¹ Oloni Saulu, mukuttwalelela kwendeka na kushungwiya kuthsiya ba ndongethi ba Shukulu, waile kuli kapilithitu wa helu na ² kumwiahula nga kuli Mikanda yama Singange amu Ndamasiku, manganna oshe awanako bamo aba banakundama kuli eyi ngila, bakele banalume nambe banakathzi, akabakwate na kuba nena ku Yelusalema. ³ Hathimbu akele nakuya, chasholokele ngwabo omu etele kuyehi na Ndamasiku, mukukathumuka kwasholokele cheke echi chamuthzengulukile chakutunda mwilu; ⁴ cho wawililile hathi cho wathibile lijwi kwendeka kuli ikeye ngwalyo, "Saulu, Saulu, bika uli nakunjiyandethela?" ⁵ Saulu wakumbulwile ngwendi, "Yobe iya, Shukulu?" Mwene wendekele ngwendi, "Yange Yesu, ou uli nakuyandetha; ⁶ Oloni katuka, kobela munganda, cho bakakuleka byuma wapande kulinga." ⁷ Baje banlume bendele na Saulu bemanene chakwilika lijwi, ha kuthziba lijwi, oloni kumona munu kwahi. ⁸ Saulu wakatukile kutunda hathi, cho omu atonene, mesho endi kuwathele kumona nambe chimo; cho bamukwatelele kuli liboko nakumutwamenena ku mutwala mu Ndamasiku. ⁹ Hamatangwa atatu kathele kumona, cho kalile nambe kunwaho. ¹⁰ Olojo kwakele ndongethi mu Ndamasiku walithzina lya Ananiya. Shukulu wendekele kuli ikeye muchimwetho, "Ananiya!" ngwendi, "Kenga, njili hano Shukulu." ¹¹ Cho Shukulu wendekele kuli ikeye ngwendi, "Imana na kuya ku tapalo kabathana ngwabo kuthungama, cho ku njubo ya Yundasi wihule munalume natundu ku Talisi walithzina lya Saulu, mwafwa ana kulombela. ¹² Namono muchimwetho munalume wa lithzina lya Ananiya kwija kuli ikeye nakumukambeka maboko, mangana athe kumona lalo." ¹³ Oloni Ananiya wakumbulwile ngwendi, " Shukulu, Njinathzibi kuli babengi haliou munalume, bwingi bwa bukenya boshe obu nalingi kubanu bobe ba kujela mu Yelusalema. ¹⁴ Ali na ndzili yakutunda kuli tupulisitu baba kulunu yakukuta boshe bathana ha lithzina lyobe." ¹⁵ Oloni Shukulu wendekele kuli ikeye ngwendi, "Ya, mwafwa napu chipangetho change echi bana shakula, kwambata lithzina lyange kuba Njentile, na bi Myene bana ba Isalela; mwafwa ¹⁶ njimumwetha kayando atele kumona hamulonga wa lithzina lyange." ¹⁷ Cho Ananiya waile, wakakobelele mu njubo. Kukambeka maboko endi hali ikeye, wendekele ngwendi, "Ndolome Saulu, Shukulu Yesu, ou nalisholwele kuli yobe ha ngilaa omu unakala na kwija, na njitumu mangana wathe kutambula kumona na kushulithiwa na muthzithzime wa kujela." ¹⁸ Hajebene byakulifwa namabanda byawile kutunda ha mesho a Saulu, cho watambwile kumona, wendukile cho bamumbwitikile; ¹⁹ cho waile nakumutakametha. Watumamene naba ndongethi mu Ndamasiku hamatangwa amengi. ²⁰ Hajebene wathzimbwile Yesu muma Siangonge, kwendeka ngwendi napu muna Njambi. ²¹ Boshe baje bamuthibile balikomokelele nakwendeka ngwabo, "Nkuma ou kethi ikeye uje munalume wakele na kunyongetha baje ba thanene eli lithzina mu Yelusalema? Naija kuno na kubakwata na kubatwala kuli tupilisitu babakulunu na ku kutiwa." ²² Oloni Saulu watakamene nakutubakanethaho, olojo wakele nakunena chikela mukati kaba Yundeya baje bakele mu Ndamasiku hakuthzameketha ngwendi