¹ Cosijyila, anekwasu, kondwelani mwa Ambuye. Kwa neo kulemba ivi vimo-mozi vinthu soti kuli mweo nicosavuta kwangu, ndipo kwa mweo munkhala omasuka. ² Langilirani ma imbwa. Langililani bala ocita nchito ziipa. Langililani cotenda- tenda. ³ Poti seo nise otendewa umozi amene opemphera na mzimu wa Mulungu, na kuzikujya mwa Kristu, na kusakhulipilira mu mubili. ⁴ Olo nteto, neo neka ninaco cikhulupiliro mu mubili. Ngati aliyense oganiza ali na cikhulupiliro mu mubili, neo ningankhale naco ngako. ⁵ Neo necitiwa mdulidwe pa siku ya eiti, ya banthu ba Israeli, ya mtundu wa Benjamini, Heberi wa Heberi; monga mwa lamulo, mfalisi. ⁶ Monga mofulumira, nekonkha- konkha chalichi; monga olungama pansi pa lamulo, neo nenze osalakwa. ⁷ Koma vili vonse vinthu venze na phindu kwa neo, neziyesa zotaika cifukwa ca Kristu. ⁸ Mwa cendi, lomba nupenda vonse kunkhla vottaiwa kamba ka kupambaniwa kwa cizibisho ca Kristu Yesu Ambuye wangu. Kamba ka eve nevisiya vintu vonse - na kuviyesa veve, va ku cungu- kuti niwine Kristu ⁹ ndipo kupezeka muli eve, osankhala olungama mwa neo neka kufuma mwa lamulo, koma kuti camene ici cipite mu cikhulupiliro ca Kristu- olungama kufuma kwa Mulungu na cikhulupiliro. ¹⁰ Teto lomba nufuna oziba eve na mphamvu ya kuukisha kwake na kugwirizana kwa kuvutika kwake, ¹¹ Teto payakine ningafwikire ku kuuka kwa ku imfwa. ¹² Osati kuti neo nelandila kale vinthu ivi, olo nine okhoza kale, koma nulondesha ngati soti nikacikate ici camene ecikata Yesu Kristu. ¹³ Anekwasu nuganiza lini tetoneo neka kuti nasilijya kale kucikata. Koma cinthu cimozi canucita: Kuluba va kuvuli na kuyondolora vala vili kusogolo, ¹⁴ nulondesha polekejyelapo na kuonsha pa mtenge wa palulu kuitiwa kwa Mulungu mwa Yesu Kristu. ¹⁵ Tonse mwa seo tekula, tiyeni tiganizemu njira iyi; ndipo ngati muganiza mosiyana pa vilivonse, Mulungu akakuulileni vila kwa mweo. ¹⁶ Moteto, mulimonse mwitefwika, tiyeni tikatishe. ¹⁷ Nkhalani onikonkha neo, anekwasu. Langishishani bala oyenda mcisanzo cimuli naco mwa seo. ¹⁸ Anyinji oyenda- bala binekuujyani kanyinji, ndipo lomba nukuujyani na misozi- monga adani ba mtanda wa Kristu. ¹⁹ Masilijyilo bao ni cionongeko. Poti mulungu wao ni m'mala mwao, na ulemelero wao uli mu nsoni zao. oganiza za zinthu za ziko. ²⁰ Koma konkhalilira kwasu ni kululu, kufuma kwamene seo tulindila mpulumusi, Ambuye Yesu kristu. ²¹ Akasandushe mibili yasu yopepushiwa kunkhala mibili monga mubili wake wa ulemelero. Opangiwa na macitidwe ya mphamvu yake kuzigonjeshera vinthu vonse mwa eve eka.