¹ Tabe teke Paulus, ulun sa na panjara gene Yesus Kristus, nihi teke Timotius, puloknai isa iman taka, gi Filemon, kawal nihi hengau pelayanan sa kami sayangi, ² nihi gi Apfia, puloknai taka, lahui gi arkhipus, hengau sa perjuangan taka, nihi ge umat sa bakumpul tangar lewu kayo. ³ Anugrah nihi damai sejahtera ge kayo teke Allah, Ambah taka, nihi teke Tuhan Yesus Kristus. (Ngantuh Syukur gene Iman nihi Kasih Filemon) ⁴ Kuki tarus basyukur ge Allahki waktu kaingat kayo huang doa-doa kuki, ⁵ sabab kuki ngarengei hal iman nihi kasih sa naan ta kayo huang Tuhan Yesus nihi gi kaluhan ulun barasih. ⁶ Kuki badoa ge perkumpulan iman kayo jari efektif gi pengetahuan sa penu setiap hal maeh sa naan tangar takam ge Kristus. ⁷ Kuki tu'u sanang nihi tahibur gene kasih kayo gene nangkah kayo, puloknai, atei ulun-ulun barasih nasegarkan waleng. (Pangalako Paulus Masalah Onesimus) ⁸ Gene hio, biarpun kuki naan keyakinan hante huang Kristus nihi tau nunyu kayo ngawani inon sa jari keyakinan kayo, ⁹ Tapi gene kasih, lebih maeh amun kuki lako'e gi kayo. Kuki, Paulus sa haot matueh, nihi rahat ii jari ulun sa na penjara gene Kristus Yesus. ¹⁰ Ngalako ge kayo gi anakki, Onesimus, sa kuki haba selama kuki naan ta penjara, ¹¹ sa hindra bakoi baguna gi kayo, tapi andrau ina baguna tu'u, maeh ge kayo ataupun ge kuki. ¹² kuki nunyu aye, wua atei kuki, waleng gi kayo, ¹³ sa sabujur e kakan kuki tahan de muneng hayak kuki sagar aye tau nganti kayo melayani kuki salawah kuki na penjara gene Injil.* ¹⁴ Tapi amun kayo bakoi setuju, kuki bakoi kakan ngagawi inon lei ge kamaehan hio nagawi kayo bakoi gene keharusan, tapi gene kasanangan. ¹⁵ Mungkin alasasn Onesimus na tamoisah teke kayo ge tawelek waktu hiolah supaya kayo tau nerime waleng de salalawah e, ¹⁶ tapi bakoi lagi jari walah, tapi teke hio, aye hio jari puloknai sa na sayang, bakoi ekat khusus ge kuki, lebih lagi ge kayo, maeh huang tenga ataupun huang Tuhan. ¹⁷ Jari, amun kayo nganggap kuki jari hengau isa gawian kayo tarime bo Onesimus sameh kayo narime kuki. ¹⁸ Amun aye haot bahala nihi kayo atawa bautang inon-inon ge kayo, kuki bo nanggung'e. ¹⁹ Kuki, Paulus, nulis iti nihi tangan kuki kakarep: Kuki sagar ngalunas'e tanpa ngantuh inon lei hal utang kayo gi kuki, ayehio welum kayo kakarep. ²⁰ Oi, puloknai kuki, elah bo tangar huang Tuhan kuki kahalu kamaeh teke kayo. Segarkanlah atei kuki tangar huang Kristus. ²¹ Gene keyakinan kuki akan ketaatan kayo, kuki nulis surat iti gi kayo, sabab kuki karasa kayo sagar ngulah labih teke sa kuki lako. ²² Sa mete hio, awat na siap kamar ge kuki gene kuki baharap nangkah doa-doa kayo, kuki sagar naperkenankan waleng gi kayo. (Tabe sa Pangalis) ²³ Epafras, hengau kuki sepenjara huang Yesus Kristus, ngirim tabe ge kayo, ²⁴ kala hio lei Markus, Aristarkhus, Demas, nihi Lukas, hengau-hengau sepelayanan kuki. ²⁵ Anugerah teke Tuhan taka, Yesus Kristus, kira e mampahayak roh kayo.