¹ I gubuak aru nanai Yisu gikas sibi tagur ingka gihan gimpai mpui nkiak banging. ² Ingka garamsagat marikum giba gawahick Yisu, gisunai ingka Yisu gihan giyab in gimpai ingka garamsagat gamunti mangk banging. ³ Anungka Yisu ginia hup santan i hup ram ayang i ginia haga hagan wat garamsagat. Rungan ginia, ''Wayangua! Garam basinta gab gum gihan gini yantang yamuan. ⁴ Gubuak rugan rim yamuan i kitamp, yamuan hiruk gapuruk nangkui banging ingka gaziab giba gigan yamuan anai. ⁵ Yamuan hiruk gapuruk sakuak kurukuan mami kitamp simpim mi aiyah, gahigut aru tak kurinai gikas, I aus, kitamp santan ma gimi hahuan i sakuak kurukuan amuk. ⁶ Ka gubuak maran ini yab ba wagungk, kurinai gamarian gahigut in gapuruk, I aus, kuakian gan gimpai hahuan aru mangan in ma gikua mpui amuk. ⁷ Yamuan hiruk gapuruk hahuan i sai binbin ingka gubuak kurinai kas ayang, sai binbin gikas in gawaya kurinai. ⁸ Yamuan hiruk gapuruk i kitamp mimungk in gikab gar, hiruk gikab gar gisu 100-anai, ingka hiruk gikab gar 60-ganai, ingka hiruk gikab gar 30-ganai. ⁹ Garam gab ringan, rungan nayangua in nakua simpim hup ani.'' ¹⁰ Anungka gingan Yisu garam gan gikantui Yisu gisuni, ''I aus agua ru ginia hup ram ayang i niahup wat garamsagat?'' ¹¹ Yisu gisuntai hup kurinai gan gisuni, ''Agam sampam gam wangan mimungk, i aus, hup guap ayang marikum i parat raham ganungkun ru gikas parat pisit bi agam sib. Ka garamsagat anai ma gararab amuk i parat raham ganungkun gan. ¹² Gisunai in garamsagat wi kua zi hup gangk simpim in kab i sampan gan ingka wayant gan, Anutu yangan ru yakab wat kurinai in kurinai yangan yahuangk nizun. Ka garamsagat wi mami kua simpim zi hup gangk, kurinai yangan maran yasim hup sibangu zi gangk ingka maran yasim awah wah santan kurinai rarab wat mamuan. ¹³ Gisunai in zi ginia hup i hup ram ayang wat garamsagat. I aus, kurinai gararab wah izi gab ayang, ka kurinai ma gararab mimungk amuk ingka gikua simpim hugun wah anai gan amuk. Ingka kurinai gayangua zi hup gangk, ka kurinai gabuningk i hup anai hugun gan. ¹⁴ Aisaia hup nia gayang gikas parat pisit bi garamsagat rugan sunanai, nanai ginia, 'A gua yangan yayangua zi hup gangk, ka agua ma gisangk yayangua simpim amuk in yararab i hugun hup anai gan. Yangan agua yararab wah izi gab ayang, ka agua ma yararab mimungk amuk ingka yararab i hugun gan wah anai gan. ¹⁵ Ingka ginia zua gisuni, i nanai hugun gan tak garamsagat anai sampan gan gikas bumur hugun in kurinai ma gisangk nizun i yayangua hup Anutu gan, ingka gisubi kurinai maran npuk ayang in ma gararab wah mangan amuk, ma gayangua hup mangan amuk, ma wayant nizun i sampan kurinai gan, gisangk kurinai ini kab kirikian i mais ingka yangan zi yamari kurinai.' ¹⁶ Ka agam sampam mimungk i aus agam gararab simpim wah zi gab ayang, ingka gayangua ka wayant simpim i hup zi kab ayang. ¹⁷ Zi ginia nizun wat agam, profet marikum ingka garam mararam mpai wat mamuan gisu nuguan raham i yararab wah agam rarab ayang karuni, ka kurinai ma gararab amuk, ingka gisu nuguan raham i yayangua hup anai agam yangua gayang karuni, ka kurinai ma gayangua gamuk. ¹⁸ Wayangua simpim hup ram ayang hup hugun gan garam rim yamuan. ¹⁹ Garam basinta gayangua hup i Parat raham Anutu gan ingka ma gikab mimungk i sampan ingka wayant gan, nanai gisubi yamuan puruk nangkui banging, abingk garam mais satan giba gahigut arutak in gikupias hup anai i sampan gan. ²⁰ Garam gahigut arutak i kua hup Anutu gan wat sampan mimungk raham, nanai gisubi yamuan puruk