¹ Tsimbu yakunima Njambi uakuhandeka nava kukuetu kuhitila mutu polofeto mutsimbu yaingi kaha namuzindzila zia zingi. ² Vunoni mumatangua aua ahanima, uahandekele kulietu kuhitila muli muana, uze yakudikile kukala nalisesa kuvuma viose. kuhitila muli ikeye Njambi vaua napange viose. ³ Napu ceke ca ca kuZumbangeya Njambi, uakumenako ikeye. ikeye vaua akuata viose hamo mulizi lia ndzili zieni. muakumisile kukusa vupi, uatumamene kulivoko lia cilio lia vulemu vua muilu. ⁴ Umu uakukala ngue uakuhambakana nava ngelo ngue lizina liana suana lia viuka kuhambakana mazina avo. ⁵ Umu uli kangelo Njambi ya handekele,'' Ove muanange, lelo njineza nakukala Isuenu''? cipue umu uli kangelo Njambi ya handekele '' Ange njikakala Ise kuli ikeye, kaha akakala muanage uayala kuliange''? ⁶ Vunoni ceka naua, Tsimbu Njambi yanehele muana uakavenga mulifiti, uahandekele ngueni, ''Vangelo vose va Njambi vatelele kumuzumbangeya ikeye.'' ⁷ Kuli tungelo uahandekele ngueni, ''Ikeye umo akapanga muzimu ya vangelo. kaha vangamba zieni milangi tuhia.'' ⁸ Vunoni kuli muana uahandekele nguni, ''Cituamo cose cavuangana, Njambi, uamiaka yose. vakakutavela vipangi via cili vakeko vakakutavela vuangana viove. ⁹ Ualema vaka viololoke kaha uazinda vakuhona kuvontsikila. kaha Njambi, Njambi yenu, namiuavesa enu namazi andzolela kuhambakana kutsila cenu.'' ¹⁰ ''Hakuvaleka, muangana ualele cikuku hamavu. melu navipangi via kumavoko enu. ¹¹ Vakatsa, vunoni enu mukatualelelaho. vase vakazala ngue cihanda cavuzalo. ¹² Ukavazenga vakeko ngue vuzalo vuakuhona mavoko, kaha vakalumuka kukala ngue cihanda cavuzalo. vunoni mukakala vamolika, kaha miaka yenu kai kakama.'' ¹³ Vononi vamo ali vangelo vaze Njambi vahandekele ha tsimbu yose, '' kutumama kulivoko liange lia cilio numu munjika lingisa vitozi cihanda cantanga cakuliata kuvupangi vienu''? ¹⁴ Kati vose vangelo vaze vekuzata, kaha navaze vekuvatuma nakulama vaze vakusuana kuovoka?