¹ Lomba Sanibalati pecimvwa kuti tumanga mpanda, cemuipila ngako, ndipo ekalipa ngako, nakubaseka ayuda. ² Pamenso pa azinekwao na gulu la nkhondo la Samaria, eciti, "ocita cinji ayuda ofoka aba? ko bawezyelepo mzinda beve? ko bapeleke nsembe? ko basilizye nchito mu siku limozi? ko bawezyelelemo moyo mu myala ya nthutu peyeshokewa? ³ Tobiya waku Amoni enze naye ndipo eciti, "sembe nkhandwe yakwerako ku chakumanga iphwanye cipupa cao ca myala!" ⁴ Mvwani, Mulungu wasu, pakuti tapepushiwa. Bawezyeleni tonzyo lao pamitu yao na kubaleka ankhale cofunkha mcalo cao caukapolo. ⁵ Musafwikile mphulupuluzao na macipobabasafafanizike pamenso panu, pakuti bausha ukali wa omanga. ⁶ Teto temanga mpanda ndipo mpanda welumikizyika kufwika pkati na pakati. Pakuti banthu befunishisha kugwira nchito. ⁷ Koma Sanibalati, Tobia, ba Arabu, ba Amoni, na ba Asidodi pebecimvwa kuti nchito yokonza mpanda wa Yerusalemu ikuya pasogolo, a kuti m'malo mophwanya monse mwenzovaliwa, ukali ukulu weyaka mkati mwao. ⁸ Bepangana upo, ndipo ewela kubacita nkhondo Yerusalemu na kulatamo msokonezo. ⁹ Koma tepempher kwa Mulungu wasu ndipo teika olindilira mzuba na usiku cifukwa ca vakutiyofya navo. ¹⁰ Ndipo banthu ba Yuda beciti, "mphamvu ya bala otwika katundu yusila, na vophwanyika-phwanyika ni vinyinji. Sitingakwanishe kumanga soti mpanda. ¹¹ Adani basu beciti, "bazibe lini, olo kutiona mpaka tifwike pakati pao na kubapaya, na kilekesha nchito." ¹² Pa nthawi iyo a Yuda benzonkhala pafupi nao bewela kufumila ku mbali zonse na kutilabizya ka teni, kuticenjezya pa venzopangana kuticitira. ¹³ Teto neika banthu kumalo ya kunyansi kwa mpanda mu malo yoonera. Neika banba lili lonse na lupanga, mkondo na mauta. ¹⁴ Ndipo nelanga, nopanama, ndipo neciti ku baulemu, naku oweruza, naku banthu bonse, "musayope kumbukilani abuye amene nimkuru ndipo ni woyofya. Bachaileni khondo mabanja banu bana banalume na banu bana kazi, azinakazi banu na man'ganda banu." ¹⁵ Cecitikaka kuti pebecimvwa adani basu kuti venzopangana kuticitira vazibika kwa seo, na kuti Mulungu wasokoneza venzopangana, tonse tewelera ku mpanda, aliyense ku nchito yake. ¹⁶ Kucokera nthawi iyo gao liyakine la banchito bangu benzomanga tyala mpanda ba gao liyakine benze bokata mindo, vishango, mauta na vovwala va cisuro, pamene asogoleri bepanama kuvuli kwa banthu onse ba Yuda. ¹⁷ Na bala benzomanga mpanda na bala benzotwika katundu, koteto kuti aliyenze enzogwira nchito na kwanja imozi, na kwanja iyakine enzonyamula cida. ¹⁸ Omanga linga aliyense evwala lupanga lake lomangilila pa mbali pake,umo niye mwenzogwilira nchito. Wamene enzolizya lupenga enzonkhala pafupi na neo. ¹⁹ Neciti ku baulemu na bakulu bakulu na ku banthu bonse, "nchito niikulu na yosasobelesha, ndipo tapatukana pa mpanda patali na muyake. ²⁰ Mufunika mukoutukila ku malo kwalira lupenga na kusonkhana kwamene uko. Mulungu wasu atichaile nkhondo." ²¹ Teto tenzogwira nchito. Gulu liyakine tenzokata mikondo kuyambila m'matandakuca mpaka pofuma nyenyezi. ²² Neciti soti ku banthu pa nthawi ila, "munthu aliyense na wanchito wake balale pakati pa Yerusalemu, kuti batinkhalire ngati olindila usiku na ogwira nchito mzuba." ²³ Teto olo neo olo anekwasu, olo banchito bangu, olo analume olindila bekonkha neo, paliye aliyense wa seo esintha vovwala vake, olo kuti akuyokumwa manzi.