¹ Ilyo papitile imyaka ibili iyituntulu Farao alotele iciloto. Alotele eminine pa lulamba lwa mumana wa Nailo. ² Awe iŋombe ishikota cine lubali ishatuuluka kabili ishaina ubusaka shafuma mu mumana, elyo shalalya icani ca mu lulamba lwa mumana. ³ Kabili panuma, mu mumana wa Nailo mwafuma iŋombe ishikota cine lubali ishaonda kabili ishibi. Nasho shaya iminina apali ishibiye pa lulamba lwa mumana. ⁴ Elyo iŋombe isho ishibi kabili ishaonda shalya iŋombe ishatuuluka kabili ishaina ubusaka. Awe Farao ashibuka mu tulo. ⁵ Kabili Farao apona mu tulo, alota iciloto na cimbi. Awe amona imisonso cine lubali iyaisulamo inseke ishisuma ishatuuluka ilemena pa lupimbili lumofye. ⁶ Elyo panuma ulupimbili lwatwala imisonso imbi cine lubali, iyi yena yali iyapapa iyauminina ku mwela uwakaba uwa ku kabanga. ⁷ Imisonso iyapapa yamina imisonso cine lubali iya nseke ishatuuluka ishisuma. Farao elyo ashibuka mu tulo, aishiba ukuti aciba alelotafye. ⁸ Ulucelo Farao alifye uwasakamana. Kanshi epakwita abalecita amalele na bamano bonse mu Egupto. Farao abebako ifiloto alotele, lelo tapali nelyo umo uwakuti amwilwile. ⁹ Elyo umukalamba wa bakatumika ba lukombo lwa mfumu aebele Farao ati, “Ilelo naibukisha ifyo nalufyanya. ¹⁰ Limo Farao alifulilwe ababomfi bakwe, aposa ine no mukalamba wa balepanga imikate mu cifungo mu ŋanda yakwa kangalila wa fita ifilonda kwisano. ¹¹ Cila umo pali ifwe babili alilotele iciloto pa bushiku bumo bwinefye. Cila ciloto cali nomo calolele. ¹² Twalimo no mulumendo umo Umuhibulu, umusha wakwa kangalila wa bamalonda. Twalyebeleko uyo mulumendo ifiloto fyesu. Alitwilwilile filoto fyesu, cila umo amwilwila umwalolele iciloto cakwe. ¹³ Kabili ifintu fyaishile citikafye ngomo mwine atwilwilile. Ine nalibwelele pa mulimo wandi, lelo umunandi wena alikulikwe.” ¹⁴ Kanshi Farao alitumine abakwita Yosefu. Baya mufumya mu cifungo bamuletafye bwangu bwangu. Yosefu atala abeya, afwala ne fyakufwala fimbi elyo aisa pa cinso cakwa Farao. ¹⁵ Farao aebele Yosefu ati, “Ine nalilota iciloto, lelo tapali nelyo umo uwakunjilwilako. Lelo nalyumfwa uko balanda pali iwe ukuti, nga umo akweba ifyo alotele, kuti wamwilwila.” ¹⁶ Yosefu amwasuka ati, “Teine ndeilula, lelo ni Lesa euleilwila Farao ifyakumuwamina.” ¹⁷ Elyo Farao aebele Yosefu ati, “Ine nalotele ninjiminina pa lulamba lwa mumana wa Nailo. ¹⁸ Elyo mu mumana mwafuma iŋombe ishikota cine lubali ishatuuluka kabili ishaina ubusaka, shalalya ne cani ca mu lulamba lwa mumana. ¹⁹ Elyo panuma ya ishi, mu mumana mwafuma iŋombe shimbi ishikota cine lubali ishapampauka, ishibi nganshi kabili ishaonda. Nshatala mona iŋombe ishabipa ngesho mu calo conse ca Egupto. ²⁰ Isho iŋombe ishaonda kabili ishibi