¹ Lelo Lesa aibukishe Noa ne nama shonse isha mpanga ne fitekwa fyonse ifyali nankwe mu cibwato. Elyo aimya icimwela calapupa pesonde, na menshi yalacepa. ² Pali iyi nshita utumfukumfuku twali muli bemba washika ne fipunda fya mu mulu fyacilikwa, ne mfula yaleka ukuloka ukufuma mu mulu. ³ Amenshi pesonde yalakama buce buce. Panuma ya nshiku umwanda umo na makumi yasano amenshi yasuka yacepa. ⁴ 4Pa bushiku bwalengele ikumi limo na cine lubali, mu mweshi walenga cine lubali, elyo icibwato caya ikala pa mpili sha Ararati. ⁵ Amenshi yakonkenyepo ukukama mpaka na mu mweshi walenga ikumi. Elyo pa bushiku bwakubalilapo mu mweshi walenga ikumi, pa mulu wa mpili patampa ukumoneka. ⁶ 6Panuma ya nshiku amakumi yane, Noa aisula insolokoto apangile mu cibwato, ⁷ elyo atuma mwankole, alapupukafye, aleti aya kabili abwela mpaka nelyo amenshi yakamine pa mushili. ⁸ Kabili Noa atuma inkunda pakuti imone amenshi nga nayakama pa mushili. ⁹ Nomba inkunda yafilwa ukusanga apakwikala, pantu amenshi ninshi yalifye mpanga yonse pesonde. Kanshi inkunda epakubwelela kuli Noa mu cibwato. Noa nao epakutambika ukuboko, aikata inkunda, aingisha na mu cibwato umo ali. ¹⁰ Noa apembelako na shimbi inshiku cine lubali elyo nakabili atuma inkunda ukufuma mu cibwato. ¹¹ Ilyo inkunda yabwela mu cungulo, moneni ku mulomo waiko yabwela ili no lulembelya lwa miolifa! Elyo Noa aishiba ukuti kanshi amenshi nayakama pesonde. ¹² Kabili Noa apembelako inshiku na shimbi cine lubali elyo nakabili atuma inkunda, lelo uyu muku wena tayabwelele iyoo. ¹³ Kanshi amenshi yakamine pesonde pa bushiku bwakutampa umweshi mu mweshi wakubalilapo ilyo Noa ali ne myaka imyanda mutanda na umo. Elyo Noa afumyapo umutenge pa cibwato, amona nokuti umushili nauma. ¹⁴ Pa bushiku bwalenga amakumi yabili na cine lubali mu mweshi walenga ibili, lyena umushili waumafye ndi. ¹⁵ Elyo Lesa aebele Noa ati, ¹⁶ “Fuma mu cibwato, iwe no mukashi obe, abana bobe abaume na bakashi babo. ¹⁷ Fumya mu cibwato fyonse ifyabumi ifyo uli nafyo, ifyuni, inama na fyonse ifikulaika pa mushili, pakuti filefyalana, fisande, fifule nganshi pesonde.” ¹⁸ Kanshi Noa epakufuma mu cibwato pamo na bana bakwe abaume, umukashi wakwe na bakashi ba bana bakwe. ¹⁹ Inama shonse na fyonse ifikulaika pa mushili, ifyuni fyonse na fyonse ifyenda pesonde fyafuma mu cibwato mu misango yafiko. ²⁰ Elyo Noa akuulile Yawe ubulambo, abuulapo inama shimo pa shishakowela ne fyuni ifishakowela, afituula nge lambo lyakoca pa bulambo. ²¹ Yawe aumfwa ukuti cena icisuma icakusekesha, asosa mu mutima wakwe ati, “Nshakatale nakabili ndapisha umushili pa mulandu wa muntu, nangu imitontonkanishe ya mu mutima wakwe yabipa ukufuma ku bwaice bwakwe. Kanshi nshakatale mbwekeshapo nakabili ukonaula ifyabumi fyonse ngefi ncitile. ²² “Inshita yonse ilyo isonde likabako, lyonsefye takwakatale akupwa inshita yakubyala ne nshita yakulobolola, impepo no kukaba, pamwela no lusuba, akasuba no bushiku.”