¹ Kaambo mulawo nchihwule bulyo cha shintu shibotu shizhiza, shitali mbushilibonya shesho buli mbushibele. Babo beza kwa Leza bayina mbubakonzha kululamikwa kwiita mu shipayizho shesho bapayizhi nshibapa amwaka u mwaka. ² Kuti, shipayizho nishatakalekwa kupewa? Bashishibi nibakasalazhiwa nikwaakwiina nchibalitibauka linji ku chibi. ³ Pele ku shipayizho shesho kuli shizhibalusho sha shibi amwaka u mwaka. ⁴ Kaambo bulowa bwa bachende u bwa mpongo tabulonzha ku kusha shibi pe. ⁵ Kilisito naa kazhiza mu luundu, wakaamba ati, "shipayizho alimwi u shipo insho nshiwakuzanda, pele mubili wezo nguwakabamba; ⁶ ku shipayizho shakutenta alimwi u shipayizho sha shibi shiina nishakakubotela. ⁷ Ngoonaawo Ume ndakaamba ati, 'bona, Ndime ano--mbubona mbukulembelwe makani angu mwibuka lya mulawo-- nkuchita luzando lwako, u Leza.''' ⁸ Lutaanzhi wakaamba ati, "Kashitali shipayizho, naa shipo, nikuba shipo shakutenta shizulile, naaba shipo sha shibi nshiwaakuzanda. Nikuba kubotelwa muli nshisho." Sheshi nshipayizho shesho shipewa kwiingayina u mulawo. ⁹ Amane wakaamba ati, "Bona, Ndime ano kwaamba nchite luzando lwako."Wakakusha buchite bwa kutaanguna kwaamba ati kube buchite bwabili. ¹⁰ Kwiita mukulyaaba koku, twakasalazhiwa chakumaninina kwiita mu chipo cha mubili waka Jeso Kilisito. ¹¹ A buzuba u buzuba mupayizhi woonse kazhima u kuchita mulimo, kabawiituluka wakupa shipayizho nshishona--shipayizho shesho shitalozha kukusha shibi. ¹² Pele lelyo Kilisito naakalipa mwini kwa chiindi chomwi kuba chipayizho cha shibi, wakakala kwitashi lya lulyo lyaka Leza. ¹³ Ulakalindila kushikila bashikondonina chikabe chilyatilo cha matende akwe. ¹⁴ Kwiita mu kulyaaba kwakwe kwalulamika kwa lyoonse babo baya busalazhiwa. ¹⁵ Moza Usalala awo ulapa bumboni nkutubele. Lutaanzhi wakaamba ati, ¹⁶ "Chechi nchihwuminano checho Ume nchikaaapanga abo a kayita mazuba azo, mbwaamba Mwami. Ndakabika milawo mu myonzo yabo, Alimwi ndakayilemba mu mizeezo yabo." ¹⁷ Alimwi wazungila, "Shibi shabo alimwi u kutachilila mulawo kwabo ndiina ninkakashitelaika linji pe." ¹⁸ Inzho aali kulekelelwa kwa sheshi, kwiina linji chipayizho chimwi cha chibi. ¹⁹ Ubobo, nubakwesu, tulyaangulukile kunjila mu busena busalalisha kwiita mu bulowa bwaka Jeso. ²⁰ Yezhi ninzhila impiya ya bumi njaakatuyalulila kwiitila muchishitilizho, checho, chizhiminina mubili wakwe. ²¹ Inzho mbutukwete mupayizhi mukandosha uyendelezha ing'anda yaka Leza, ²² atuswene afwaafwi u myonzo izwile lushomo lwini lwini, myonzo yesu isansailwe isalale kuhwa ku butongo bwa mizeezo mibiyabi alimwi u mibili yesu isambe u meenzhi asalalisha. ²³ Atukwatishe ku lushomo lwa bulangizhi mbutukwete chakutazungaana pe, kaambo wezo wakashomezha u lashomeka. ²⁴ Katutelaikisha mbutweelele kulizumya zumya umwi u mweenzhiina u kufwunana alimwi u michito mibotu. ²⁵ Tutabi nituchileka kuswaangana antoomwi, u koya mbubachita bamwi. U bobo, atuyohwane kulizumya zumya, katuchita bobo mbutwabona kwaamba ati buzuba bwaba afwaafwi. ²⁶ Inzho kuti twatolelela kubisha cha lutuzhi kakuli twakatambula luzhibo lwa bwini, kwiina linji chipayizho cha shibi chisheele. ²⁷ Ubobo tulyeelele kulindila cha bukandu ku lubeta, alimwi u mulilo utizha wezo u kaazonauna bashinkondonina Leza. ²⁸ Woonse wezo u kaka mulawo waka Mozesi ulayayiwa chakubula luse ku bumboni bwa bobile naa botatwe bakamboni. ²⁹ Anu chilakaba buti chibebyo checho ku muntu wezo u kaka Mwanaa Leza, unyansha bulowa bwa chihwuminano kuti tabusalali--bulowa bobo mbwaakasalazhiwa abo--alimwi ukutukana moza wa luse? ³⁰ Kaambo tulimwizhi wezo wakaamba ati, "Inzholi njiyangu; ndakazhololola." Alimwi, "Mwami ulakabeteka bantu bakwe." ³¹ Nchintu chitizha kuwila ku matashi aka Leza mumi! ³² Pele kamutweluka mazuba a kamana, lelyo nimwakamunikilwa, mwakapenga mu shintu shinji shinji. ³³ Shimwi shiindi mwakaakuletwa atuba u kutukwana alimwi u kupenzhewa, alimwi shimwi shiindi mwakapenzhewa antoomwi ubabo baakuli mu mapenzhi. ³⁴ Mwakabafwila inkumbu babo baakwaangilwe muntolongo, alimwi mwakahwuminya cha lutangalo lubono lwenu kusaalwa. Umwe mwaakwizhi lwenu nubeni kwaamba ati mulikwete lubono lutakaamana. ³⁵ U bobo mutabi nimulusowa lushomo lwenu, lolo lukwete bulumbu bukando. ³⁶ Mulyeelele kutatanana kwaamba mwachita luzando lwaka Leza, mulakatambula checho chalo nchaakashomezha. ³⁷ Mu kaindi bulyo kashoonto, wezo walo uzhiza chini chini ulazhiza alimwi tachelwa. ³⁸ Mululami wangu ulakapona mu lushomo. Naakuti wazhokela munshi, moza wangu toobotelwa mwakwe. ³⁹ Pele tatuli ba babo bamwi bapilukila ku luzonauko, pele tuli akati ka babo balo bakwete lushomo alimwi bazobola myoza yabo.