¹ Anna ayepo lombela ne ayepo amba, ''Mucima wange wanyanyuka kwa Shinda sha moyo. Mutwi wange unayeluliwa ko Shinda sha moyo. Kanwa kange kalishangala kwa akwethzimbo yange, mukonda nanyanyuka mu kuyoyishiwa koe. ² Kwithsa okukena eci Shinda sha moyo, mukonda kwithsa nyambi yumweya shime yowe; kwithsa liwe eci Nyambi wetu. ³ Mushiye kulishangala; mu tunwa twenu kwapuna maywi o kuliyuvishisha. Mukonda Shinda sha moyo po Nyambi limuka; ko aye ekwama yatepiwa. ⁴ Mata a anu owakolo anacoko, unone awa atenyangela angiwa mwiya o ukolo. ⁵ Awa nekuta anthzi kukakwamena elya; awa nafu njala njala thzinapu. Shanga mukakukana kueleka onaeleka ana mutanu na eli, unone mbuyama oyu li na ana owangi ona yuvu honyi. ⁶ Shinda sha moyo yoliyo paa no kuyoyisha. Yoliyo ulumukishela mu mbumbo no kutundisha mo. ⁷ Shinda sha moyo yoliyo kwama anu wamweya ohutu no kukwama wamweya kukala no lufumo. Yoliyo hushela munyima kalo yoliyo kulisha. ⁸ Akulisha shihutu kumutundsha mu likungu. Akulisha oyu napili enu kumutundisha pa shilambo sho mututwi ci akale no ana o mafumu ne ashwane ofumu. Mukonda ithsini yo kaye sha Shinda sha moyo ne onapaka kaye peulu yathzo. ⁹ Kenge anyunga maulu a anu enji okukena, unone owamango kenge awatutwalisha mu milema, mukonda kwithsa munu oyu wakutwesha ko ukolo wenji. ¹⁰ Awa alwisha Shinda sha moyo kenge acothzauliwa tupinthzi pinthzi; kenge awavumishela mishika kutunda kuwilu. Shinda sha moyo kenge akuatula mahulelo o kaye; kenge akupa okolo kwa fumu wenji no kukulisha okolo o kuhanguliwa kwenji.'' ¹¹ Nehoni Elikana ayepo huka ku Rama, ku njiyo thzenji. Mwanuke ayepo kwamena Shinda sha moyo pa meho a mupulisita Eli. ¹² Honi ana Eli neli akwelume owamango. Kanalimuka Shinda sha moyo. ¹³ Shithzo sha apulisita kwa anu neli ci munu yomuhe apa akwama shitavelo, mupika o mupulisita akeya no shituwo sho kukin'isha(foloko) sho maeo ahatu mu lyoko lyenji, nyama kumbwakata. ¹⁴ Pohuma akin'a pa pani, nji mu ketulu, nji mu kanyunguna, nji mu poto. Shoshihe eshi shitundishiwa ko shituwo sho kukin'isha(foloko) mupulisita pohuma ashishimba. Ei kuma naikwamanga mu Shilo no ana o Isilaele wahe awa nakeyanga ko. ¹⁵ Nene, kwashime kutumeka maathzi, mupikaa mupulisita akeya , no kunaambela munu oyukwama shitavelo, ''Onipe nyama o kuponena mupulisita; mukonda katawa nya o kuteleka kutunda kukwoe, shime omwishu.'' ¹⁶ Ngeci oyo munu amuambela ci, ''Tango maathzi atumekiwe, ne mbeci oshimbe o mungi omu ohimena.'' Nehoni kenge amuambela ci, ''Kwahi, omunipe pano mwenene; ngeci konipa kenge nimulishimbela ko okolo.'' ¹⁷ Shivi shawa mishumba(micaha) neli shikulu nene pa meho a Shinda sha moyo, mukonda kanakuteka shitavelo sha Shinda sha moyo. ¹⁸ Unone Samuele aye kuma nakwamena Shinda sha moyo kuli mwanuke kuma navatanga efoda thzo wanda wo line. ¹⁹ Mama wenji kuma namukwamenanga shokuvata shoshoonye no kumuletela mwaka no mwaka, apa nakeyanga na munu wenji kunakwama shitavelo sho mwaka. ²⁰ Eli pohuma afiyawethza Elikana na munu