hahuan i kitamp sarasiri. ²¹ Garam giku hup Anutu gan ingka bumur i gin gubuak tup aru mangan, ingka ma gikab simpim i sampan ingka wayant gan. Garam rugan sunanai gazagari bumur gahigut, gubuak kirib ayang wat barabin kas ayang. Nanai gisubi yamuan tamp ayang ingka buak gan mpai hahuan tak ka ma gihan gumpin i kitamp amuk. ²² Garam yangua hup Anutu gan ingka kab i sampan ingka wayant gan, ka rungan ru wayant i mpuak sakuak, wah manga mangan kitamp ani gan ingka ma maran huar Anutu ingka gab nangkui Anutu gan. In nanai gisubi yamuan puruk wasak i sai binbin. ²³ Garam kua hup Anutu gan ingka kab mimungk i sampan ingka wayant gan ingka ragia mimungk hup anai. Nanai gisubi yamuan puruk i kitamp mimungk ingka kab gar mimungk. Hiruk gikab gar 100-ganai ingka hiruk gikab gar 60-ganai ingka hiruk gikab gar 30-ganai.'' ²⁴ Yisu ginia hup ram ayang mangan wat garamsagat. Rungan ginia, ''Parat raham Anutu gan nanai gisubi garam ntang yamuan mimungk subi wah ngiri i gum gan. ²⁵ I gubuak garam mari gum giangk sib, anungka ramangk gum gan buman gan giba girim gar sai mais gan awah wasak i giri gum in ru gihan sib. ²⁶ Gubuak giri yamuan puk in tamp ayang ingka gini yakab gar. sai mais awah gikas. ²⁷ Garam gab gum ramangk gum gan giba ginia wat nanai gisuni, 'Suraham, agua gintang gar yamuan mimungk i gum gam, ka i sai mais gikas gisu aus?' ²⁸ Ramangk gum gan ginia, 'buman izi gangk giba gintang sai mais anai, 'Anungka garam gab gum ginia wat Suraham gisuni, 'Agua nuguam yangan agai yahan yatus sai mais anai, amak?' ²⁹ Anungka ramangk gum gan ginia, 'Miayah, agam wangkiti tus ayang, agam kangan katus sai mais wat giri.' ³⁰ Wazagari sai mais wat giri nahuh nantamp yasangk gubuak mpuru ganang kiruak. I gubuak mpuru ganang kiruak kamp sib i gum, zi yangan yania wat garam mpuru ganang kiruak yasuni, ''Wanungk watus sai mais ingka waharu npun i yakati i zah. Ingka wangan wampuru giri gar in wakab i tagur nam izi gangk.''''' ³¹ Gingan Yisu ginia hup ram ayang mangan wat garamsagat. Rungan ginia, ''Parat raham ganungkun gan nanai gisubi tuguat gar abingk garam mangan gikua ingka gintang i gum gan. ³² Tuguat anai gar gan nanai kutik aru mangan wasak i nam gar santan hiruk abingk garam ntang ayang. I gubuak nanai puk in ntamp raham, nanai ginus nam santan gum gan. Nanai gikas raham gisu gai, abingk gaziab awah gisangk yasuang tagur gan i bangkian gan.'' ³³ Yisu ginia hup ram ayang mangan zuah in ginia wat garamsagat gisuni, ''Parat raham ganungkun gan nanai gisu yist abingk sagat basinta kua kutik ingka garumai gin wat flaua kumpiak hirukangkua basinta sangk flaua hup ayang.'' ³⁴ Gubuak sibangu, gubuak Yisu ini niahup wat garamsagat, rungan ginia hup i hup ram ayang tak i niahup wat garam sagat. ³⁵ Rungan gigab gisu nanai gisangk i hup profet basinta haharl wat mamuan. Profet anai ginia, ''Yangan izi yania hup i hup ram ayang, yangan zi yagab hup ram ayang i yania haga hagan wat garamsagat i wah mpai guap ayang, nungk ayang i gubuak zi gab kitamp wat ganungkun.'' ³⁶ Gubuak Yisu zagari garamsagat in ha zuah i tagur, garam gan giba in ginia wat gisuni, ''Gisangk agua yania simpim wat agai i hugun gan hup ram ayang sai mais gan kas i giri gum.'' ³⁷ Ingka Yisu ginia wat kurinai gisuni, ''Garam wi ntang nam gar mimungk nanai Garam Gariak gan.'' ³⁸ Gum nanai kitamp ani, ingka nam gar mimungk nanai garam ragia hup Anutu gan, ka sai mais nanai garam gab nangkui mais ingka ragia hup satan gan. ³⁹ Ingka nanai buman wi ntang sai