¹ Tarus aku nee'k seko' malaekat lain nang kuat turutn dari saruga, basalobong rahu, manturaja ada ka atas kapalae ba muhae sama aya mataari, ba pahae aya tihakng api. ² Kadaapm kokot'te nyingi'ik sabuah golongan kitap enek naang tabuka'k. Ia mantinyakatn paha kananne ka atas laot ba paha keba'k' e ka atas bumi, ³ tarus ia ngampak ba suara nyarekng sama aya tolen singa nang ngaraong. ⁴ Lalu apas ia ngampak, katujuh guntur koa babunyi. Apas tujuh guntur koa babunyi, aku mao'k nulisatn ia, tapi aku nangar suara dari saruga bakata: "Rahasiaatnlah ahe nang dingataatn di tujuh guntur koa, ame kao tulis! ⁵ Tarus malaekat nang ku nee'k badiri ka atas laot ba ka atas bumi, ngangkat kokot' kanan'ne ka atas angit, ⁶ lalu ia basumpah demi Jubata nang idup sampe salama-lame, nang udah minjawat angit ba samua isi'k e, dunia ba sagala isi'k e, ba laot ba samua isi'k e, jakatae: "Ina'k akan ada ditunda agik! ⁷ Tapi sawaktu bunyi sangkakalae dari malaekat nang ka tujuh, yakoa kade' ia nyiup sangkakalae, akan ganaplah kaputusan rahasia Jubata, aya nang udah Ia mare'k nauan ka amba-amba-E, ka na' nabi." ⁸ Suara nang kunagar dari angit koa, bakata ugak ka aku, jare: "Ampuslah, taaplah golongan kitap nang tabuka'k ka kokot malaekat, nang badiri kaatas laot ba ka atas bumi koa." ⁹ Tarus aku ampus ka malaekat koa ba minta'k ka ia, biar ia mareatn golongan kitap koa ka aku. Jare nee'k aku: "Taap ba makatnlah; ia akan minjawat parut nyu tarasa pahit, tapi daapm moot nyu ia ana tarasa manse'k aya madu." ¹⁰ Lalu aku naap kitap koa dari kokot malaekat koa, ba makatni'k ia; ka daapm tarasa manse'k aya madu, tapi apas aku makatni'k parutku jaji pahit rasae. ¹¹ Tarus ia bakata ka aku: "Kao harus banubuat agik ka manyak bangsa-kaum ba bahasa ba ka raja-raja."