¹ Jesu watsi uyabuka wabona tinjinga tifaka iminikelo yato esitjeni semnikelo. ² Wabona umfelokati lotsite afaka tinhlavu letimbili temali. ³ Wase utsi, " Ngicinisile ngitsi kini, lomfelokati lophuyile unikele kubedlula bonkhe. ⁴ Bonkhe laba banikele batsatsa kulokunyenti. Kodvwa lomfelokati, ekwesweleni kwakhe, unikele ngako konkhe labengaphila ngako." ⁵ Kwatsi labanye basakhuluma ngelithempeli, kutsi lalihlotjiswe ngematje lamahle neminikelo, watsi, ⁶ "Tonkhe letintfo lenitibonako, kuta tinsuku lapho kungeyusala litje etikwalelinye lelingayudzilitelwa phansi." ⁷ Base bayambuta, batsi, "Mfundzisi, letintfo tiyakwenteka nini? Siyakuba yini sibonakaliso kutsi sekutakwenteka? ⁸ Jesu waphendvula, "Caphelani kutsi ningayengwa . Ngobe labanyenti bayawufika ngelibito lami, batsi, ' nginguye', futsi, 'Sikhatsi sesisondzele.' ningayi kubo. ⁹ Naniva ngetimphi netiphitsiphitsi, ningetfuki, ngobe letintfo timele kwenteka kucala, kodvwa kuphela kuyawube kusengakafiki," ¹⁰ Wase utsi kubo, "Sive siyawuvukela lesinye, umbuso uvukele lomunye umbuso. ¹¹ Kuyawuba nekutamatama kwemhlaba lokukhulu, etindzaweni ngetindzawo indlala netifo. Kuyawuba netehlakalo letesabisayo netibonakaliso letinkhulu ezulwini. ¹² Kodvwa ngaphambi kwako konkhe loku, bayawuniphatsa ngetandla banitingele, baninikele emasinagogeni nasemajele, banimikise phambi kwemakhosi nakubabusi ngenca yelibito lami. ¹³ Loko kuyawuniholela etfubeni lebufakazi ngami. ¹⁴ Ngako ke titjeleni etinhlitiyweni tenu kutsi ningatilungiseleli kutivikela sikhatsi singakafiki, ¹⁵ ngobe ngiyawuninika emagama nenhlakanipho lekuyawukutsi bonkhe labalwa nani bangakhoni kuwabalekela nekuwaphikisa. ¹⁶ Ngobe niyawukhashelwa ngisho nabatali, bafowenu, tihlobo, nebangani, labanye benu bayawubabulala. ¹⁷ Niyawutondvwa ngibo bonkhe ngenca yelibito lami. ¹⁸ Kodvwa kute ngisho nelunwele lwenu loluyawubhubha. ¹⁹ Ngekubeketela kwenu niyawuzuza imiphefumulo yenu. ²⁰ Nanibona iJerusalema itungeletwa titsa, nibokwati kutsi kubhujiswa kwayo sekusondzele. ²¹ Labo labaseJudiya ababalekele etintsabeni, kutsi labo labasedolobheni baphume kulo, labo labasemaphandleni bangasangeni edolobheni. ²² Ngobe lawo ngemalanga emphindziselo, kute kutsi tonkhe tintfo letibhaliwe tigcwaliseke. ²³ Maye kulabo labakhulelwe nalabo labancelisako ngalawo malanga! Ngobe kuyawuba khona lusizi lolukhulu eveni, nelulaka kunaba bantfu. ²⁴ bayawukuwa ngelusiko lwenkemba, bayawuchutjwa basakatelwe kuto tonkhe tive, iJerusalema igcotjagcotjwe bantfu bative kute kupheleliswe tikhatsi tebetive. ²⁵ " Kuyawuba khona tibonakaliso elangeni, enyangeni, nasetinkhanyetini, nasetikwemhlaba. Tive tiyawuba selusizini, tikhatsateke ngenca yekudvuma kwelwandle nemagagasi. ²⁶ Emadvodza ayawuculeka ngenca yekwesaba nangenca yekulindzela tintfo letitawufikela umhlaba. Ngobe emandla emkhatsi ayawunyakatiswa. ²⁷ Bayawubona iNdvodzana yeMuntfu ita ngelifu ngemandla nangenkhatimulo lenkhulu. ²⁸ Kodvwa ngesikhatsi letintfo ticala tenteka, sukumani niphakamise tinhloko tenu, ngobe kukhululeka kwenu sekusondzele." ²⁹ Jesu wabatjela umfanekiso, "Bukani sihlahla semkhiwa, nato tonkhe tihlahla. ³⁰ Natihluma, niyaye ngekwenu futsi nati kutsi lihlobo selisondzele. ³¹ ngako ngalokunjalo, nanibona letintfo tenteka, niyati kutsi umbuso waNkulunkulu sewusondzela. ³² Ngicinisile ngitsi kini, lesitukulwane angeke sendlule kute tonkhe letintfo tenteke. ³³ Lizulu nemhlaba liyawukwendlula, kodvwa emavi ami angeke andlule. ³⁴ " 34 Kodvwa ticapheleni nine, kute kutsi tinhlitiyo tenu tingasindvwa kunatsa lokwendlulele nekudzakwa netinkhatsato tekuphila, nalolosuku lunganitumi njengelugibe. ³⁵ Ngobe luyawubafikela bonkhe labaphilako ebusweni bemhlaba wonkhe. ³⁶ Kodvwa lindzani ngetikhatsi tonkhe, nithantazele kutsi nibe ngulabacinile ngalokwenele kutsi niphunyule kuto tonkhe letintfo letitakwenteka, nekutsi nime phambi kweNdvodzana yeMuntfu." ³⁷ Kwatsi emini abefundzisa ethempelini, ebusuku aphume ayewuhlala entsabeni yemincumo. ³⁸ Bonkhe bantfu beta ekuseni ngeluvivi kutemlalela ethempelini.