¹ Kumanenena, apange, twamilomba nene no kumikulisha kwa Fumu Jesu. Eci eli mwatambulile ituminino kutunda kukwetu yomu muloela kuendela, no kuloelisha Nyanbi, kalo muende kengeyo, ci mukwame kengeyo nene. ² Mukonda mwalimuka ituminiono ei twamipile ko Fumu Jesu. ³ Mukonda ei yoliyo ahima Nyambi, kukenishiwa kwenu, ci mulihenge ku uhule, ⁴ ci munu no munu kukwenu alimuke kutuleka elama yenji mukukena no likute, ⁵ mwahima enu yoimango (eci anu angana awa akana kulimuka Nyambi). ⁶ Munu lelo aipishela mwapenji omu mu iamba ei. Mukonda Fumu yoliyo pa mulandu omun mu enu ei yoihe, eci eli natutanga kumiambela no kutanalisha. ⁷ Mukonda Nyanbi katuishelile ku enu nyo mathzilo, unone kukukena. ⁸ Honine, oyu kana ei kakanine anu, unone akana Nyambi, oyu namipa mupepo wenji oukenu. ⁹ Kwei yokulihema munu na mwapenji, kamu loelile ci munu amin'olele, mukonda amwe mwashinda munafundishiwa ko Nyambi kulihema munu na mungenjenji. ¹⁰ Yoshemwa, mukwame kengeyo kwa apenu wahe awa ali Masedonia momuhe. Unone twamikutathza, apange mukwame kokutwalelela. ¹¹ Kalo twamikulisha mu kuyoya mu kuliyala, mumamele ei muoela kukwama, kalo mukwame no moko enu, eci eli twamitumininine, ¹² ci muende shumwa mukaci kawa ali pola kalo kwakala eshi mufota. ¹³ Katufotile ci mukale akukana kulimuka, apange, yawa analala, ci lelo mwabilaela eci anu wahe, okupila shikulupelo. ¹⁴ Mukonda ngeci twatawa ci Jesu neli afa ne kalo onapinduka, shanga kengeyo, Nyambi kenge akuleta awa analala pofoci na Jesu awa alala kukwenji. ¹⁵ Mukonda ei twamiambela yo ko liywi lya Fumu, ci atwe tuyoya, awa akushila kukumena pa kukeya kwa Fumu, yoshemwa katwakutanga kuthza kushiya awa analala. ¹⁶ Mukonda Fumu aye kenge akuulumuka kutunda kuwilu. Kenge akeya ko kapupo, ko liywi lya nduna o man'eloi, no tolombita thza Nyambi, ne awa anafela kwa Jesu kenge akutanga kupinduka. ¹⁷ Munyima atwe tuyoya awa anashiyala, kenge tushimbiwa pofoci nawa anapinduka mu mavui kukaliwana na Fumu muwilu. Omu moliyo twakukalela na Fumu ko kukana kupwa. ¹⁸ Honine mulitanalishe munu na mungenjenji ko ao maywi.