wenji no kuamba ci, ''Shinda sha moyo akupe ana owangi ko oyu mbuyama mukonda o weshi alombile Shinda sha moyo.'' Pohuma ahuka ku njiyo thzo. ²¹ Shinda sha moyo kalo ayepo kwathsa Anna, ne kalo ayepo kala no lila. Ayepo eleka ana owakwelume ahatu nawa owa mbuyama eli. Mwanuke Samuele aye kukulela pa meho a Shinda sha moyo. ²² Honi Eli kunakulupala nene; ne kuma nayuvanga yoihe ei nakwamanga anenji owakwelume kwa ana Isilaele wahe, neli nalalanga na ambuyama awa nakwamanga pa shelo thzo tende thzokuliwanena. ²³ Ayepo waambela, ''Ine mukwamena enu yokengeya? Mukonda nayuva yo ekwama yenu yoimango ku anu wahe.'' ²⁴ Kali kengeyo, anange; mukonda kali iamba yoiwa ei niyuva. Mwaletela anu a Shinda sha moyo kukala no mukanayuva. ²⁵ ''Ngeci munu ayepo kwama shivi kwa mungenjenji munu, Nyambi kenge akumuatula; Unone ngeci munu ayepo kwama shivi kwa Shinda sha moyo, elye wakumuambelako?'' Unone katelelile liywi lya tata wo, mukonda Shinda sha moyo kuma ayalile kuwapaa. ²⁶ Ne mwanuke Samuele ayepo kula, ko loeliwa ko Shinda sha moyo no anu. ²⁷ Honi mukwelume wa Nyambi ayepo keya kwa Eli no kunamuambela ci, ''Shinda sha moyo aamba ci, 'Kanalimonahalishile ku njiyo thza tata woe kwali mu Engepita mu upika mu njiyo thza Faro? ²⁸ Namuhangulile kutunda mu mikuta thzothzihehe thzo Isilaele ci apiluke mupulisita wange, kuthza ku aretare thzange, no kutumeka insense, no kuvata efoda pa meho ange. Napile ku njiyo thza tata oe itavelo yoihe ya ana Isilaele inakwamiwa no mulilo. ²⁹ Nehoni, ine, eyo alytelela itavelo no nupu ei natuminine ci ya mushivaka ninakalanga? Ine okutekela anoe kupita ame ko kulinunisha ko itavelo yoiwa ya anu ange o Isilaele? ³⁰ Honine, Shinda sha moyo, Nyambi o Isilaele, aamba ci, 'kuma nakulupelishile ci njiyo thzoe no njiyo thza tata woe kenge akuenda pa meho ange kokuna kupwa.' Unohoni Shinda sha moyo aamba ci, 'Kule kanakukwama kengeyo, mukonda kenge nikuteka awa anikuteka, unone awa anishwaula nawashimba mu uonye. ³¹ Omone, mayuwa akeya apa nakumanisha okolo oye no okolo wo njiyo thza tata oe, ci kwakukala mukwelume o mukulu mu njiyo thzoe. ³² Kenge wakumona likando mu shivaka ninakalanga. Shanga ci yoiwa kenge yakupiwa ku Isilaele, kamwakukala mukwelume o mukulu mu njiyo thzoe. ³³ Yomuhe kukwenu oyu nikana kutundisha ku aletare thzange, kenge nakuletela meho oe kuwa, kalo kenge nakuleta likando mu mucima oe, nehoni awa akuelekiwa akanjiyo thzoe kenge akufa kwashili mishumba(micaha). ³⁴ Eshi sholiyo shimonisha eshi shakukeya kwa anoe eli owakwelume, Hofini na Finehasi: Muwili wo kenge akufa liyuwa lyofoci. ³⁵ Kenge nakulifotela mupulisita o shemwa oyu wakukwama ei ili mu mucima wange no mu maayalo ange. Kenge nakumuumbela njiyo thzo shemwa; ne kenge akuenda pa meho a fumu wange nahanguliwa kokukana kupwa. ³⁶ Yomuhe oyu nashiyala mu njiyo thzoe kenge akukeya kukwenji kunatongama ku manwi, kunalomba shirivera no ishima, ne kenge akuamba, ''Onipake pa shikwama shimweya sho u pulisita ci nilye ku ishima.'''''