¹ Omu lyapwile litangwa lya Sabata linahu laja, Maliya Mangandalena, Maliya ina ya Yakomba, na Salome banenele mathi akunika lwengo baka bwabethe mubila wa Yesu. ² Mutondo tondo manene halitangwa lya kulibanga musunda, baile kuje kuchihilo ha kutunuka chalitangwa. ³ Bakele nakwendeka kuli umo na mukwabo ngwabo, "Iyajo akatu thindumwina limanya kufumitha kuchikolo cha chihilo?" ⁴ Omwo bataleleko, bamwene lije limanya lyaku thindumuna ko laja, mwafwa lyapwile lyakama manene. ⁵ Cho bakobelele muje muchihilo cho bamwene mukwenje wamunalume nathala mukanjo wa kutoka, natumama kuchilyo, cho ba kathumukile. ⁶ Cho wendekele kuli bakebo ngwendi, "Keti mukathumuke. Mutonda Yesu, muka Nazaleta, ou bashukikile. Nathanguka! Kethi muno. Taleni ha chela ha bamulangekele. ⁷ Cho yeni, mukaleke bandongethi bendi na Petulu, 'Natwamako laja kuya ku Galileya. kujeni mukamumona, ngechi mwamilekele.'" ⁸ Batuhukile na kushatuka kutunda ku chihilo; bapwile nakujaja na kulikomokela. Nebi bendekele byahi nambe kumunu umo mwafwa bathibile lyoba manene. ⁹ Mabulu a mabwa manene aku thangulu ku wethi na kapetulu 16:9-20. [Mutondo wa litangwa lya kulibanga mu sunda, oloni nathanguka laja, wabangele ku lijombolola kuli Maliya Mangandalena, ou yatundithile mamba a tanu na abali. ¹⁰ Cho waile na kuleka baje bakele nendi, thimbu bakele nakulila na kuthikothoka. ¹¹ Cho bathibile ngwabo alinakuyoya na kumumona ba namumono kuli ikeye, oloni kubachikulahelele. ¹² Hanima ya byuma ebi walishololwele mu chifwa cheka kuli babali abo bakele nakutunda muje mulifuti. ¹³ Baile nakulekakoni boshe bandongethi, oloni kubaba lahelele. ¹⁴ Yesu walijombolwele kuli baje likumi na umo ba likulamemene ha metha, cho wabakandele hakujeneka chikulahelo chabo na kukaluhwa cha mbunge, mwafwa kubakulahelele baje bamumwene ha nima ya kuthanguka chendi kutunda kubathsi. ¹⁵ Wendekele kuli bakebo ngwendi, "Yeni mulifuti lyoshe lya hathi, na kwambulula binanda byabibwa kuli banu boshe. ¹⁶ Ou woshe akulaela na kumumbwitika baka mwobola, cho lalo woshe uje kakulahela baka muhitha. ¹⁷ Ebi bithibikitho bikaya na baje bakakukulaela: Mulithsina lyange baka fumitha mamba. Bakendeka malimi amaha. ¹⁸ Bakakwata manyoka na mabokwabo, cho ngwe bakanwa bushungu, kubukaba bulumuna. Bakakambeka maboko abo habaka kubabala, cho bakakanguka." ¹⁹ Hanima ya Shukulu kwendeka kuli bakebo, cho bamutwalele mwilu cho wakatumamene ku liboko lya chilyo cha Njambi. ²⁰ Bandongethi baile nakulongetha kwoshe, thsimbu Shukulu wa pangele nabo hamo na kukoletha majwi kwitila mubithibikitha byaile nabo.]