¹ "O au na vaini du, ia o Tamai au nai taukei ni tovatova. ² Sa kau dei qu tula coko ei tam vua, ia qu tula coko ei vua sa samakinia me vua vaka bi. ³ O ba sa qei samaki oti i na vuku ni tata qu sa kway rewa i va vatikem. ⁴ Ba tu kata i va au, o au muni i va vatikem. Me wetai ni tam rewa ni vua vataki ni koya e tula vakavo me sema ni i na vuni vaini, sa na wetei muni o vatikem maga o ba sa tam tu kata ga no i va au. ⁵ O au na vaini, o vatikem e tulatula, o koya ei na kabikat i va au o au muni i vua, ei sa na qei vua bi coko sara, maga qi vele o ba na tam rewa tia ei lia na kwa. ⁶ Maga ei lia ei tam tu kata qai au, sa na lei walataki dei me wetei na tula ni vaini sa sawalo, a re sa tomia qa re cabo i na quto maka me re bulalaki. ⁷ Maga oba sa tukata i va au, qa sa taukata i va vatikem na lequ tata, o ba na cauria na kwa coko o ba vinatia, ei na lei vagani i va vatikem ⁸ Na kwa ei na vatetelagitaki ka o Tamai au, ni oba sa qei vua vakalevu qo ba sa qei vadudutakinia ni oba leqi au tisaiveli. ⁹ Me wetai sa lomani au o Tamai au, qi sa lomani vatikem muni ka. Ba no kata ga ni i na lequ loloma. ¹⁰ Maga o ba qulumia kata na lequ i vakaro, oba na no kata ga no i na lequ loloma, me wetai lequ qulumia kata lea i vakaro o Tamai au qa qu no kata ga no i na lea loloma. ¹¹ Qi sakwaya ni i va vatikem na vikwa kwe me tau iva vatikem lequ gadre qa me na tause na vatilem gadre. ¹² Sa nia kwe na lequ i vakaro, mo ba vilomani me wetei na lequ lomani vatikem. ¹³ Ei lala lia na lea loloma na tamata me tetelagi i na vikwa kwe-me solia na lea cola me baleti kora na wekaya. ¹⁴ O ba sa na qei wekai au maga o ba tara na kwa qu sa rovakinia iva vatikem. ¹⁵ Qi sa na qei tam covi vatikem leqwa me lequ tamata, ni sa tam kilatia na tamata na kwa i tara na lea i liuliu. Ia qi sa covi vatikem mo ba wekai au, i na vikwa coko qu rogo mai va Tamai au, qu sa vatakea i va vatikem. ¹⁶ O ba tam digitaki ni au, ia qu digitaki ni vatikem qu lesi vatikem mo ba laka qo ba vua, qa me tau muni vatimem vua. ¹⁷ E i yaco sara i na kwa coko o ba cauria i va Tamai au i qu yaca, ei na vagani vatikem. ¹⁸ Maga ei sa cakati vatikem o vuravura, mo ba kilatia a sa cakati au i mata ni bere ni qei cakati vatikem. ¹⁹ Maga o ba sa vakavuravura, o vuravura i na lomani vatikem me wetaki ga ni o sa lea. Ia ni o ba sa tam va vuravura qa qu sa ili vatikem dei mai vuravura, sa nia sara ga so kwe sa cakati vatikem ka o vuravura. ²⁰ Ba numia na tata qu sa kwaya i va vatikem, na dauviqwaravi ina tam tetelagi vua na lea Momo. Maga e re vararawataki ni vatikem muni; Maga e re na maroroya vina na lequ tata, e re na qei maroroya muni na vatilem. ²¹ E re na tara na kwa coko kwe i va vatikem baletia qu Yaca, baletia ni re tam kilati koya ko a vatalati au mai. ²² Maga qu ke tam laka mai qa qu mai tata i vuara, a ke na lala na ledra i valavala cakaca, Ia ko kwe sa na lala na ledra i ulubale i na ledra i valavala caka ca. ²³ O koya i cakati au, o koya i cakati Tamai au muni. ²⁴ Maga qusa tam mai tara na cakacaka a lala lia leqwa a re mai tara i va kora, i na lala i vuara na i valavala ca, Ia ko kwe a re sa ligocia qa re sa cakati rukemam ruarua qa Tamai au. ²⁵ Ia sa yaco na vikwa kwe me cakacakataki ka na tata a sa volai i na ledra i vunau," A re cakati au ni lala lia na kwa ei nia e vu! ²⁶ Ia na daunivivacegui- o koya qi na vatala ya i va vatikem mai va Tamai au, o koya kwe, na yaloni Du. O koya a laka mai i va Vava i na qei mai vadudutaki ni au. ²⁷ O ba sa na dau tia i vadudu muni baletia ni oba sa no vata qai au mai na i tautaula.