¹ Oi au o Paula, na talatala i Jisu Karisito, sa kacivi mei apositolo, ka lesi meu tukunia nai tukutuku vinaka ni Kalou ² o koya sa yalatakia i liu o koya ka ra vosatakia na nona parofita ena Vola Tabu ³ ena vuku ni luvena o Jisu Karisito na noda Turaga, o koya sa sucu mai na kawa i Tevita me vaka na yagona ⁴ o koya sa vakatakilai vakaukauwa e na tu cake voki mai na mate, ni sa Luve ni Kalou, me vaka na yagona savasava ⁵ o koya kitou sa rawa voki lia kinia na loloma vata na cakacaka vaka i apositolo me ra vakabauti ka talairawarawa kinia o ira na lewe ni vi vanua kece lia, ena vuku ni yacana ⁶ dou sa kacivi oti va voki lia kinia o iko dou mo dou nei Karisito. ⁷ vi iko dou kece lia sa tiko mai Roma, o iko dou sa dau lomania na Kalou, o iko dou sa kacivi me yalosavasava: me nomudou na loloma vata na vakacegu mai vua na Kalou o Tamada, vata ki Jisu Karisito na Turaga. ⁸ Me vatekivu, o Jisu Karisoto au sa vavinavinaka kinia vua na noqu Kalou, ena vukumudou kece lia ni sa tukuni i vuravura taucoko na nomundou vabautia. ⁹ NI sa noqu i vadinadina na Kalou, o koya au sa qaravia e na vu ni yaloqu enai tukutuku vinaka ni Luvena, ni sa yali ni mudu ni cavuti iko dou e na vi siga ena noqu masu ¹⁰ nia sa dau masu, me dua na gauna meu kalougata kinia ena lewa ni Kalou meu yaco yani vi iko dou. ¹¹ Niu sa gadrevia valevu mei raici iko dou meu solia vi iko dou nai solisoli va yalo eso mo dou vataudeitakia kinia ¹² me da dui vacegui e na vuku ni nomudou vabautia vata na noqu voki lia. ¹³ Ia, o iko dou na veiwekani, au sa yali ni vinakatia mo dou nanuleva, niu sa nakitia valevu mei qai yani vi iko dou (ia au sa tarovi lia me yacovia na siga koya), me dua na noqu yaga ena kemudou maliwa, me va voki lia kinia e na kedra maliwa na matanitu tani. ¹⁴ Sa dodonu vi au me'u sa talatala vi ira na kai Kirisi, vi ira voki lia na lewe ni vi vanua loa, vi ira na vuku, vi ira voki lia era sa yali vuku ¹⁵ sa vaka voki lia kinia, me vaka au sa rawa sa yaloqu sara me'u vunautakia nai tukutuku vinaka vi iko dou voki lia mai Roma. ¹⁶ Niu sa yali maduatakia nai tukutuku vinaka ki Karisito ni sa ikoya ke na kaukauwa ni Kalou me vabulai kinia o ira yadua era sa vabautia, sa liu vi ira na Jiu, vi ira voki lia sa matanitu tani. ¹⁷ Ni sa vatakila kinia, ni sa vadonui ira na Kalou me ra vabautia me vaka na ka sa volai. E na bula ena vabautia o koya sa yalododonu. ¹⁸ Ni sa vatakilai mai Lomalagi na cudru ni Kalou ki na nodra i valavala ca kece lia, vata na nodra yali dodonu na tamata, era sa tarovia nai vavuvuliu dina enai valavala yali dodonu. ¹⁹ Ni sa rairai ena kecdra maliwa, na ka ni Kalou sa kilai rawa, ni varaitakia vi ira na Kalou ²⁰ ni sa laurai na ka ni Kalou e vuni tu, io, na nona kaukauwa e yali mudu, vata na nona tu va- Kalou, ni sa kilai oti na vi ka sa buli, mai na gauna sa buli kinia na vuravura, o koya gona sa yali dua kinia na nodra ulubale. ²¹ Io ni ra sa kila tiko na Kalou, era sa yali ni vakarokorokotakia me vaka ni Kalou, se vavinavinaka, ia sa lialia mai na nodra nanumia, a sa butobuto mai na yalodra sa lialia. ²² NI ra sa tukunia tiko ni ra sa vuku, era sa lialia mai ²³ ra sa qai vaisosomitakia na serau ni Kalou, sa yali ni mate rawa, ena matakau me vaka na tamata sa ra loa, vata na manumanu, vata na manumanu yavai va, vata na vi ka qasi voli. ²⁴ O koya sa daini ira kinia na Kalou me ra vavitalitakia ena dodomo ni yalodra, me ra vavelavelatakia kinia na yagodra va i ira ²⁵ era sa vaisosomitakia nai vavuvuli dina ni Kalou, ena ka lasu loa lia, a ra sa soro kinia ka qaravia na ka sa buli, ka yali o koya sa bulia, o koya sa nona varokoroko sa yali ni mudu. Emeni ²⁶ O koya sa daini ira kinia na Kalou me ra muria na dodomo vasisila, ni ra sa vaisosomitakia o ira na nodra yalewa nai valavala ca sa lesi e duatani a yali lesi ²⁷ sa va voki lia kinia o ira na tagane, ni ra sa dainia nai valavala. Sa lesi vata na yalewa, sa waqa na nodra vidomoni va i ira, a ra sa caka o ira na tagane ka velavela sara vata ki ira na tagane, sa yaco kinia vi ira nai sau dodonu ni nodra caka cala ²⁸ ra sa yali ni vinakatia mera kila tiko na Kalou, sa daini ira na Kalou me ra lomavata, me ra caka na vi ka e yali dodonu vi ira ²⁹ me ra sinai ena ka kece lia e ca, na yalo ca, na daukocokoco, na dauvivacacani, me ra sinai ena vuvu, na laba, na vivala, na daivivakaisini, na yalo cudrucudru, me ra dau vosa vai lo, ³⁰ me ra daukakase, me ra catia na Kalou, me ra vosa levu, me ra viavialevu, me ra dau dokai ira, me ra dauvavunia na ca, me ra dau talaidredre vi ira na nodra matua ³¹ me ra yali ni yalomatua, me ra yalayala ka lasu voki, ka ra sa caca viwekani, era sa yali ni yalololoma ³² ia ni ra sa kila tiko na lewa ni Kalou ni sa dodonu me ra mate o ira era caka na koya, era sa yali ni caka loa lia o ira, era sa dau vinakati ira voki lia era dau caka.