¹ Kufuma ivi vintu Yesu ezilangizhya soti ku ophunzila bake pa msinje wa Tiberia. Umu niye mwezilangizhyila: ² Simoni Petulo enze pamozi na Thomasi woitiwa kuti Didimo, Natanieli waku Kana mu Galileya, bana ba Zebediya, na abili baakine ophunzila ba Yesu. ³ Simoni Petulo eciti kwa beve, "Nukuya kokasha nsomba."Beciti kwa eve, "nase, seo, tukuya nawe."Beluta nakuloba mu boti, koma baliye kashe kanthu usiku onse. ⁴ Lomba, pakwenzoyamba kuca, Yesu epanama mbali mwa nyanja, koma ophunzila baliye zibe uti ni Yesu. ⁵ Teto Yesu eciti kwa beve, "mwanamwe, muli na cakulya ciliconse?" bemuyankha, "tiliye". ⁶ Eciti kwa beve, "Ponyelani neti yanu ku kwanja kwanu kwa kwendi, ndipo muzipe ziyakine."Teto beponya neti yao ndipo baliye kwanishe kuiguza cifukwa yenze yozula na nsoba ⁷ Moteto ophunzila wenzokonda Yesu eciti kwa Petulo, "ni Ambuye." Petulo pecimvwa kuti na Ambuye, ezivwalika covwala cake cakunja (pakuti enze osavwala), nakuziponya mu nyanja. ⁸ Ophunzila bayakine bewela mu boti (pakuti enzelini kutali na pa nthaka, monga mamita nainte kufuma mu manzi), ndipo benzoguza neti yozula na nsomba. ⁹ Pabefuma nakuya pa nthaka, beona malasha pala ndipo aikapo na nsomba, na buledi. ¹⁰ Yesu eciti kwa beve, "letani somba ziyakine zimwakata." ¹¹ Simoni Petulo efuma nakuyoguzila neti pa nthaka, yozula na somba, somba zenze 153, koma olo kuti zenze zinyinji, neti iliye ng'ambike ¹² Yesu eciti kwa beve, "welani mulye cakulya ca m'mawa." Mwa ophunzila paliye ekwanisha kumukonsha, "niwe bani?" Beziba kuti na Ambuye. ¹³ Yesu ewela, etolani buledi, nakubapasa, na somba soti. ¹⁴ Aka kenze kacitatu Yesu kuzioneshela ku ophunzila bake kufuma peuka. ¹⁵ Pibecilya cakulya ca m'mawa, Yesu eciti kwa Simoni Petulo, "Simoni mwana wa Yohane, unikonda neo kupambana aba?" Petulo eciti kwa eve, "Ee ambuye, muziba kuti nukukondani." Yesu eciti kwa eve, Ndyesha bana ba mbelele zangu." ¹⁶ Eciti kwa eve kacibili, Simoni mwana wa Yohane, unikonda?" Petulo eciti kwa eve, "Ee Ambuye muziba kuti nukukondani." Yesu eciti kwa eve, "samalila mbelele zangu." ¹⁷ Eciti kwa eve ka citatu, "Simoni mwana wa Yohane, unikonda?" Petulo ecimvwa cisoni cifukwa Yesu emkonsha kacitatu, "unikonda?" eciti kwa eve, Ambuye, muziba ivi vinthu vonse, muziba kuti nukukondani." Yesu eciti kwa eve, Ndyesha mbelele zangu. ¹⁸ Cenci, cendi, nukutui kwa mweo, pimwenze bana atontho, mwenzozivwalika na kuya kulikonse kumufuna, koma mukakalamba munyolola kwanja yanu, ndipo muyakine okuvwalikani nakukuthwalani kumusafuna kuya." ¹⁹ Lomba Yesu elabila ici kuti azibishe imfwa ya Petulo yati akalemeze nayo Mulungu. Pelabila izi, eciti kwa Petulo, "nikonkhe." ²⁰ Petulo elanga kuvuli noona ophunzila wenzokonda Yesu obakonkha, wamene soti enze samila Yesu mbali pa mgonelo nakuti, "Ambuye, nibani wati akakupelekeni?" ²¹ Petulo emuona nakuti kwa Yesu, "Ambuye, nanga uyu munthu acitenji?" ²² Yesu ecti kwa eve, "ngati nufuna kuti ankhale mpana nikawele, nicinji ico kwa weo? nikonkhe." ²³ Moteto mau aba befwika ku ophunzila bayakine, kuti ophunzila akafwe lini. Mwakuti Yesu aliyeuzhe Petulo kuti ophunzila wala akafwe lini, "ngati nufuna kuti asafwe mpaka nikawele, nicinji ico kwa weo?" ²⁴ Uyu niye ophunzila epeleka umboni pa ivi vinthu, ndipo elemba ivi vinthu, nakuti tuziba kuti umboni wake ni wa zoona. ²⁵ Nivinyinji viyakine vecita Yesu. Kuti ciliconse cenzelembewa, Nuganizila kuti calo conse cingakwanishe lini kunkhala na malo ba mabuku yamene yelembewa.