¹ Oilo vola, tabarabara gu la hategu eau poutali amutou, la mogela taku mela Kraon, oilo tela gauru alele magiri vagari oilo tela Uru, tabarabara gu la hategu. ² Eau mera galoloa le Euodia, me eau meramera te Sintike, via la gabutala gira ge isamoli oilo te Uru, ³ Asele, eau tahi eme, la imala tomi etala vituga tomi. ge visuli egite hatavile ale amite vigolu vikapop tela valolo la merera, vitomi le Kelemen me egite tomi ale amite vigolu tomi, la isa gite tomi oilo ti la buku la mahulila. ⁴ La imala tomi amuto ge sagege oilo tela Uru, eau ge vei loua, sagege. ⁵ Amuto ge vahililo giteu la valua la pou tahola mela tia madila egite ge rovia, la Uru hagavi sele ti, ⁶ Umala gabutala papahi tela paga isasa, alamoli, oilo tela papaga tomi vahari la kilaka vikapopo mela vei tahola, la tilahi taume tomi e Deo tai oio ge rovia. ⁷ Me la tia madila te Deo, ale polotaro tomi la mari pahila, age magiri robo la hatemu mela gabutala mu oilo te Kraist Isus. ⁸ La tapasila, tabarabara gu, erese la papaga eia sele, erese la papaga la tilogo oio vola, me erese la papaga eia matata, erese la papaga eia maroka, erese la papaga la magasala oio vola, erese la papaga la irerela tali taho, mae la paga isa oio tartigi sele, mae la paga isa oio etato ge vesalea, gabutala mulimulia egiteu la papaga alele, ⁹ La papaga ale eme vimari tila eme abi tia ale eme lolo tia me ale eme hilo tia omai taku, eme ge igo la papaga alele, me e Deo la tia madila ge vikapopo le emei. ¹⁰ Eau sagege peho sele oilo tala Uru la vuhula gomai ti la tapasila amuto vahalaba tilou la masaga muto somai taku. ale pala amuto gabutala eau, alamoli la ba ale amuto ge koli eau ouka. ¹¹ Eau kama vevei la papaga aleie via eau omai pou la savelela. eau rovi ti la imoimola mahulila oilo tela imala tikumula. ¹² Eau mata militia ale ge pou la savelela, me eau mata muliti tai ti ale ge tahoka usu. oilo la gauru tomi me oilo la papaga tomi eau mari ti la gauru kovula ale ge ali maru me ale ge pou la vitolola. ¹³ Eau koramuli ge igo tomi la papaga tomi oilo tela tahalo ale abia gu la vagarigarila. ¹⁴ Oilo vola, amuto paki taho sele ge magiri tomi le eau oilo la tikumula tegaku. ¹⁵ Amuto Pilipai rovia mae oilo la siloko la lotu, la imala eau heletaro e Mesedonia, la lotu isa kama visuli eau oilo la ba tela vabila me ale tai ge abi la visuli me ale amuto moli. ¹⁶ Oio tai la imala ale eau oilo e Tesalonika, amuto sova la visulila tela savelela taku tagara usu, ¹⁷ Akama via eau mata la vabila. ouka, eau pamuli la vavua ale ge kusi ge sibitala usu peho oio la tilau tamutou. ¹⁸ Eau abi tomi ti la papaga tomi oilo ale viruru,ale loata lou vola, igoie eau abi taho tomi la rova eau abia loio te Epaproditus la papaga ale amuto sovea gu, egite mali vili mae la Aroma, la vabila ale e Deo masasga tavua me eia igo sagege sele eia. ¹⁹ E Deo taku ge abi tomiamu la rova eme savelea loio tela vuliti mela marasala tetala oilo te Kraist Isus. ²⁰ Igoe soio te Deo tama gatou ge la marasala la kaluvula ge ouka. Amen. ²¹ Sagege robo tomi egite la valua te Deo ale maroka oilo te Kraist Isus. egite tabarabara gu ale vikapopo me le eau sagege robo amutou. ²² Egite tomi la valua te Deo ale maroka omaie sagege robo amutou, ale uru sele egite ale oilo la luma te Kaesa. ²³ La gilogo tela Uru e Isus Kraist ge vikapopo mela kalulu mutou.