shalya iŋombe cine lubali ishaina, ishabalilepo ukufuma mu mumana. ²¹ Lelo panuma yakulya iŋombe ishaina, nalyo line shashalafye ishibi nga kale. Umuntu nelyo umo tekuti eshibe ukuti nashilya iŋombe shaina. Elyo nabuuka. ²² Kabili mu ciloto candi namona imisonso ya ŋanu cine lubali iyaisulamo inseke ishisuma ishatuuluka, naimena ku lupimbili lumofye. ²³ Elyo panuma lwatwala imisonso imbi cine lubali, iyi yena yali iyapapa kabili iyauminina ku mwela uwakaba uwa ku kabanga. ²⁴ Iyo misonso iyapapa yamina imisonso cine lubali iya nseke ishisuma. Nalishimikila abacita amalele ifi filoto, lelo tapaba uwakuti anjilwileko.” ²⁵ Elyo Yosefu aebele Farao ati, “Ifiloto fyakwa Farao filolelefye ku cintu cimo cine. Lesa nasokolwela Farao ifyo alaswa acite. ²⁶ Isho ŋombe ishikota ishisuma cine lubali myaka cine lubali, elyo ne misonso iyisuma iya ŋanu, nayo myaka cine lubali. Kanshi ifi filoto fyonse filolelefye ku cintu cimo cine. ²⁷ Elyo ne ŋombe ishikota isho cine lubali ishaonda kabili ishibi ishafumine mu mumana panuma, nasho myaka cine lubali. Elyo ne misonso iyapapa cine lubali iyauminina ku mwela wa ku kabanga uwakaba, e myaka cine lubali iya cipowe. ²⁸ Kanshi efilya nacilanda kuli Farao ukuti, Lesa nalanga Farao ifyo alaswa acite. ²⁹ Imyaka cine lubali iyalaisa, mukaba ifyakulya ifingi nganshi mu calo conse ica Egupto. ³⁰ Lelo panuma, pakakonka imyaka cine lubali iya cipowe. Abantu bakalaba nokuti mwali ifyakulya ifingi mu calo ca Egupto, pantu icipowe cikonaula icalo. ³¹ Abantu tabakebukishe ukuti mu calo mwali ifyakulya ifingi, pantu icipowe cikakonkapo, cikabipisha nganshi. ³² Umulandu Farao alotele iciloto cimo cine imiku ibili, nico Lesa cine cine napanga ukucita ici cintu, kabili takokole ukucicita.” ³³ “Kanshi nomba Farao nafwaye umuntu uwacenjela kabili uwamano, amupeele amaka yakwangalila icalo conse ica Egupto. ³⁴ Farao nasonte na bakangalila mu calo abakupoka icipande ca fisabo cimo pa fipande fisano fya fisabo bakalasombola mu myaka cine lubali ilyo kukaba ifisabo ifingi ³⁵ Farao abapeele amaka yakulonganika ifyakulya fya myaka iyi isuma no kututila iŋanu mu misumba umo bakalasungila ifyakulya. ³⁶ Ifi fyakulya fyakubika mu matala ya misumba, fyakwisa mukubomfya mu myaka cine lubali iya cipowe ico cikapona pa calo ca Egupto. Epakuti icalo cikonaulwa ku cipowe.” ³⁷ Aya matontonkanyo yamoneke bwino kuli Farao na babomfi bakwe bonse. ³⁸ Elyo Farao asosele ku babomfi bakwe ati, “Bushe ni kwi twingasanga umuntu uwaba ngoyu, umwaba umupashi wakwa Lesa?” ³⁹ Farao epakweba Yosefu ati, “Apo ni Lesa uulengele ukuti wishibe ifi fyonse, tapali muntu nelyo umo uwacenjela kabili uwamano nga iwe. ⁴⁰ Kanshi niwe wine walaba cilolo mukalamba