mais, nanai satan. Gubuak mpuru nam kamp i gum, nanai kitamp ani zugub ayang gan. Ingka garam mpuru nam nanai angira Anutu gan. ⁴⁰ I su karu nanai gisu garam yampuru sai mais in yakati zah, Anutu yangan yampai guzun in yapak garamsagat sibangu i gubuak kitamp zugub ayang. ⁴¹ Garam Gariak gan yangan yasaguar angira gan yahan ingka kurinai yangan yakua pias wah sibangu kab garam puruk i mais, ingka garamsagat sibangu wi ringa hiang i hup Anutu gan. ⁴² Angira yangan yarim garamsagat anai yahan warangk i zah raham, abingk kurinai yangan yakua kukuap, ingka yarang ayang, ingka yagara nihuan gan. ⁴³ I garamsagat mararam yangan yabaruru yasu gubuak rim ayang i ganungkun Anutu gan. Garam gab ringan, nanai nayangua ingka nakua simpim hup anai zi nia gayang. ⁴⁴ Anutu parat raham gan gisubi wah basinta mimungk aru mangan, abingk garam basinta garui gin i kitamp haiin ini yagab gum. Rungan girah kitamp in gahumpun zuah wah mimungk aru mangan anai, gingan rungan gihan gasaguar wah gan sibangu ingka giba zuah ingka girim sakuak i kitamp haiin anai. ⁴⁵ Gisunai tak parat raham Anutu gan mimungk aru mangan ingka gisubi garam gini yakab sakuak i pel mimungk abingk gar gan ru wagungk. ⁴⁶ Gubuak rungan rarab pel basinta mimungk aru mangan, rungan gihan gasaguar wah sibangu rungan gab ayang ingka gikua sakuak gihan girim i pel anai. ⁴⁷ Ingka zuah, Parat raham Anutu gan gisubi garam basinta gini yakua bipi in girim haikuaing i mpui ingka gikua bipi marikum ruga rugan. ⁴⁸ Gubuak haikuaing huangk ayang, anungka garam garui bipi gawantir haikuaing giba mangk banging. Rungan gimpahub in gikua bipi mimungk ingka gikab i haiyak,ka bipi hiruk ma mimungk rungan girim i gihan. ⁴⁹ I kitamp zugub ayang gan, nangkui sukaru nanai yangan yakas i garam, angira yangan yakupias garam mais wasak i garam mararam. ⁵⁰ Kurinai yangan yarim garam anai yahan warangk i zah raham, kurinai yangan yakua kukuap raham ingka yarang ayang ingka yagara nihuan gan.'' ⁵¹ Anungka gingan Yisu gakantui garam gan gisuni, ''Agam gikua simpim hugun gan hup ram ayang zi nia harab wat agam awah, ahin? Ingka garam gan ginia, ''ihih.'' ⁵² Yisu ginia wat kurinai gisuni, garam wi yangua simpim hup ram ayang ani ingka su garam Parat raham Anutu gan, kurinai gisu ramangk tagur gan. Ramangk tagur gan gikua wah mamuan ingka harih i tagur nam gan tak. ⁵³ Gubuak Yisu nia wat garamsagat i hup ram ayang marikum sib, Yisu wat garam gan gazagari parat anai in gihan. ⁵⁴ Kurinai gihan Nasaret Yisu parat wain gan. Rungan gihan i tagur sunta Yuda gan ingka ginia haga hagan wat garamsagat i hup Anutu gan. Gubuak garamsagat yangua i hup gan ingka rarab marahahiang rungan gab ayang, kurinai gaku ta mirun in ginia, ''Garam aruni gikua wayant mimungk ingka maran rarab ayang ingka kurukuan gab marahahiang ani abingka? ⁵⁵ Nizun garam aruni nanai kapenta gariak gan, ahin? Nizun rinangk gan nanai Maria ingka raingk was gan, nanai Jems, Yosep, Saimon ingka Yuda, ⁵⁶ wat nahungk was gan, sibangu tak gimpai bi agi i nani, ahin? I rungan gikua wayant mimungk anai ingka maran rarab ayang ingka kurukuan gab marahahiang anai i abingka?'' ⁵⁷ Kurinai sampan barabin i wah anai Yisu gab ayang, ka Yisu ginia wat kurinai gisuni, ''Garamsagat hiruk manga mangan ingka parat mangan gikua mimungk i profet basinta, ka kuri nizun profet anai gan ingka i parat wain gan tak, kurinai ma gisangk gikua nanai mimungk gamuk.'' ⁵⁸ Rungan ma gigab marahahiang marikum i bi nanai i aus, kurinai ma bumur i Yisu gamuk.