Yesu ikeye Kilisitu. ²³ Hanima yamatangwa amengi, ba Yundeya bamutumamene mpunga ngwabo bamuthsiye. ²⁴ Oloni mpunga yabo bethzile naku ithzibuka kuli Saulu. Banyungile bikolo mutanya na muthsiki mangana ngwabo bamuthsiye. ²⁵ Oloni bandongethi bengi bamwambatele buthsiki nakumutuhwitha kwitila ha mbango, kumuthothela mumutonga. ²⁶ Omu ethzile ku Yelusalema, Saulu wethekele kuli nunga hamo na bandongethi, oloni bakele nendi nalyoba, kujeneka kumutabela ngwabo napu ndongethi. ²⁷ Oloni Mbanambase wa mwambatele na kumutwala kuli Miluwa, cho wabalekele omu Saulu alimwenenenemo na Shukulu hangila nomu endekele nendi Shukulu, cho nomu Saulu wathale kwendeka mu kuthimpa mulithzina lya Yesu kuje ku Ndamasiku. ²⁸ Wakele nabo, kukobela mukati na kutuhuka kuthzenguluka Yelusalema. Wendekele mukuthimpa multhzina lya Shukulu Yesu ²⁹ na kulikanangana naba Yunda baku Ngikili, olni batwaleleleho kutonda kumu thsiya. ³⁰ Omu bandolome bedni bathzibile chino, bamuthikumwithile ku Caesaliya nakumutuma ku Taisis. ³¹ Cho nawa, chikungulwila ku Yundeya, Ngalileya, naku Samaliya mwakele kuunda cho bachitungile; na, kwenda mu lyoba lya Shukulu namu kubendethzekewa na muthzithzime wa kujela, Bije bikungulwila byakolele na kubwethzelako. ³² Cho chasholokele ngwabo, omu Petulu wetile mu mutambela wa lifuti lyoshe, na ikeye wethzile kli banu ba Njambi ba kujela aba bayoyelele mu mbaka ya Lida. ³³ Kuje waka wanene munalume walithzina lya Ananeyasi, ou akele mubulili bwendi myaka itanu naitatu, mwafwa akele na kalepa. ³⁴ Petulu wendekele kuli ikeye ngwendi, "Ananeyasi, Yesu Kilisitu nakuthaka. Katuka na kwambata bulili bwobe," cho haje bene wakatukile. ³⁵ Cho boshe bayoyelele mu Lida namu Shalon bamwene ou munalume cho balumukile kuli Shukulu. ³⁶ Cho kwakele ndongethi umo mu Yopa wathzina lya Tabita (Kuchalumuna ngwabo "Ndokasi"). Ou munakathzi washulile na bipangi byabibwa na bilinga bya nyeke ebi alingile kuli banu baka kuhutwa. ³⁷ Chasholokele mumatangwa ajebene wabinjile na kuthsa; hanima yakumutanetha, bamu langekele mu njubo ya helu. ³⁸ Hakupwa Linda yakele hayehi na Yopa, cho bandongethi omu bathzibile ngwabo Petulu akele kujebene, batumine banalume babali kuli ikeye, kumulomba ngwabo, "Achije kuli yetu chakujeneka kwishwaletha." ³⁹ Petulu wakatukile nakuya ku nabo. Omu etele, bamunenele mu njubo ya helu, cho batuliwe boshe bemanene ku yehi nendi nakuthikothzoka, kumumwetha mikanjo na buthzalo obu Ndokasi atungile hathimbu akele nabo. ⁴⁰ Petulu wabitundithilemo byoshe muje mu njubo, wathsikamene hathi, na kulombela; cho, kwalumukile ku mubila, wendekele ngwendi, "Tabita, Induka." Cho watonene hamesho, cho mwa mwene Petulu watumbamene. ⁴¹ Petulu wa mwanene liboko lyendi na kumukatula; cho omuu athanene banu ba Njambi ba kujela nabaje batuliwe, wamusholwele kuli bakebo ali na mwonyo. ⁴² Ei ñanda yathzibakanene muje mu Yopa, cho banu babengi batabelele muli Shukulu. ⁴³ Cho chasholokele ngwabo Petulu wa tumamene matangwa amengi mu Yopa na munalume wa lithzina lya Shimona muka kufutungula bilambu.