we sano lyandi, na bantu bandi bonse bakulabeela ifyo wabakonkomesha. Ninefye nakulakucilako ico ine ndi mfumu.” ⁴¹ Elyo Farao aebele Yosefu ati, “Kanshi nomba, ine niwe nasonta ukuba cilolo mukalamba wa calo conse ica Egupto.” ⁴² Farao epakufuula imbalaminwe yakwe iyabufumu iyakufwatikilako, afwika na Yosefu ku munwe. Amufwika ne nsalu ishabuuta ubusaka kabili amufwika no munyololo wa golide mu mukoshi. ⁴³ Amuninika mwiceleta lyakwe ilyabubili nge nkonkani yakwe, na bantu bali pantanshi yakwe balepunda abati, “Mufukamineni!” Kanshi efyo amupeele amaka yakuba cilolo mukalamba wakwe uwa calo conse ica Egupto ⁴⁴ Elyo Farao aebele Yosefu ati, “Ine nine Farao imfumu, lelo mu calo conse ica Egupto tamwakabe nelyo umo uwakucita cimo, ukwabula ukuti iwe usuminishe.” ⁴⁵ Farao ainika Yosefu ishina lya Sefenati Panea. Kabili apeela Yosefu umukashana Asenati umwana wakwa Potifera shimapepo wa ku Oni ukuti abe umukashi wakwe. Yosefu nao aya alepitana mu calo conse ica Egupto. ⁴⁶ Yosefu ali ne myaka amakumi yatatu (30) ilyo atampile ukulabombela Farao imfumu ya calo ca Egupto. Yosefu epakusha Farao aya aletandala mu calo conse ica Egupto. ⁴⁷ Mu myaka ilya cine lubali iya fisabo ifingi, umushili wameseshe ifisabo ifingi nganshi. ⁴⁸ Yosefu alongenye ifyakulya fyonse ifyasombwelwe mu Egupto muli iyo myaka ya fisabo ifingi, afitutila mu misumba. Muli cila musumba atutilamo ifyakulya basombwele mu mabala yashingulwike uyo musumba. ⁴⁹ Yosefu atutile iŋanu ishingi nganshi, shafulilefye kwati musensenga wa muli bemba. Shalifulishe icakuti aleka no kupenda ku mulandu wa bwingi. ⁵⁰ Ilyo imyaka ya cipowe tailaisa, Yosefu afyele abana babili abaume muli Asenati mwana Potifera, shimapepo wa ku Oni. ⁵¹ Yosefu ainike ibeli lyakwe ishina lya Manase nokusosa ati, “Pantu Lesa nalenga ukuti ndabe amacushi yandi yonse na kuli bonse aba mu ŋanda yakwa tata.” ⁵² Cikonkebeli wena amwinike ishina lya Efulemu, nokusosa ati, “Pantu Lesa nalenga ukuti nsanduluke mu calo umo nalecula.” ⁵³ Cilya imyaka cine lubali iya fyakulya ifingi yapita, elyo imyaka cine lubali iya cipowe nayo yatampa ngefyo Yosefu asosele. ⁵⁴ Mu fyalo fyonse fimbi mwapona icipowe, lelo mu calo conse ica Egupto mwena ifyakulya emo fyali ⁵⁵ Cilya abena Egupto bonse batampa ukumfwa icipowe, abantu balalomba Farao ukuti abapeeleko ifyakulya. Elyo Farao aeba abena Egupto bonse ati, “Kabiyeni kuli Yosefu, mucite ifyo alemweba.” ⁵⁶ Cilya icipowe cakumana icalo conse elyo Yosefu aisula amayanda yonse batutilemo iŋanu, alashitisha na ku bena Egupto pantu mu calo conse mwaponene icipowe icibi. ⁵⁷ Abantu mu fyalo fyonse nabo balaisa kukushita iŋanu kuli Yosefu pantu icipowe icibi caponene pesonde lyonse.