1
جی پولس، رسولی کی اونِ رسالتْ، نه انسانانِ طرفِ جَه و نه بواسطۀ انسانانه، بلکی بواسطۀ عیسی مسیح و خدایِ پئرِه کی اونَ جی مُرده یان ویریزَأنی.
2
و جی طرفِ همۀ برارانی کی می اَمرَه ایسَد، به غَلاطیه کلیسایان.
3
فیض و سلامتی شیمی اَمرَه بیبه، اَمی پئر خدا طرفِ جَه و خداوندْ عیسی مسیحِ طرفِ جَه
4
که خو جانَ اَمی گوناهانِ وَسی فَدَه تا اَمرَه به خواست اَمی پئرْ خدا، جی اَ دونیایِ شریر نجات بده.
5
جلال بر اون تا اَبدالآباد، آمین
6
شیمی جَه تعجب کونم کی به هَ زودی جی اون کسی کی شمرَه دخَأده تا مسیح فیضِ دورون شریک بیبید رو وَأگردَأنه دَأرید و ایتَه انجیلِ دیگرِ طرف شوئون دأرید.
7
البته انجیلِ دیگری وجود نَئره، ولی کسانی ایسَد کی شمرَه مضطربْ کوندْ و خَأید مسیحِ انجیلِ حقیقتَ عوضَ کوند.
8
ولی اگر اَمَأن، یا حتی ایتَه فرشته جی آسمان، بخَأیه انجیلی غیرِ از اونچی کی اَمَأن شمرَه بشارت بدَئیمَ شمرِه موعظه بوکونه، مَلعون بیبه!
9
هوطو کی پیشترانِ رِه بوگوفتم، هَسَه بازم گویم: لعنت بر اون کسی کی انجیلی غیرِ از اونچی کی قبول بوکودیدَ شمرِه موعظه بوکونه!
10
آیا مردمِ تأئیدَ خَأیم یا خدا تأئیدَه؟ آیا مردمِ رضایتِ دونبال ایسَم؟ اگر تا هَسه مردمِ رضایت و خوشحالی دونبال ایسَه بؤم، نتَأنستِم مسیحِ خادم بوبوم.
11
ای برأرأن، خَأیم بدَأنید انجیلی کی من بشارت دِهم، آدمی فکر و خیالِ جَه و انجیلِ بشری نییه.
12
چون اونَ انسانِ جَه دریافت نوکودِم و کسی هم اونَ مرَه یاد ندَه دَأره، بلکی اونَ عیسی مسیحْ خودش مستقیماً مرَه آشکارَ کود.
13
شومَأن می سرگذشتَ دینِ یهودِ دورون بیشتَأوسته دَأرید کی چوطو خدا کلیسایَ آزار رسَانِئِم و اونَ خرابَ کودِم.
14
و خودمِ دیگر همسالانِ یهودی جَه مؤمِن تر بؤم و رسم و رسوماتِ مذهبی رِه خیلی تعصب دَأشتم.
15
ولی چون خدا کی مرَه می مارِ شکمِ جَه انتخاب بوکود و مرَه بواسطۀ خو فیض دخَأد، اَطو اِراده بوکود تا
16
خو پسرَ می دورون آشکارَ کونه کی بوشوم غیرِ یهودیانِ ورجَه و اونِ پسرِ رِه بشارت بدم، پس منم خون و جسمْ، یعنی انسانِ اَمرَه مشورت نوکودم،
17
و حتی اورشلیم هم نوشوم، یعنی کسانی ورجَه کی پیشتر جی من رسول بود، حتی اوشَأنِ ورجَه هم نوشوم، بلکی بوشوم عربستان، و بازن وَأگردستم دمشق.
18
و بعدِ سه سال بوشوم اورشلیم تا پطرسَ بیدینم، و پونزدَه روز اونِ ورجَه بِئسَم.
19
ولی باقی رسولانِ جَه فقط یعقوب، اَمی خداوندْ عیسی مسیحِ برأرَ بیدم.
20
خدا شاهده کی اونچی نیویسم عینِ حقیقته.
21
بعدِ اون دیدار بوشوم قیلیقیه و سوریه ایالتانِ طرف.
22
او زمان هنوز یهودیه کلیسایان مرَه به قیافه نشناختد.
23
فقط بیشتَأوسته بود:«اون مردی کی پیشتران اَمی دوشمن بو و اَمرَه اذیت کوده، هَسَه اونم هون ایمانیَه بشارت دِهه کی کمر به اونِ نابودی دَوسته بو»
24
و اوشَأنْ می وَسی خدایَ شُکر کودد.