¹ Pati papite inshita elyo baishile eba Yosefu abati, “Bawiso balwele.” Elyo Yosefu abuula bamwane babili abaume, Manase na Efulemu, aya nabo. ² Cilya baeba Yakobo abati, “Mwano Yosefu aisa kukukumona,” Israeli aikoselesha aikala na pa busanshi. ³ Elyo Yakobo alaeba Yosefu ati, “Lesa Umwine wa maka yonse alimonekele ku Lusi mu calo ca Kenani, elyo no kumpaala alimpaalile. ⁴ Kabili anjebele nokuti, ‘Nkakulenga ukusanda no kufula. Nkakulenga ukuba ibumba lya mishobo iyingi. Kabili nkapeela ici calo ku bana bobe abali nokukukonkapo ukuti cikaleba icalo cabo lyonsefye.’ ⁵ Kanshi abana benu abaume babili abo wafyele muno Egupto nshilati njise kuno, nabo nomba bana bandi. Efulemu na Manase bakulaba abana bandi kwati nifi fyaba abana bandi Rubeni na Simeoni. ⁶ Lelo abana bambi abo wafyala panuma ya aba, bena bana bobe. Abo bena bakapokela ifyacishilano mu mashina ya bamunyina, Efulemu na Manase. ⁷ Pantu naliketwe no bulanda ilyo nalefuma ku calo ca Padani Aramu. Ni pali ubo bulendo elyo Rakeli afwile ninshi tulifye mupepi na ku Efulata. Kanshi namushiikile kulya kwine mumbali ya musebo uwalola ku Efulata, e Betelemu wine.” ⁸ Ilyo Israeli amwene bamwana Yosefu abaume, aipwishe ati, “Nga aba ni bani?” ⁹ Yosefu aeba wishi ati, “Aba bana bandi Lesa ampeela kuno.” Elyo Israeli asosa ati, “Balete kuno uleke mbapaale.” ¹⁰ Nomba Israeli alefifitilafye ku mulandu wa bukote, alemonafye panono. Kanshi Yosefu aleta bamwane abapalamika kuli wishi. Wishi nao abatomona pakubaposha, kabili abafukatila. ¹¹ Elyo Israeli aeba Yosefu ati, “Nshalesubila nelyo panono ukumona icinso cobe nakabili, lelo nomba Lesa nalenga ukuti mone na bamwano bene.” ¹² Elyo Yosefu afumya bamwane mu ceni cakwa Israeli, akontamina panshi. Kabili Yosefu alibuulile bamwane bonse babili. ¹³ Efulemu amupisha ku kulyo kwakwe pakuti alungatane no kuboko kwa kuso ukwakwa Israeli. Manase nao amupisha ku kuso kwakwe, pakuti alungatane no kuboko kwa kulyo ukwakwa Israeli. Elyo abapalamika kuli Israeli. ¹⁴ Lelo Israeli apusanya amaboko yakwe. Kanshi epakubika icisansa cakwe ica ku kulyo pa mutwe wakwa Efulemu, nangu ali e mwaice bantu. Elyo icisansa cakwe ica ku kuso cena acibika pa mutwe wakwa Manase nangu Manase ali e beli. ¹⁵ Elyo apaala Yosefu ati, “Lesa uo ifikolwe fyandi Abrahamu na Isaki baletumika, Lesa uwaba kacema wandi mu bumi bwandi bonse ukufika na lelo, ¹⁶ Malaika uwampususha ku fikali fyonse, engapaala aba baice. Ishina lyandi na mashina ya fikolwe fyandi Abrahamu na Isaki yengakonkanyapo ukwishibikwa muli aba baice. Bengasanduluka, bafule nganshi pesonde.” ¹⁷ Ilyo Yosefu amwene ukuti wishi abikile icisansa cakwe ica ku kulyo pa mutwe wakwa Efulemu, tacamusansamwishe iyoo. Kanshi epakwikata ukuboko kwakwa wishi ukuti akufumye pa mutwe wakwa Efulemu, elyo akubike pa mutwe wakwa Manase. ¹⁸ Yosefu aeba wishi ati, “Iyoo tata, uyu e beli, eo mubike pa mutwe wakwe icisansa cenu ica ku kulyo.” ¹⁹ Lelo wishi akaana ati, “Ninjishiba mwana wandi, ala ninjishiba. Manase nao wine akaba umushobo, kabili uukulu. Lelo kwena, uwamwaice Efulemu akacindamapo ukucila uwamukalamba. ²⁰ Kabili aba mu lupwa lwakwe bena bakaba imishobo iyingi.” Kanshi epakubapaala ubo bwine bushiku ati, “Abena Israeli bakalabomfya ishina lyobe pakupaala abati, ‘Lesa engalenga ube kwati ni Efulemu na Manase.’” Kanshi efyo Israeli abikile Efulemu ukuba umukalamba pali Manase. ²¹ Elyo Israeli aebele Yosefu ati, “Mona ine ndi mupepi nokufwa, lelo Lesa akulaba na imwe, kabili akamubweseshamo ku calo ca fikolwe fyenu. ²² Lelo pafyo bamunonko bapoka, iwe nakulundilapo icalo ca lupili ico napokele ku lupanga lwandi no buta bwandi ku bena Amoli.”