akulah Alfa ba Omega, Nang Pertama ba Nang Ahir, Nang Doho'k ba Nang Dudi." ¹⁴ Repolah dangan nang ngalakukan parentah-He. Kabatnne koa akan namuan hak atas puhutn-puhutn kaidupan ba taama'k ngalaui'k pintu-pintu gerbang ka daapm kota'k koa. ¹⁵ Tapi na' asu'k-asu'k ba tukang-tukang sihir, urakng-urakng sundal, urakng-urakng pambunuh, panyambah-panyambah berhala ba satiap urakng nang pangalok, nang suka ngaloki'k, diapm kauas. ¹⁶ "Aku, Yesus, udah ngutus malaekat-Ku untu' mare' kasaksian parihal samuae nyian ka kao untu' jemaat-jemaat. Aku lah combok, yakoa katurunan Daud, bintakng nang mangkilat." ¹⁷ Roh ba panganten-panganten koa bakata: "Ije'klah!" Ba saepun nang nangaratn nyian, haruslah ia bakata: "Ije'klah!" Ba saepun nang aus, haruslah ia atakng, ba saepun nang mao'k, haruslah ia naap ai'k kaidupan nyian cuma-cuma. ¹⁸ Aku basaksi ka samua urakng nang nangar pakataatn-pakataatn nubuat dari kitap nyian: "Kade'k ada urakng nang nambahi'k sete'k pun ka pakataatn-pakataatn nyian, Jubata akan nambahatn ka ia bencana-bencana nang tatulis kadaapm kitap nyian. ¹⁹ Ba kade'k ada urakng nang ngurangi'k sete'k dari pakataatn-pakataatn dari kitap nyian, Jubata akan naap bagiatnne dari puhutn kaidupan ba dari kota'k kudus, aya nang tatulis daapm kitap nyian." ²⁰ Ia nang mare'k kasaksian parihal samua nyian, bafirman: "Auk, Aku atakng bijak!" Amin, ataknglah, Tuhan Yesus! ²¹ Kasih karunia Tuhan Yesus nyaratai'k diri'k samuae! Amin.