Capítulo 6 (Dio ipieta caacoca Moise irso)
1
Njite wa-Minalri iaco Moise irso: ''Panayaotsa picapa coajicaotsa Nonaitjaca Faraón irso, picapaotsa jliaji Nocaiterri, niniotsa lricadaa iacarroa lricapa kjetena Njoida. Njoida ikjaote Lricadaotsa imotó-carro jlipaite ioya.''
2
Dios icaite Moise irso cayoji: ''Icatsa IMINALRICA Njoa.
3
Nocadaa Abraham, Isaac njite Jacob tsakja nacapá-carro njoa Dio kjaidádalri shó; Mitsa corrin pia najíica Njoá Noipitana nacó, IMINALRITI, corrin najíca jliaji Noipitana.
4
Nonaitja pia tsakja pada yaacoti naapiya, nocaitecawa Noca narso Canaán jípaite, jliaji jiipai naofalri irricoda corri-cadanatsa nayadacani, najicawa lrico pia macádatsa.
5
Njite, Njominina tsakja coajica njeemataca njaji iraelitanai, Egipto lricoperri jirrapiteta capoana-na, niini nowaadaca coajica jliaji yaacoti Norsolri pia naapiya.
6
Niini picaiteotsa narso njaji iraelitanai, cayoji: ''Icatsa Iminalrica njoa. Njotacaotsa sháa lrioya
jliaji egipcionai icada-cawa jirrapitaca, Njotaotsa shá nacaapi ioya. Nocadaotsa njerrapitaca Njoida shó, icatsaotsa cayó noyomjetaca shá.
7
Niniotsa Nonaikite aimadanca sha njite iDiote caotsa Njoa. Icatsa iMinalri Dioca Njoa, njite yanjiotsa Njoaca jliaji jitalri shá nacaapi ioshete njaji egipcionai.
8
Nodecaotsa shá lri-ricoda jliaji jiipai nocaiterri yaacaoti ajádalri shó Abraham irso, Isaac irso njite Jacob irso tsakja. IMINALRICA Njoa, niini iyadacaotsa jliaji jiipai.''
9
Njite Moise icaite tjá njaji yaacoti narso njaji iraelitanai, mitsa corrin naoma njemica lrirso ima kerroacana naikjaote njaji idenjikjeti nananitjalri.
10
Dio icaite Moise irso:
11
''Warsa piawa Faraón iderse, Egipto italricanaa lricadá-carro naawa njaji iraelitanai jlipaite ioya.''
12
Njite Moise iaco Dio irso: ''¿Coajintja Faraón jimica norso, njácatja njaji iraelitanai corrica naoma njemica norso, njite corrin tsakja notaita caacoca njoa matsia?''
13
Wa-Minalri inaa Moise njite Aarón tsakja naa-carro caacona naapiya njaji iraelitanai njite Faraón iinai tsakja, jliaji Egipto italricanaa, jlitá-carro njaji iraelitanai Egipto jipaite ioya.
14
Icatsa neepitanaca njaji njanirrinaipe jiwidaapo: njaji Rubén yénipe, Irael irrí pjerriti: Hanóc, Falú, Hezrón njite Carmi. Icapiatsa njaji Robén iipaneta inakjoité-perrica.
15
Njaji Simeón yénipe: Jemuel, Jamín, Ohad, Jaquín, Zohar, njite Saúl, roenipe rsoaji Canaán darro. Icapiatsa njaji Simeón iipaneta inakjoité-perrica.
16
Nanineta tsakja anjí njaji Leví yénipenaipe. Leví yofá pia ciento trenta siete walria jalredaoca lrico. icapiatsa lrienipenaica njaji: Gersón, Coat njite Merari.
17
Njaji Gersón yénipe: Libni njite Simei.
18
Coat iofawa ciento trenta tré walria jalredaoca lrico. Icapiatsa lrienipeca njaji: Amram, Izhar, Hebrón njite Uziel.
19
Njaji Merari yénipe: Mahli njite Musi. Icatsa njaapococa njaji Leví inakjoité-perri naapaneta yaapiya.
20
Amram jita inoa jlinirri iwedoa tsa, njite rorsoca yamada roenipe rorso, Moise njite aarón. Amram iofawa ciento trenta siete walria jalredaoca lrico, njite mayamini.
21
Njaji Izhar yénipe: Coré, Nefeg njite Zicri.
22
Njaji Uziel yénipe: Misael, Elzafán njite Sitri.
23
Aarón jita inoa Eliseba, aminadab iito, Nasón iwedoa. Njite icatsa njaji roenipeca lrirso: Nadab, Abiú, Eleazar njite Itamar.
24
Njaji Coré yánipe: Asir, Elcana njite Abiasaf. Icatsa njaji Core iipaneta pococa.
25
Njite Eleazar, Aarón irrí, jita inoa Futiel iito. Njite Finees-ca roenipeca lrirso. Icatsa levitanai jinirrinaipe iipaneta jiwidapoca njaji, naapiya njaji nanakjoitéperrim.
26
Njaa minítsa njaji Aarón njite Moise tsakja njaji wacapalrina inacó, Dio icaitejí irso: ''Yaa jita njaji iraelitanai Egipto jipaite rikjoite papocope njaapodawaaca.
27
Aarón njite Moise tsakja caacona Faraón irso, jliaji Egipto italricanaa, lricadaacarro nadee njaji iraelitanai Egipto jipaite ioya.
28
Caaco caojli pia wa-Minalri Moise irso Egipto jipaite ricó,
29
Lriaco pia lrirso cayoji: ''Icatsa IMINALRICA Njoa. Picaiteotsa lrirso jliaji Faraón, Egipto italricanaa, pjiomi njaji Nocaiterri pirso.''
30
Mitsa Moise iaco Dio irso: ''Cotsa matsiaca caacoca njoa, ¿Coajintja Faraón jimica norso?