Capítulo 4 (Njaji manaitjacanaperri Moise inaitjalriotsa)
1
Njite Moise shepani, lriaco: ''¿Miotsa corrin cadaa njeepa njoa, corrin njemica norso, o nacaite cadaa norso corrica nocapa jliaji wa-Minalri?''
2
Njite wa-Minalri Iaco Moise irso: ''¿Cocao jliaji pirsolri picaapoi ricó?'' Moise iaco lrirso: ''A paapo jaicoapo.''
3
Njite wa-Minalri iaco lrirso: ''Pipeeco jliwao jiipai nacojle.'' Moise ipeconi jiipai nacojlen, njite lripadamacawa jliaji jaicoapo aapi sho. Moise ipito lrioya.
4
Njite wa-Minalri Iaco Moise irso: ''Pjipa piocaapi shó lriitipi nakjoite.'' Njite Moise jipani lriitipi nakjoite. Njite lripadamao jaicopo sho tsenakjan lricaapi ricó.
5
''Icatsaotsa pinaitjalrica nataitá carroatsa njeepaca picapaca jliaji iMinalri, iferrinaipe iDiote, Abraham iDiote, Isaac iDiote, Jacob iDiote tsakja.''
6
Wa-Minalri iaco pja lrirso: ''Panaya, pjieta picaapi pitsayanalre ricó.'' Njite Moise sheta lricaapi lritsayanalre ricó. Lridia cádanaco jlita njiteni, lricapa catserreca lricaapi pjiomi, jaalreni itamana shó.
7
Wa-Minalri iaco: ''Pjieta tsenakja picaapi pitsayanalre ricó.'' Njite Moise sheta lricaapi lritsayanalre ricó, njite jlita cádanco njiten, lricapa matsia catsa lricaapi tsenakjan, cayotsa lridaki icapacana shó.
8
Wa-Minalri iaco lrirso: Corri cadaa njeepa pjia, corri cadaa njemi pirso picadaa cádanaco nacapa Njoida, pinitanda picadaaca nacapa, a pedaotsa njeepa Nopieta cádanaco nonaitjaca manaitja canaadalri.
9
Corri cadaotsa njeepa nopieta
cádanaco nocadaaca nacapa Njoida manaitja canadalri, njite corrin tsakja njemi pirso, pjitaotsa ooni lriamarralri njjiteo piarró-carro jiipai nacojle. Jliaji ooni pjitalriotsa lripadamacaotsa írranatiwa jiipai nacó.''
10
Njite Moise iaco wa-Minalri irso: ''No-Minalri, cotsa matsiaca caacoca njoa, corrin oopica, corrin tsakja panaya caaco cádanaco pjia norso, njoa pirsodalri. tárraca cácoca njoa, corrin noaji caacoca kjeyantja.''
11
Wa-Minalri iaco lrirso: ''¿Cocao jliaji inaitjalri nanoma njaji inaiki? ¿Cocao icadaa maacó carro njaji inaiki, corrí-carro njemi, matjí carrona, o nacapá-carro? ¿Capja corrica Dioca Njoa?
12
Niini panaya, warsena piawa, Njoa tsaotsa pinoma iinai, Njoa tsaotsa icaite pinoma irso cocacaotsa picaiterri.''
13
Mitsa Moise icaite: ''No-Minalri, pinaitja matsiacalri pimeenaca pada nooya, coajidalri catsa pioma pimeenaca.''
14
Njite Kerroa Dio Moise irso, Lriaco lrirso: ''¿Coan catsakjao jliaji pipjerri Aarón, jliaji Levita tairri? Nonjinda matsiaca caacocani, lrinoatsa lricapa piderse, njite catimaotsani pekirritsa lricapa cádanaco pjia.
15
Pjia watsa icaite njaji yacoti Lrirso lricaiteoda, njite Njoa watsa icaite irso cocacaotsa njaji inaitjalri.
16
Jlia watsa caaco narso njaji inaki pinacó. Pinoma shocaotsani, cayoatsa pjia lrirso Njoá capisho pirso.
17
Pjipaotsa pidee jliaji jaicoapo. Lrishoatsa pinaitja njaji manaitja canáperri.''
18
Njite Moise idoa ioyacawa lriñjawerri Jetro iderse, lriaco lrirso: ''Picadaotsa njoa nodiá-carro naderse njaji nokitsiñape Egipto lricojle, nocapá-carro caafi cadatsana.'' Njite Jetro iaco Moise irso: ''Pienawa pimaodacatsa.''
19
Wa-Minalri iaco Moise irso Madian lricó: ''Pidienawa Egipto lricojle, ima pjiomi njaji iomacape pia iinoca pjia opina mayamina pjiomi.''
20
Ikena Moise idee rsoaji lriino, njji lrienipe; njite lricadaa naofawa borro nacóna. Opi Moise iawa Egipto lricojle njite lrideeca lrijaicaopote lricaapi ricó.
21
WaMinalri iaco Moise irso: ''Pioca cádanacoa Egipto lricojlena, Picadaotsa Faraón icapa njaji manaitja canaperri ima Nocadaaca jídati picaapi ricó. Mitsa nocadaotsa tárraca lricaolre niní corriotsa lricadá-carroca naawa njaji inaiki aimadan.
22
Picaiteotsa Faraón irso cayoji: Cayó Lricaiteca jliaji Wa-Minalri: Noenipe pjerritica jliaji Irael,
23
Niini Nocaiteca pirso: ''Picadaa lriá carroa jlia nirri ipjerriti, lritaitá-carro lriaca matsiadalri Norso. Mitsa corri capoa picadaa lriá carroa, Nocadaa caotsa maayamica jliaji pirrí ipjerriti.''
24
Njite naacayao toa inipolrico, Dio ioketaacawa Moise iapiya deepi ricó, njite wadeepe lriinocani.
25
Njite Séfora jipa pada jiipada nakematanda malriye sho, njite royoá roenipeda íya lri-atsiaca nacoda, njite rocadaani Moise jiipa naco. Njite roaco: ''Ajádalrica noinirrica pjia lrikjaote jliaji írranati.''
26
Niini Dio imáca Moise. Njite roaco: ''Írranati ínirrica pjia circuncisión ikjaote.''
27
Wa-Minalri iaco Aarón irso: ''Warsa piawa jalrapocolri lricojle, nirseotsa picapa Moise.'' Aarón iá lriderse njite lricapani piyompinaco toa Dio iawacadate nacojle, njite lritsootsoni.
28
Moise iaco Aarón irso pjiomi njaji iacoti Dio inalri lricaiteca lrirso, njite pjiomi njaji manaitja canaperri Lrinaalri lrinaitjaca.
29
Ikena Moise njite Aarón iawa njite nawaketa pjiomi njaji caconaperri pekipenai iraelitanai.
30
Aarón icaite narso pjiomi njaji yaacoti WaMinalri inaalri Moise icaiteca. Lricadaa tsakja nacapa Dio jiida nacapá-carro njaji inaiki.
31
Njite njaji inaiki njeepani. Njite njemi cádanaco Dio icapaca narso njaji iraelitanai, coanca njerrapitaca, ikena nayamheta njewidaa nácarro Lrirso matsiadalri.