¹ Nagah nagan tugwahtiqan abeb ya ime a ta lehim angelo aweweqmo og ago abeqil aweweqmo nab tursa ya gibiy. In tim aweweqmo og abeqil ban sibayta na wasihim tur yaqay, tim na leheq ogib teq kamisib a hi sibad teq in ay araq a hi woldaqmo haqad. ² Sa teq angelo ta araq saw zeq gwalaqta ban osim bolsa ya ahol way. Na in God kayeqmo osaqta na ago atowun wazim ad bolyaq. Bolad in atoranmo lileyim angelo aweweq God zaway neqan in og teq kamis inaq gimeqin tongo osayta na gibilan. ³ In bilam, ne og teq kamis teq ay hidmo hi gimeqin toniysa ham. I gigo God ago kabibiy on mataw gimaqbelab i tow emid teq ham. ⁴ Ari in on mataw ganim diq gimaqbelab tow emiyta na ya hurit. Na in Jekob atatniz 12 na gigo gem bunmo gigo hib Isrel on mataw 144,000 nazaq in tow na waqiyta. ⁵ Juda ago gemub on mataw 12,000 nazaq tow waqiy. Sa Ruben ago gemub on waqiy. ⁶ Sa Aser ago gemub on mataw 12,000 nazaq tow waqiy. Sa Naptaliy ago gemub on mataw 12,000 nazaq tow waqiy. Sa Manase ago gemub on mataw 12,000 nazaq tow waqiy, ⁷ sa Simeon ago gemub on mataw 12,000 nazaq tow waqiy. Sa Liway ago gemub on mataw 12,000 nazaq tow waqiy. Sa Isakar ago gemub on mataw 12,000 nazaq tow waqiy, ⁸ sa Zebulun ago gemub on mataw 12,000 nazaq tow waqiy, sa Joseph ago gemub on mataw 12,000 nazaq tow waqiy, sa Bensamin ago gemub on mataw 12,000 nazaq tow waqiy. ⁹ Ari nagah na abeb ya saw a ta waqim on mataw dauh biyah diqmo humab wolim tursa ya gibiy. On mataw na kuluwmo diq iyan mat araq ginulin bugdaqta biyab haiq. Teq in on mataw en bunmo teq og saw bunmo teq gisan bunmo teq nan bunmo gigo asor kabemo bolim humab nab turiyta. In tubusan husta sisaqta giholib emin teq in king ban tawontab osaqta na ayow sipsip amidon na inaq ginognib turad in gibenab guren nan wazim turiy. ¹⁰ Turad in atoranmo lileyeq kazaq bilaq yaqay, i gigo God ban tawontab osaqta na ayow sipsip amidon na inaq haq yaqay, in gimomo on mataw gilumsihim giwaqim giqeman ban dimuntab osayta haq yaqay. ¹¹ Sa angelo bunmo in king ban tawontab osayta na teq mataw marorta 4 na teq nagah aweweq kayeqmo osayta na gililut negim turad in bunmo gibakbakan ulum laquwin turad teq in ginobun mulbunim ogib wom. Woqan in God abin tiqiluw yaqay. ¹² Ad in bilaq yaqay, hel dimniyan haq yaqay. Ad i in abin ayahta na iluwuq haq yaqay. In amomo anad awaz meqin diqta haq yaqay. I in amomo waziney esey diq uguq haq yaqay. In awaz diq meqniysa ago zaway ayah diqmo haq yaqay. In nazaqmo kuluwa-kuluwmo osan haq yaqay. Hel diqtaqmo haq yaqay. ¹³ On mataw tubusan husta sisaqta giqemiyta ko in gingan diq? Ham. In edob diq boliyta? Ham. ¹⁴ Haqan ya in ago gamuk amenin emim bilay, mat ayah hay ninmo hurit hay. An in ya kazaq ibilan, on mataw ko bab gibenab afaqan teq santitiy kabemmo daiq waqim sorad in giquriyam bugim teq boliyta ham. In gigo tubusan na in sipsip amidon anednib suholan hus diq tiqiy ham. ¹⁵ Nazaq iyan in God ago ban tawonta na anognib tituray ham. Ad in taromab teq zeqab inaqmo God ago bitab osad ago kabiy emayta ham. God in ago ban tawonta nab osad inmo on mataw na giwanmuz ad nenaq tuqosdaqta ham. ¹⁶ Osad in on mataw na giwamuzsa in gigem a ta hi moqdaq ham. Teq in ginatguman a ta hi ziziqdaqmo ham. Zeq a ta hi ginoysa in sawafanta a ta hi loyin daqaymo ham. ¹⁷ Na ezaqgo sipsip amidon king ago ban tawonta anognib turaqta na inmo tigiwamuzdaqta ham. Bilaqne mat ago sipsip giwamuzaqta nazaqmo ham. Giwamuzaqta nazaqmo ham. Giwamuzad in giqad yuw yayibta araq mataw uluwim kayeqmo kuluwa-kuluwmo osayta nab in giqad tilehdaqta ham. Teq God in gimeqil woqaqta na suholid in a ta hi gaq daqayta ham.