¹ Tarus ku nee'k seko' malaekat turutn dari saruga nyingii'k anak kunci jurang maut ba sote'k rante aya'k ka kokotte; ² ia nangkap naga si uar tuha koa, yakoa Ibalis ba Setan. Ia ngikatatn saribu tahutn lamae, ³ lalu nabakatn ia ka jurang maut, ba nutup jurang maut koa tarus di nyegel ka atase, biar ia ame agik nyasatatn bangsa-bangsa, sanape baahir masa saribu tahutn koa; apas dari pada koa ia akan dilapasatn untu' sadikit waktu lamae. ⁴ Tarus aku nee'k tahta-tahta ba urakng-urakng nang duduk ka atasse; ka kabatnne koa dinyarahatn kuasa untu' ngahakimi'k. Aku nee'k uga'k jiwa-jiwa kabatnne, nang udah dinatak kapalae barang di kasaksian soal Yesus ba karna pakataatn Jubata; nang ina'k nyambah binatang koa ba patungnge ba nang ina'k uga'k narima'k tandae ka kaning ba kokot kabatnne; lalu kabatnne koa idup agik ba mamarentah jaji raja sama-sama ba Karistus untu' masa saribu tahutn. ⁵ Tapi urakng-urakng mati nang lain ina'k bangkit sanape'k baahir masa nang saribu tahutn koa. Nyianlah kabangkitan pertama. ⁶ Bahagia ba kuduslah ia, nang namu bagiatn daapm kabangkitan nang doho'k koa. Kamatian nang kadua ina'k bakuasa agi'k ka atas kabatnne, tapi kabatnne akan jaji imam-imam Jubata ba Karistus, ba kabatnne akan mamarentah jaji raja ba sama-sama ba Ia. saribu tahutn lamae. ⁷ Apas masa saribu tahutn koa baahir, Ibalis ana akan dilapasatn dari pinjarae, ⁸ tarus ia akan ampus nyasatatn bangsa-bangsa ka ampat panjuru bumi, yakoa Gog ba Magog, ba ngomoon kabatnne untu' baparang jumbalah kabatnne koa sama aya jumbalah pasir ka laot. ⁹ Tarus naiklah kabatnne ka saluruh dataran bumi, lalu ngipong pakemahan tantara urakng-urakng kudus ba kota'k nang dingasihi'k koa. Tapi dari angit turutnlah api ngangusatn kabatnne, ¹⁰ tarus Ibalis, nang nyasatatn kabatnne, dinabakatn ka daapm laotan api ba marerang, yakoa tampat binatang ba nabi palsu koa, ba kabatnne koa akan disiksa siakng maam sampe salama-lamae. ¹¹ lalu aku nee'k tahta putih nang aya'k, Ia duduk ka atasse. Dari adapatn-Ne ilanglah dunia ba angit ina'k ditamuan agik tampatte. ¹² Ba aku nee'k urakng-urakng mati aya'k enek, badiri ka adapatn tahta koa. Tarus dimuka'k samua kitap. Ba dimuka'k ugak sabuah kitap lain, yakoa kitap kahidupan. Tarus urakng-urakng mati dingakimi'k sasuai perbuatanne, sasuai ahe nang dinulis ka daapm kitap-kitap koa. ¹³ Lalu laot nyarahatn urakng mati nang ada kadaapmme, maut, ba karajaan maut nyarahatn urakng-urakng mati nang ada kadaapmme, ba kabatnne dingakimi'k masing-masing sasuai perbuatanne. ¹⁴ Tarus maut ba karajaan maut koa dinabakatn kadaapm api. Koalah kamatian kadua: laotan api. ¹⁵ Ba samua urakng nang ina'k ditamuan damae tatulis ka daapm kitap kahidupan koa, dinabakatn ka daapm laotan api koa.