¹ Apetu,mukonda amwe mwashinda mwalimuka, ci kukeya kwetu kukwenu kali kwakupila okwathsi. ² Unone eci eli mulimuka, shanga ci kumatatekelo kuma natunyandishiwa no kushomololiwa ku Filipi, kuma natukala no ondume kwa Nyambi wetu kuamba kukwenu evangeli thza Nyambi mu mvo. ³ Mukonda kutathzo thzetu kanathzitundu pa lipome nji pa kukana kukena, nji pa kuangela. ⁴ Unone, eli tunatawethziwa ko Nyambi ci tupiwe evangeli, ci tuambe, kali kuloelisha anu, unone kuloelisha Nyambi. Yoliyo tatuva micima thzetu. ⁵ Mukonda kanatukeya no maywi o kulishangala atwe twashinda, eci eli mulimuka, nji kuholeka kuhima kufuma- Nyambi yoliyo paki wetu. ⁶ Kalo kanatufoto kushangaliwa ko anu, nji ci yamwe mutushangale nji amweya. ⁷ Kuma natuloela kukwama kengeyo mukuninga ci twa apositola a Jesu. Unone, kuma natukala no shihemo mukaci kemu eci mushemi o mbuyama oyu hengahenga anenji. ⁸ Omu moliyo natumiyuvela n'eke. Kali evangeli thza Nyambi pohuma ethzi natuhimi kumitongwela unone no mukalelo wetu. Mukonda kuma namupiluka ambushetu owakulu. ⁹ Mukonda amwe, apetu, mwavuluka ekwama yetu nomu natukwamena nene. Kuma natukwama ushiku no mutanya ci lelo twaaisha munu kukwenu ou natukutathza evangeli thza Nyambi kukwenu. ¹⁰ Mwamapaki, no Nyambi naye paki, omu naukalela muikalelo wetu wo kukena, kuluka, no kupila po kunyahala kukwenu akakulitawa. ¹¹ Kalo mwalimuka omu natukalela no munu ku munu kukwenu, eci mushemi o mukwelu na anenji o kulielekela, ¹² kumikutathza, kumitanalisha micima no kuminangula ci muwende omu aloela Nyambi, oyu miishela mu muvuthso wenji no mu kutethzima kwenji. ¹³ Mukonda wei twakandelela kwa Nyambi kukwatelela, ci ou mutambula maywi a Nyambi aa namuyuvu kukwetu, muatawe kali ci liywi yo munu, unone muatawe eci eli ali oshemwa, ci liywi lya Nyambi, elyo likwama no kukwenu amwe akakulitawa. ¹⁴ Mukonda amwe, apetu, munapiluka aka kutamenena makeleke a Nyambi aa ali mu Judea kwa Jesu Kilesite. Mukonda namwe munanyandishiwa ko anu o mulitunga lyenu, eli akwamine Ajuda ¹⁵ awa apaile Fumu Jesu na apolofita, no kutucithza. Kaloelisha Nyambi, Unone anyandisha anu wahe. ¹⁶ Atukanisha kuamba na anu angana ci nawo ayoyishiwe. Ne alundeka ku ivi yo ci ivule. Unone uanji kenge wakuwawana kumahulelo. ¹⁷ Unone atwe, apetu, kuma natulihanda nenu pa shikati shoshoonye, mu elama kali mu mucima. Kuma natutatelela nene no kuhima nene ci natumone ehanga yenu. ¹⁸ Mukonda kuma natufoto kukeya kukwenu- manene ame, Paulusi, shikati shoshihe- unone Satani onatukanisha. ¹⁹ Mukonda shikulupelo shetu ne ine nji kunyanyuka, nji huthsi thzetu thzo ufumu thzo kulishangala nathzo kwa Fumu Jesu apa akeya? Kali yamwe? ²⁰ Mukonda yamwe kutethzima no kunyanyuka kwetu.