¹ Urak'ng manyak nangar ayamae kaidupat'n kita' batamu kampak'ng ba urak'ng lain, buke' kahe seko' tapi manyak urak'ng nang siang ayakoa, nang nape' suah diurak'ng pinjawat sekalipun koa urak'ng nang nape' kanal ka Jubata, sampe ada urak'ng nang niduri uwe'e, bini apa'e. ² Dah ayakoa, tatap idup kita' sombong sabai' ka urat. Labih baik kita' buak'ng jauh-jauh urak'ng nang ayakoa, daripada nya idup ina' sinunuh ka antara kita'. ³ Biar ba jare tubuhku nyian ina bisa kita' tee', tapi secara rohani aku sau ada ihane onto' kita'. Aku dah mare' ukuman ka ia, ka urak'mg nang idup ina sinunuh nyia tai. ⁴ Kade' kamie ari diri bakomo ka daap'm roh, kita' ada sirage ba aku, ka daap'm kakuatan kuasa Yesus, Jubata diri'. ⁵ Urak'ng nang koa arus diri' sarahat'n ka Ibalis sambi nyampado dama Jubata Yesus, supaya rohe bisa salamat uga pas ari Jubata atak'ng dudi ana. ⁶ Kakayaat'n nyu sidi ina' gagas. Nau'an ge' ina' kita', sabantar agi' ia koa ana bacampur samua'e aya tapuk'ng ba campur rata ba ragi. ⁷ Buak'ng ragi dah lama koa, supaya kita jaji campurat'n tapuk'ng nang barahu, barang ga' kita' koa dah ina' baragi. Anak Domba Paskah diri', Yesus Kristus, udah dinyambaleh. ⁸ Angke kuihanlah, ije' diri bagawe ngarayaat'n ia, barang ga' diri' buke' ragi nang lama, buke' ragi kajahatat'n, buke' ngicak'ng tabeat nang jahat tapi ba koeh nang ina' baragi, nang kuihanlah nang dinyabut samua nang banar. ⁹ Ka daap'm tulisanku nang dee dah kumatakat'n ka kita' supaya ame barayuk'ng ba urak'ng-urak'ng nang ina sinunuh tabiate. ¹⁰ Nang kumaksutat'n koa buke' ba samua urak'ng nang idup ina' sinunuh secara umum ka taino nyian, atau ba urak'ng nang kadik, urak'ng nang pangalok atau ge' urak'ng nang suka nyambah sigala na' batu ato ge' kayu nang aya', barang ase kita' ayakoa , kita' arus ningaat'n taino nyian. ¹¹ Ahe anang aku nulisat'n ka kita' nyian supaya kita' ame barayuk'ng ba urak'ng, nang biar ba jare nyabut diri'e page kamaru', tapi kabat'nne koa idup kampak'ng ba urak'ng nang buke' aki binie, idup ina' sinunuh, miah kadike, nyambahi' sigala batu ba kayu nang aya', suka mitnah dangan, panyocok arak, suka bataapi' jukut dangan, ba urak'ng nang ayakoa ame kita' rayuk'ngi', aduh agi' kita' makat'nna sirage-rage ba ia, nang koa ame sidi. ¹² Sae me nang mare' aku kuasa onto' nyidang ba ngukuma' kabat'nne, nang ada ka luar pakomoan pangikut Jubata? ¹³ Kabat'nne nang ada ka luar pakomoan pangikut Jubata ana samu'e mao disidang Jubata. Da' gajang dari urak'ng nang sau minjawat kajahatat'n ka antara kita'.